තමන් පෙම් කළ තරුණියගේ ඡායාරූප විකෘති කර ෆේස්බුක් එකට දැමූ තරුණයකුට කාලි මෑණියන් දුන් දඬුවම්
අනුන්ට නින්දා අපහාස කිරීම විනෝදාංශයක් බවට පත්කරගන්නා පිරිස් සමාජයේ එමටය. අනුන්ගේ සිත් රිදවා වේදනාවට පත්කොට ඔහුගේ හෝ ඇයගේ සුසුමක කඳුළ සිනහවක් බවට පත් කරගන්නා පුද්ගලයන්ගේ සිනහවට විනෝදාස්වාදයට ආයුෂ නොමැති බව සමාජය තුළ දිගහැරෙන ඇතැම් සිද්ධීන්වලින් මනාව පැහැදිලි වූ අවස්ථා සුලබය. එවැනි අන්දමේ මන්ද මානසික පුද්ගලයන් අනුන්ට අපහාස කිරීමට යොදා ගන්නේ අන්තර්ජාලයේ ෆේස්බුක් බව ඒ වටා ගෙතී ඇති කතාවලින් සනාථ වී තිබේ. ෆේස්බුක් හරහා අනුන්ට අපහාස කරන්නන් නීතියේ රැහැනට හසුවුණ අවස්ථා ඇතත් ස්වභාව ධර්මයෙන් සහ කාලි මෑණියන්ගෙන් ලැබෙන දඬුවම බලවත් බව හලාවත මහා භද්‍රකාලි අම්මාන් කෝවිලේ මහේන්ද්‍ර සාමි පවසයි. පාසල් වියේ සිට බැඳි පෙම්දම ස්ථිර යුගදිවියකින් අවසන් කරන නව යොවුන් තරුණ තරුණියන්ගේ ඡායාරූපවලට ෆේස්බුක් හරහා වෙනත් ඡායාරූප අසභ්‍ය ලෙස බද්ධ කිරීම නිසා විවාහ ජීවිත කඩාකප්පල් වේදනා විඳින පිරිස් මේ දිනවල කාලිකෝවිලට බහුලව පැමිණෙන බව මහේන්ද්‍ර සාමි පැවැසීය. එවැනි තරුණ තරුණියන්ගේ දුක, වේදනාව, කඳුළු හඳුනන කාලි මෑණියන් ඔවුන්ට වින කළ අය කාලි මෑණියන්ගේ අවතාර හරහා දඬුවමට ලක්කිරීමට වැඩි දිනක් ගත නොකරන බවද මහේන්ද්‍ර සාමි පැවැසීය. රූමත් තරුණියක තමන් සතුකර ගැනීමට නොහැකි වූ තැන ඒ තරුණියගේ විවාහය ෆේස්බුක් මඟින් කඩාකප්පල් කර ලැබූ වින්දනය වැඩිකලක් නොගොස් ඔහුටම පෙරළා පැමිණි සිද්ධියක සැඟවුණ කතාව කියන්නට මෙවරද කටහඬ අවදිකර සිටියේ හලාවත මුන්නේශ්වරන් මහා භද්‍රකාලි අම්මාන් කෝවිලේ මහේන්ද්‍ර සාමිය.
"මම මේ කියන තරුණිය කොළඹ ප්‍රදේශයේ සුප්‍රසිද්ධ ව්‍යාපාරික පවුලක තරුණියක්. ඒ පවුලේ එකම දියණිය වන මේ තරුණියව පාසල් වයසේ සිට ඇගේ මවුපියන් දෑස් මෙන් ආරක්ෂා කළා. ඇය පාසල් පවා යැව්වේ මෙහෙකාරියකගේ රැකවරණ යටතේ ගෙදර වාහනයෙන්. මේ තරුණියගේ රූප සම්පත්තියට ආශා කළ තවත් එම නිවෙස ආසන්නයේම තරුණයෙක් ඇයගේ ආදරය පතා ඇය නිවෙසින් පිටතට යද්දීත් ආපසු එද්දීත් ඇය දෙස බැලුම් හෙළන්නට පටන්ගෙන තිබුණා. ඒත් මේ තරුණිය ඒ කිසිවකට හසුවුණේ නැහැ. ඒ තරුණයා දුරකතන ඇමැතුම්වලින් වෙනත් රහසිගත මාර්ගවලින් මේ තරුණියගේ ආදරය පතා පෙම් හසුන් යැව්වත් ඒවා ඇය මවුපියන්ට පවා නොපෙන්වා ගිනි දෙවියන්ට පූජා කළා. ඇයගේ පාසල් ජීවිතය අවසන් වෙත්ම ව්‍යාපාරික මවුපියන් ඔවුන්ගේ ඥාති පුත්‍රයකුට මේ තරුණිය විවාහකර දෙන්න යෝජනා කර තිබුණා. මවුපිය බහට අවනත වුණ මේ තරුණිය ඒ තරුණයා සමඟ විවාහ ගිවිස ගැනීමට පෙර වසර කීපයක් ඔහුව ළඟින් ඇසුරු කරන්න වුණා. ඒ තරුණයා මේ ව්‍යාපාරික පවුල වගේම තවත් ව්‍යාපාරික පවුලක එකම පුත්‍රයා. මේ තරුණියගේ ආදරය ඉල්ලා පස්සෙන් ආව අසල්වැසි තරුණයා මවුපියන්ගේ බලකිරීම මත තරුණියක සමඟ විවාහ වුණා. ඒත් එයාගේ හිත තවමත් බැඳී තිබුණේ මේ රූමත් ව්‍යාපාරික දියණියට. ඔහුගේ සිහිනය කිසි දිනෙක ඉටුනොවන බව ඒ අයට වැටහුණේ මේ රූමත් තරුණිය එයා විවාහ ගිවිසගෙන ඉන්න තරුණයා සමඟ වාහනයෙන් ගමන් බිමන් යන එක දුටුවිට. ඒක දුටු දිනයේ ඉඳන් මේ තරුණයා ඇයට වෛර කරන්න පටන් ගත්තා. ඇයගෙන් පළිගන්න ඔහු සැලසුම් කළා. ඒ තරුණයා තුළ තිබූ බලාපොරොත්තු සුන්වී යෑම මේ තරුණයාගේ ජීවිතයට කොතරම් බලපෑවද කියනවා නම් ඔහුගේ නිවෙසේ කටයුතු පවා සොයා නොබලා දරුවන්ගේ කටයුතු පවා පැහැර හැරියා. මේ තරුණයා අර රූමත් ව්‍යාපාරික තරුණියගෙන් පළිගන්න ෆේස්බුක් හරහා ඇයට අපහාස කරන්න පටන් ගත්තා. ඇගේ ඡායාරූපයක් පාසල් මිතුරකුගේ මාර්ගයෙන් සොයාගෙන ඒක අන්තර්ජාලයේ ෆේස්බුක්වලට බද්ධ කළේ තවත් අසභ්‍ය ඡායාරූපයක්ද යොදා ගෙන. ඒ විතරක් නොවෙයි, ඒ ඡායාරූපයට ගැළපෙන විදියට මේ තරුණියට අපහාස වන අන්දමේ වැකිද ෆේස්බුක් හරහා ප්‍රචාරය කරමින් ඇයට නින්දා අපහාස කළා. මේ ෆේස්බුක් අපහාස සිද්ධිය අර ව්‍යාපාරික තරුණිය සමඟ විවාහ ගිවිස ගැනීමට පොරොන්දු දී සිටින පෙම්වතාටත් අහන්න දකින්නට ලැබුණා. ඒ ගැන ඔහු සැක පහළ කළා. එහෙම සැකකරලා ඒ තරුණයා මේ තරුණියගේ ගෙදරට යන එන එකත් ටිකෙන් ටික අඩුකළා. කිසිවිටෙක මෙවැනි අපහාසයක් විද නැති අර ව්‍යාපාරික දියණිය එයාගෙ කාමරයට වැදිලා කඳුළු සලමින් දෙවියන්ට දුක කියන්න වුණා. මේ ෆේස්බුක් සිද්ධිය නිසා අර ව්‍යාපාරික දියණියගේ මංගල කටයුත්තත් නැතිව ගියා. මේ සිද්ධිය නිසා ඒ ව්‍යාපාරික පවුල් දෙක අතරත් හොඳ හිත පලුදු වී තිබුණා. යාම් ඊම්ද නතර වුණා. තම දියණියට ෆේස්බුක් හරහා අපහාස කළ තරුණයා ගැන සියලු විස්තර මේ මවුපියන් දෙන්නා දැන සිටියත් ඒ අය ඒ තරුණයා සමඟ ගැටුමකට ගියේ නැහැ. මේ සිද්ධිය නිසා බලවත් සිත් වේදනාවට පත්ව සිටිය අර සුප්‍රසිද්ධ ව්‍යාපාරිකයා එයාගෙ හිතවත් ව්‍යාපාරිකයකු සමඟ අපේ කාලි කෝවිලට ආවා. ඒ ඇවිත් එයාගෙ දියණියට සිදුවුණ දේත් ෆේස්බුක් හරහා ඒ අයගේ දියණියට සිදුවූ දේත් පවුලට සිදුවුණ අපහාසයත් මම ළඟට ඇවිත් විස්තර කරල කාලිමෑණියන් ඉදිරියට ගිහිං ඒ අවනඩුව කියා පිහිටක් අයැද කෝවිලේ පළිගැහුවා. ඒ අය කාලිමෑණියන්ට පුද පූජා දීලා ආපසු ගියේ කාලිමෑණියන් කෙරෙහි හරිම විශ්වාසයකින්. භක්තියකින්. ඒ ගිහිං දින 21ක් ගියේ නැහැ ෆේස්බුක් හරහා අර ව්‍යාපාරික දියණියට අවමන් කළ ඒ අයගෙ විවාහය කඩාකප්පල් කළ නිවෙස ආසන්නයේ ඉන්න ව්‍යාපාරික පුතුගේ පවුලේ අය අතර අසමගිකම් ඇති වුණා. එයාගෙ බිරිය දරුවන් සමඟ එයාගෙ මවගෙ නිවෙසට යන්න ගියා. ඒ ව්‍යාපාරික තරුණයා බේබදු සමාජයට එකතුවෙලා උදේ සවස යහළුවන් සමඟ මත්පැන් පානයට ඇබ්බැහි වුණා. ඔහු යහළුවන්ගේ ගෙවල්වල නවාතැන් ගනිමින් තැනින් තැන රස්තියාදු වෙන්න පටන් ගත්තා. ඒ ව්‍යාපාරික පුතුගේ මවුපියනුත් තම එකම පුතු ගැන කලකිරිලා ඕස්ට්‍රේලියාවේ පදිංචියට ගියා. මේ තරුණයා ජීවිතය කලකිරුණ පිස්සෙක් වගේ ඇවිදිමින් ඉඳලා රෝගියෙක් වෙලා හදිසියේ මහ මඟ මියගියා. අනුන්ට අපහාස උපහාස කරමින් ඒ අයගේ අනාගතය විනාශ කරන්න සැරසෙන පුද්ගලයන් කාලිමෑණියන්ගේ උදහසට ලක්වීම අනිවාර්යයෙන්ම සිදුවන බව මෙයින් ඔප්පු වෙනවා.
උපුටා ගැනීම මව්බිම
