මවුපිය සෙනෙහස නොලබන දරුවන්ගේ ඉරණම
දරුවෙකුට තිඛෙන සෑම ගැටලුවකටම පිළිතුරක් බොහෝදුරට තමාගේ මව හෝ පියා ළඟ තිබිය හැකියි. නමුත් ඇතැමෙකුට මේ උරුමය කුමන හෝ හේතුවක් නිසා තාවකාලිකව හෝ දීර්ඝකාලීනව නොලැබී යා හැකියි. මේ නිසා තනිවන දරුවන්ට ඔවුන්ගේ ගැටලු පිළිබඳ පැවසීමට අන් කවරෙකුවත් නොසිටිය හැකියි. එවැනි දරුවන් තුළ ඇතිවන මානසික මෙන්ම කායික සෞඛ්‍යමය ගැටලු ප්‍රමාණ ද මෙතරම් යැයි කියා සීමා කිරීමට ද නොහැකියි. කෙසේ වෙතත් මේ කුමන හෝ හේතුවක් නිසා අහිමි වන දෙමාපිය සෙනෙහස පිළිබඳව මෙවර මානසික සාකච්ඡාව යටතේ විමසා බලමු.
දෙමාපියන් නොමැතිව දරුවන් තනිවන අවස්ථා මොනවාද? ලංකාවේ වර්තමාන තත්ත්වය පිළිබඳ විමසා බලන විට දරුවන් නිවෙස් තුළ තනි වන්නේ ප්‍රධාන වශයෙන් මව හෝ පියා විදේශ ගත වීමෙනි. ඊට අමතරව දෙමාපියන් දික්කසාද වීමද යම් අනතුරක් නිසා මිය යාමද ඇතැම් විට රැකියාවට යාම නිසාද දරුවන් නිවෙස් තුළ තනිවිය හැකියි. මෙසේ දරුවන් නිවෙස් තුළ තනිවීම තාවකාලික හෝ දීර්ඝකාලීන විය හැකියි.
දරුවන් තනිවීම නිසා ඇතිවන ගැටලුකාරී තත්ත්ව මොනවාද? මේ නිසා ඇතිවන ප්‍රධාන ගැටලුව වන්නේ දරුවා රැකබලා ගන්නේ කවුද යන ගැටලුවයි. සාමාන්‍යයෙන් දෙමාපියන් අහිමි වීමෙන් පසුව ඒ වගකීම දෙවනුව භාරවන්නේ සීයා, ආච්චි එසේ නැත්නම් මව හෝ පියාගේ සහෝදරයෙකුට හෝ සහෝදරියකට විය හැකියි. එසේ වුවත් දෙමාපියන්ගෙන් ලැබුණු සෙනෙහස අහිමි වීම අන් අයගෙන් ලැබුණ ද ඒවායේ යම් යම් අඩු පාඩුකම් පැවතිය හැකියි. මෙසේ ඇතිවන බලපෑම කායික, මානසික, සමාජීයව මෙන්ම ආර්ථික යන ක්ෂේත්‍ර ගණනාවක් ඔස්සේ බලපෑම් ඇතිකරවිය හැකියි.
මෙසේ තනිවන දරුවන්ට මානසික වශයෙන් ඇතිවන බලපෑම පිළිබඳ පැහැදිලි කළොත්? දෙමාපියන්ගෙන් හිමිවන ආදරය සෙනෙහස මුළුමනින්ම හෝ තාවකාලිකව අහිමි වීම නිසා ඔවුන් අපේක්ෂා භංගත්වයට පත් වී ආතතිය කාන්සිය වැනි මානසික රෝගවලට ගොදුරු වේ. මේ රෝග අවස්ථා අවසානයේ විෂාදය වැනි දරුණු මට්ටමේ මානසික රෝග සඳහා හේතු වන බවද වෛද්‍ය විද්‍යාත්මක පිළිගැනීමයි. මේ නිසා ඔවුන්ගේ ඉගෙනීමට ඍජුව බලපෑම් ඇති වන අතර චිත්තවේග පාලනය කිරීමට නොහැකි නිසා ඉක්මනින් කේන්තියාම වැනි ලක්ෂණ ද ඔවුන්ගෙන් දැකගත හැකියි. ඒ වගේම ඔවුන්ගේ පරිකල්පන ශක්තිය, සිතුවිලි වර්ධනය වීම් ආදිය පවා සම්පූර්ණයෙන්ම අඩපණ වීමට ද හැකියි. මීට අමතරව යම් යම් වැරදි පුරුදුවලට යොමුවීම, යම් යම් අයගේ හිංසනයන්ට ලක්වීම, සූුදුවලට පෙළඹීම, මත්ද්‍රව්‍ය භාවිතය, නීති විරෝධි ක්‍රියා (සොරකම්, මංකොල්ලකෑම ආදී) වලට පෙළඹීම, නරක ඇබ්බැහි වීම් පවා ඇති කරගත හැකියි. යම් දරුවෙක් මෙසේ නිවසේ තනිවන විට විශේෂයෙන් විවිධ පුද්ගලයන්ගේ අඩන්තේට්ටම්වලට පවා ලක්විය හැකියි. ඇතැම්විට ඔවුන් දිගින් දිගටම යම් යම් අඩන්තේට්ටම්වලට ලක් වනවා නම් (විශේෂයෙන් ලිංගික වශයෙන්) එවැනි දරුවන්ගේ චර්යාමය වෙනස්කම් හැසිරීමේ වෙනස්කම් දැන ගැනීමට හැකියි.
රැකියාවට යන දෙමාපියන් නිසා දරුවන්ට ඇති වන මානසික පීඩාකාරී තත්ත්ව මොනවාද? දෙමාපියන් දරුවන්ට දමා රැකියාවන් සඳහා යන විට දරුවා රැකබලා ගැනීමට වෙනත් මෙහෙකාරියක් වෙත දමා යෑම මේ වනවිට සුලබව සිදුවන දෙයක්. නමුත් එවැනි දරුවන් කායික මෙන්ම මානසික වශයෙන් යම් යම් බලපෑම්වලට ලක් වේ. එවැනි මෙහෙකරුවන් ඇතැම් විට නරක හැසිරීම් ඇති අය නම් කුඩා දරුවන් ඒවා ක්ෂණිකව ග්‍රහණය කරගත හැකි නිසා ඔවුන් ඉතා ඉක්මනින් වැරදි කිරීමට පෙළඹිය හැකියි. ඒ නිසා සෑම විටම දරුවා රැකබලා ගැනීමට යම් මට්ටමකින් හෝ දැනුමක් සුදුසුකමක් සහිත අයෙක් තෝරා ගැනීමට වගබලා ගත යුතුයි. ඇතැම් විට නිවෙස්වල තනිවන දරුවන් මෙහෙකරුවන්ගේ පවා ලිංගික අතවරයට පත්විය හැකි නිසා ඒ පිළිබඳ දෙමාපියන් හොඳ අවධානයකින් කටයුතු කළ යුතුයි. ඊට අමතරව දරුවාගේ පෝෂණ ගැටලු ද ඇති විය හැකියි. ඇතැම් මෙහෙකරුවන් ඕඩික්ලෝන් වැනි දේ දරුවන්ට බීමට දීම නිසා දිවා කාලය පුරාම නිදා සිටිය හැකියි. මෙවැනි අවස්ථාවන් පිළිබඳවත් හොඳ අවධානයකින් කටයුතු කිරීම වැදගත්. ඒ වගේම ඉතා හොඳ තත්ත්වයේ සිටින දරුවෙක් නම් මෙම මෙහෙකරුවන්ගේ චෛර්යාවන් අනුගමනය නිසා මන්ද බුද්ධික තත්ත්වයට පත්විය හැකියි. ඊට හේතුව කුඩා දරුවන් ඉතා ඉක්මනින් ඕනෑම හැසිරීමක් ග්‍රහණය කර ගන්නා නිසාවෙනි.
රැකියාවට යන දෙමාපියන්ට ලබාදිය හැකි පණිවිඩය කුමක්ද? තමන්ට ඉඩක් ලැඛෙන සුළුවෙන් විවේකයකදී තමාගේ දරුවා පිළිබඳව සොයා බලන්න. හැකි සෑම විටෙකම ඔබගේ ආදරය දරුවාට ලබා දීමට කටයුතු කරන්න. ඒ වගේම ඇතැම් දරුවන්ට නැවතත් දෙමාපියන්ගේ සෙනෙහස කිසිසේත් ලබාදිය නොහැකි නම් (දෙමාපියන් මිය ගොස් නම්) ඒ දරුවා රටට වැඩදායී පුද්ගලයෙක් බවට පත් කිරීමට අවශ්‍ය සහයෝගයක් ලබාදීමට කටයුතු කළ යුතුයි. පිටරටවල දරුවන් දමා යන මව්පියන් ද තමාගේ දරුවාගේ වගකීම්, වගකිය යුතු පුද්ගලයෙකු වෙත භාරදී කටයුතු කිරීම ද ඉතා වැදගත්.
නුවන්ති කුලරත්න
උපුටා ගැනීම දිනමිණ
