ඊර්ෂ්‍යාවන්ත පෙම්වතෙක් පෙම්වතියක් හඳුනා ගැනීමේ සඥා කීපයක්.....
ආදරවන්තයන් තුළ ඇතිවිය හැකි ඊර්ෂ්‍යාව ගැන අපි ගිය සතියෙ කතා කළා. ඇත්තෙන්ම ඊර්ෂ්‍යාව කියන්නෙ මහා විනාශකාරී බලවේගයක්. ඊර්ෂ්‍යාවන්ත පෙම්වතෙක් පෙම්වතියක් එක්ක පී්‍රතිමත් ආදර ජීවිතයක් ගෙවන්න බෑ. ඊර්ෂ්‍යාවන්ත පෙම්වතෙක් පෙම්වතියක් කියන්නෙ හරිම හිසරදයක්. ඒ වගේ කෙනෙක් විවාහ කරගත්තොත් පසුවට යුගදිවිය ඉතාමත් අමිහිරි වෙන්න පුළුවන්. ඒ නිසා කෙනෙක් ඊර්ෂ්‍යාවන්ත පෙම්වතෙක්ව පෙම්වතියක්ව කළින්ම හොඳින් හඳුනාගත්තොත් ඔහු/ඇය පිළිබඳ තීරණයක් ගැනීමට ඒක රුකුලක් වෙන්න පුළුවන්. ඒ නිසා අපි අද ටිකක් කතාකරමු මොනවද ඊර්ෂ්‍යාවන්ත පෙම්වතෙක්ව හඳුනාගැනීමට ඉවහල්වෙන සංඥාවන් කියල. ඇතැම් කරුණු සමහරවිට ඊර්ෂ්‍යාවට කෙළින්ම අදාළයි. තවත් සමහර කරුණු ඊර්ෂ්‍යාවට සම්බන්ධයි කියල කෙළින්ම පේන දේවල් නෙමේ. නමුත් ඒ සංඥා කෙනෙක් තුළින් ඉස්මතුවෙනව නම් ඔහු/ඇය තුළ ඊර්ෂ්‍යාවන්ත පෙම්වතෙක් පෙම්වතියක් ඉන්නව වෙන්න පුළුවන්.
1. ඔබ කරන හැමදෙයක් ගැනම නිතරම ඔහුට/ඇයට තරහ යනවද? සමහරවිට ඔබ වරදක් කරලත් නෙමේ. කොහෙ හරි ගියත්, විනෝද වුණත්, හිනාවෙලා හිටියත් සමහරවිට හේතුවක් නැතුව වුණත් ඔබට නිතරම බණිනව නම් තරහවෙන් කතාකරනව නම් ඒක ඊර්ෂ්‍යාවේ විෂ ඔහු/ඇය තුළ සැඟවී තිබිය හැකි බවට සාක්ෂියක්.
2. වෙන කෙනෙක් ගැන කතා කරන එකට ඔහු/ඇය සතුටු නෑ වගේ පේනවද? කවුරුහරි එක පුද්ගලයෙක් ගැන තොරතෝංචියක් නැතුව කියවනව නම් ඒ ගැන අප්‍රසාදය පළකිරීම වෙනම දෙයක්. ඒත් නිකමට හරි කාගෙ හරි හොඳ ගති ගුණයක් ගැන කිව්වොත් කළ උදව් ගැන හෝ යම් කෙනෙක්ගේ පෞරුෂය ගැන වගේ යමක් ගැන කිව්වොත් ඔබේ පෙම්වතා/පෙම්වතිය ඒ ගැන අපහසුතාවයකට අසතුටකට පත්වෙනව වගේ ඔබට දැනෙනව නම් ඔහු/ඇය තුළ ඊර්ෂ්‍යාව තිබෙනවා විය හැකියි බොහෝ විට.
3. ඔබේ ගමන් බිමන් වුවමනාවට වඩා සෙවිල්ලෙන් ඉන්නවද? හැම තිස්සෙම යන එන ගමන් ගැන ඔහු/ඇය විපරම් කරනවද? හැම තිස්සෙම කොහෙද ඉන්නෙ, කා එක්කද ඉන්නෙ, වටපිටාවේ කවුද ඉන්නෙ මොනවද කරන්නෙ, කීයටද එන්නෙ වගේ දේ ගැන ප්‍රමාණය ඉක්මවා හොයනව නම් ඔහු/ඇය තුළ ඊර්ෂ්‍යාව තිබෙනවා විය හැකියි. සාමාන්‍යයෙන් තම පෙම්වතිය/පෙම්වතා යන එන තැන් ගැන විමසීම වරදක් නෙමේ. ඒත් ඒ දැනගැනීම පිණිස මිසක් සැකයකට නොවිය යුතුයි. ඒත් සැරෙන් සැරේ ‘කෝල්’ කර කර ඔබෙනුයි තවත් අයගෙනුයි ඔබ යන එන තැන්, කරන කියන හැමදේම නූලට දැනගන්න විශාල ප්‍රයත්නයක් දරනව වගේ පේනව නම් ඔහු/ඇය ඊර්ෂ්‍යාව හිතේ නළියන කෙනෙක් විය හැකියි.
4. ඔබේ පැරණි පෙම්වතාගෙ පෙම්වතියගෙ ලිපියක්, ඡායාරූපයක් හෝ තෑග්ගක් වැනි දේ ඔබ ළඟ තිබුණොත් ආවේශවෙලා වගේ ඒ ගැන කෑගහනව නම්, ඒත් නැත්තං ඒ ගැන තරහවෙන් කතාකරනව නම් ඒවා විනාශකරන්න කියල බලකරනව නම් සමහරවිට ඔබේ පෙම්වතා/පෙම්වතිය ඊර්ෂ්‍යාවෙන් පීඩා විඳිනවා විය හැකියි. සමහර පෙම්වතියන්/පෙම්වතුන් කලින් ආදරවන්තයෙක් හිටිය නම් ඊට අදාළ පුංචි සිහිවටන ඡායාරූප තෑගි දුන් පොතක් වගේ දේවල් තාමත් ඉතිරිව තියෙන්න පුළුවන්. ඒත් ඒවා බොහෝ විට ඔබේ වර්තමාන පෙම් සබඳතාවට කිසිසේත්ම තර්ජන නොවෙයි. සමහරුන්ට ඒවා තිබුණට ඒ ගැන ගාණක් නිනව්වක්වත් නෑ. සමහර පෙම්වතුන්/පෙම්වතියන් ඒ වගේ දෙයක් දැක්කත් හිනාවෙලා නිකං ඉන්නව. “ආ පරණ ආදරවන්තයගෙ සිහිවටන තාම තියනව නේද?” වගේ දේ කියල සමහරු විහිළු කරනව වෙන්නත් පුළුවන්. අවංකවම එහෙම හිතන අය තුළ ඊර්ෂ්‍යාවක් නෑ බොහෝවිට. ඒත් පුංචි දෙයක් දැක්කත් ආවේගශීලීවෙන පෙම්වතෙක්/පෙම්වතියක් නම් ඔබට ඉන්නෙ, ප්‍රවේසමෙන්.
5. ඔබට කවුරු හරි ලස්සනයි කිව්වොත්/කඩවසම් කිව්වොත් ඒ ගැන ඔබේ පෙම්වතා/පෙම්වතිය ඇත්තෙන්ම සතුටු විය යුතුයි ආඩම්බර විය යුතුයි. එහෙම නේද? ඒත් ඊර්ෂ්‍යාවන්ත අය එහෙම නෙමේ. තම පෙම්වතියට කවුරුහරි ලස්සනයි කිව්වොත් (විශේෂයෙන් විරුද්ධ ලිංගික පක්ෂයෙ කෙනෙක් කිව්වොත්) ඔහු/ඇය සමග වෛර බඳින්නත් පුළුවන්. බොහෝ විට කෙනෙක් කාවහරි අගය කරන්නෙ හැඩ රුව හෝ දක්ෂතා දැකල. හොඳයි හැඩයි කියන්නෙ සැබෑ ලෙන්ගතුකමකින් මිසක් ඔහු/ඇය එක්ක පෙම් සබඳතා ඇතිකරගන්න නෙමේ. ඒත් සමහර පෙම්වතුන් තමන්ගෙ පෙම්වතිය/පෙම්වතා ගැන කවුරුවත් එහෙම හොඳ කියනවට කැමති නෑ. ස්ථීරවම ඊර්ෂ්‍යාවේ සංඥාවක් ඒක.
6. වෙනත් පෙම්වතුන්ගෙ පී්‍රතිමත් යුග දිවිය ප්‍රේම සම්බන්ධය ගැන සතුටුවෙන්න සමහරුන්ට බෑ. ඒ අය දිහා බලල ආදර්ශයක් ගන්නව වෙනුවට ඒ අයගෙ වැරදි මොනවහරි දකින්නම තමයි බලන්නෙ. අනිත් අතට කවුරු හරි දෙන්නෙක් විරසක වෙලා නම්, අපහසුතාවන්ට කරදරවලට මූණපාල ඉන්නව නම් සමහර විට ඒ ගැන හිත යටින් සතුටු වෙනව. ඒ විදිහෙ ගති ලක්ෂණ ඔබේ පෙම්වතා/පෙම්වතිය තුළින් ඔබ දකිනව නම් ඔහු/ඇය ඊර්ෂ්‍යාවන්ත පෙම්වතෙක්/පෙම්වතියක් වෙන්න බැරිකමක් නෑ.
7. ඔබේ මිතුරන්ට මිතුරියන්ට ඔහු නිතරම අවලාද කියනව නම් ඒකත් ඊර්ෂ්‍යාවේ සැඟවුණු සලකුණක්. මොන තරම් හොඳ මිතුරු මිතුරියන් ඔබට හිටියත් මොකක් හෝ වරදක් ඔවුන් ගැන කියන්න ඔබේ පෙම්වතාට/පෙම්වතියට තියන බව දිගින් දිගටම ඔබට පේනව නම් ටිකක් හිතන්න ඔබට කාලෙ ඇවිත්. ඔබ මිතුරන් ඇසුරුකරනවට, ඒ අය එක්ක විහිළු තහළු කරනවට, දුරකථනයෙන් සුහද සාමීචියක යෙදෙනවට ඔබේ පෙම්වතා/පෙම්වතිය නිතරම අවලාද කියනව නම් ඒ ඊර්ෂ්‍යාවෙන් ඔහුගෙ හිත පිරිලා නිසා වෙන්න පුළුවන්.
8. සාදයක් වගේ දේකදී ඔබ ගැන අසීමිතව සැලකිලිමත් වෙනවද? ඒ කියන්නෙ සමහරු පාටියකට මඟුල් ගෙදරකට වගේ සුහද අවස්ථාවකට ගියාම හැමතිස්සෙම බලන්නෙ තමන්ගෙ පෙම්වතිය/පෙම්වතා කා එක්කද කතා කරන්නෙ, ඒ කතා කරද්දී මූණෙ ඉරියව් මොනවද, කතා විලාශය කොහොමද වගේ දේ ගැන. සැරෙන් සැරේ ‘කන්න වගේ’ බලනව. ඒ විතරක් නෙමේ කවුරුහරි කෙනෙක් තම පෙම්වතා/පෙම්වතිය දිහා බලනවද කියලත් බලනව. යන්තං හරි බලනව දැක්කොත් ඒ මිනිසුන් දිහාත් හොර පූසෙක් වගේ බලනව දිගටම තම පෙම්වතිය/ පෙම්වතා දිහා බලනවද කියල තහවුරු කරගන්න.
මේ ඊර්ෂ්‍යාව තියන අයගෙ හැසිරීම් රටාවක්. මේවා ඇතුළු තව බොහෝ කරුණු තියෙන්න පුළුවන් ඊර්ෂ්‍යාවන්ත පෙම්වතෙක්/පෙම්වතියක් හඳුනාගන්න. ඉතින් මේ සංඥා ගැන සැලකිලිමත්වෙන්න. ඔබ ඔබේ පෙම්වතාට/පෙම්වතියට ආදරේ නම් මෙවැනි සංඥා ඔබ දැක්කොත් ඒ ගැන විවෘතව කතාකරන්න. ඔබ හිත වෙනස් නොවන කෙනෙක් නිසා ඒ ගැන හිත කරදර කර නොගත යුතු බව පහදාදෙන්න. ඒත් දිගින් දිගටම මේ සංඥා, මේ හැසිරීම් රටා ඔහු/ඇය තුළ ඔබ දකිනව නම් ඔහු/ඇය සමග යුග දිවියක් ගෙවීම ගැන නැවත සිතා බලන එක හොඳයි. ආදරය නිදහසේ සතුටින් අත්විඳිය යුතු දෙයක්. ඊර්ෂ්‍යාකාර පෙම්වතෙක්/පෙම්වතියක් එක්ක ඒ ප්‍රීතිමත් අත්දැකීම ලබන්න හැකියාවක් නැති බවත් ජීවිතය එකම අවුලක් විය හැකි බවත් මතක තියාගන්න.
(මයිකල් ඇන්ජලෝ )
උපුටා ගැනීම ලක්බිම
