පනින රිලවුන්ට ඉනිමං එපා
"මූනිච්චාවට හිනාවෙන්න හරි දක්ෂයො. ඒ වගේම තමා කේලම් කියන්න ගියාමත්. කාට හරි දුකක් දීල හිනා වෙන්නමයි බලන්නේ"
මේ කියමන මේ රටේ ඕනෑම කාර්යාලයකින් ඇහෙන කතාවක්. නිලධාරී බේදයකින් තොරවම හැම තැනකින්ම ඇහෙන මේ කතාවේ අතුරු ප්‍රතිඵලයක් ගැනයි අද සදහම් සෙවණේදී කතිකා කරන්නේ. රට වටකර වැට බැන්දත්, කටවටකර වැට බඳින්න බැරි නිසා ඒ කටින් කියැවෙන වචන ඔබට දරාගන්නට නම් අපහසු වනවා නොඅනුමානයි.
විවේචන, නින්දා අපහසා, කේලම් කිම ඇතැම් අය සතු සහජ හැකියාවකි. ඒ හැකියාව ඔවුන්ගේ ජීවිතයේ සතුටයි. එහෙත් එය තවත් අයකුගේ දුකක් බව සිතන්නට නොහැකි වීම නම් ඇත්තටම අවාසනාවකි. ඒ අවාසනාවේ ගොදුර ඔබ විය හැකිය. ඒ නිසාම ඔබ ගොදුරක් වුවත්, එයට හසුවූවත්, ඉන් ගොඩ ඒමට දැන සිටීම ඔබේ වගකීමකි. එයට උපකාර කරන්නටයි සදහම් සෙවණින් අද අකුරු කරන්නට සිතුවේ.
නින්දා අපහසා විඳි අය අතර, ඔබ පළමුවැනියා නොවන්නේ, සම්මා සම්බුදු රාජාණන් වහන්සේ ද එම තත්ත්වයන්ට මුහුණ දුන් කෙනෙක් නිසයි. ජේසුස් ක්‍රිස්තුස් වහන්සේ ද එසේමය. අප සැමගේම ගෞරවයට පාත්‍ර වූ ආගමික ශාස්තෘවරුන් වන ඔවුන්ට විඳින්නට සිදු වූ ඒ අපහාසයෙන් අත් මිදෙන්නට ඔබට නොහැකි වීම අරුමයක් නොවේ. ඔබ එවැනි අයට හිතවත්ව සිටිය ද, ඔවුන්ගෙන් දුරස්ව සිටිය ද ඔබට නින්දා අපහාස කරන්නවුන්ගේ ගොදුරක් වීමට සිදුවනවා නියතයි. මෙය සාමාන්‍ය දෙයක් ලෙස ඔබ දුටුව ද, ඇත්තටම මෙය, වචනයෙන් විස්තර කළ නොහැකි ශෝචනීය තත්ත්වයකි. එය ඇතැම් විට තවත් අයකුගේ ජීවිතයත් සමග සෙල්ලම් කිරීමක් හා වැනිය.
ඕනෑම දෙයක් ඕනෑවට වඩා ඕනෑම නැත. ඒ නිසා මේ අපහසා කිරීම්වලට, බොරු චෝදනා, කේලාම්කීම්වලට සීමාවක් තබා ගත යුතුයි. මෙවැනි දෙයකට ගොදුරු වූවකුට ඉන් අත්මිදීමට නම් ලෙහෙසි පහසු නැත. ඇතැම් විට මෙවැනි අවස්ථාවන්ට ගොදුරු වූ විට ඔබට කාර්යාලය අප්‍රසන්න විය හැකිය. එය ඔබේ කටයුතුවලට ගෙන දෙන්නේ අයහපත් ප්‍රතිඵලයක් පමණි. ඇතැම් විට ඔබට රාජකාරී ස්ථානය පවා අතහැර යාමට සිත්වීමට පුළුවනි. ඔබට අසත්‍ය චෝදනා එල්ල කරමින්, ඔබේ මග හසුරුවා, ඔබ අපහසුතාවයට පත් කරනා ඔවුනට ඔබ පිළිතුරු ලබා දිය යුත්තේ එලෙසින් නොව, ඔවුන්ගේ පීඩනයන් හමුවේ ඔබ නැගී සිටිය යුත්තේ ඔවුන්ට සිතා ගන්නටවත් නොහැකි වන ලෙසයි. එසේ නොමැතිව බොරු චෝදනාවකට, අපහාස කිරීමකට ඔබේ රැකියාව අතහැර යන්නට එපා. එය ඔබ ඔබම පරාජයට පත් කර ගැනීමක් බඳුයි.
පනින රිලවුන්ට ඉණිමං නොතකා ඔබ සිනහවෙන් මේ හැම දෙයක්ම බාර ගැනීමට සූදානම් වන්න. ඔබ ලබන සුවිසල් ජයග්‍රහණය එයයි.
අධ්‍යාපනපති, නාඋල ශ්‍රී ධම්මානන්ද පරිවේණාධිපති,
පූජ්‍ය බිබිලේ වජිරඤාණ හිමිපාණන්
උපුටා ගැනීම දියණිය පුවත්පත.
