ඔබේ දරුවාටත් ලිංගිකත්වයේ දොරටුව විවර නොවීමට නම්....
ලිංගිකත්වය අද සමාජයේ බහුල ලෙස ව්‍යාප්ත වී ඇත. වෙළෙඳ ප්‍රචාරණයේ සිට ස්ත්‍රී දූෂණ පිළිබඳ පුවත්වලට මාධ්‍ය මගින් ප්‍රමුඛත්වය ලබා දීම දක්වා විවිධ සංසිද්ධීන් මගින් මෙම පැතිරීම වටහා ගත හැක. නමුත් මෙවැනි දේවල් මගින් කුඩා දරුවන්ට ඇතිවන බලපෑම් සම්බන්ධයෙන් දෙමාපියන් දැනුවත් වීම ඉතා වැදගත්ය. පෙර පාසල් යන සිඟිති දරුවන් තම දෙමාපියන්ගේ විවිධාකාර වූ පෞද්ගලික හැසිරීම් පිළිබඳව තම පෙර පාසල් මිතුරු මිතුරියන් හා ගුරුවරියන් සමග පවසා ඇති අවස්ථා නැතුවා නොවේ. ඇත්තෙන්ම මෙසේ සිදු වන්නේ දෙමාපියන්ගේ නොසැලකිලිමත්කම නිසාමය. වැඩිහිටියන්ගේ එම හැසිරීම් පිළිබඳව දරුවා නොදනී. දරුවාට නොඇසේ නොපෙනේ නැතහොත් නොවැටහේ යැයි සිතා සමහර වැඩිහිටියන් තම විවාහක සතුට භුක්ති විඳින අවස්ථා සුලබය. ඇතැම් විට දරුවාට නින්ද ගොස් ඇතැයි දෙමාපියන් සිතුවද දරුවා අවදි වී දෙමාපියන්ට නොදැනෙන ලෙස එය නිරීක්ෂණය කිරීමට පුළුවන. ළමා වයස ස්වභාවිකවම කුතුහලය දනවන වයසයි. සිඟිති දරුවනට මෙය කුතුහලය ඇති කරවන කරුණක් වන අතර ඔවුහු මෙම අමුතු දර්ශන තම මනැසින් ග්‍රහණය කර ගනිති. අනතුරුව දරුවෝ මේ පිළිබඳව පෙර පාසල් ගුරුවරියන්ට පවසති. එවිට පෙර පාසල් ගුරුවරියන්ට දෙමාපියන් සමග මේ පිළිබඳව කතා කොට අවවාද කිරීමට සිදුවන අවස්ථාද නැතුවා නොවේ. ඇතැම් විට දරුවන්ගේ චර්යාවන්වල වෙනස්වීම්වලටත් මෙවැනි දේ හේතුවීමට පුළුවන. තැන්පත්ව සිටින දරුවන් කලහකාරී ලෙස හැසිරීමත්, ක්‍රියාශීලී දරුවන් ඉතා උදාසීනව හැසිරීමත් මේ සඳහා උදාහරණ ලෙස පෙන්වා දිය හැකිය. එහෙත් ඇතැම් විට ඊට හේතුව හෙළි නොවී තිබිමට පුළුවන.
අද අන්තර්ජාලය හරහා ඕනෑම අයකුට ලිංගික හැසිරීම් සහිත දර්ශන දැක ගැනීමට හැකි බව නොරහසකි. අන්තර්ජාලයට පිවිසීමේ පහසුකම් සහිත ජංගම දුරකථන අද ඉතා ජනප්‍රියය. එම නිසා බොහෝ දෙනකු අතැති ජංගම දුරකථනවලද මේවා ගබඩා වී තිබෙන බව පැහැදිලිය. සමාජය පුරාම මේවා ව්‍යාප්ත වීමට එය එක හේතුවකි. අද බොහෝ කුඩා දරුවෝද පරිගණකය සමග කාලය ගත කරති. මෙය බොහෝ මාපියන් ගැටලුවක් කර නොගන්නේ දරුවා එක තැනක රැඳී සිටීම තම වැඩ කටයුතු කර ගැනීමට පහසු බැවිනි. ඒ අතර තවත් අයගේ අදහස වන්නේ අනෙක් සියලුම විෂය දැනුම හා බාහිර දේ (ක්‍රීඩා ආදී) මෙන්ම පරිගණක දැනුමද දරුවන්ට අවශ්‍ය නිසා කුඩා කාලයේ සිටම පරිගණක භාවිතයට හුරුවීම හොඳ බවය. නමුත් මේ සඳහා ඇබ්බැහිවීම කිසිසේත්ම සුදුසු නැත. විශේෂයෙන්ම අන්තර්ජාලය ඔස්සේ ලිංගිකත්වය ලුහුබැඳ යාමට දරුවන් හුරු වුවහොත් මෙය කොතැනින් කෙළවරවේ දැයි සිතා ගැනීමටද අපහසුවේ. මේවා හරහා දකින දේ නිසා දරුවන් තුළ කුතුහලය ඇතිවන අතර එ ගැන තව තවත් සොයා බැලීමටද උනන්දුවේ. මක්නිසාද වත්මන් වැඩිහිටියන්ට සාපේක්ෂව කුඩා දරුවන්ගේ පරිගණක සාක්ෂරතාව ඉහළ මට්ටමක පවතින බැවිනි. ඒ අනුව එලෙස නිරතුරුව අන්තර්ජාලය ඔස්සේ ලිංගිකත්වය ලුහුබඳින දරුවන්ගේ මොළයේ ෙජෙව රසායනිකයන් ඒ ආකාරයට හැඩ ගැසෙන අතර ළමයින්ට එවැනි දර්ශන හා ශ්‍රවණ (දකින ඇසෙන දේ) ධරණය නැතහොත් ධාරණය කරගත හැකි නොවේ.
දරුවන් පරිගණක භාවිතයට හුරු වූ පසු එයින් මුළුමනින්ම මුදවා ගැනීම අපහසු වුවත් එබඳු ලිංගික දර්ශන සීමා කිරීමට පුළුවන. බොහෝ මාපියෝ ඒ සඳහා මුර පදයක් යොදා ගනිති. එවිට පරිගණකය ක්‍රියාත්මකවීමට නම් මුර පදය සටහන් කළ යුතුයි. අන්තර්ජාල සේවා සපයන ආයතන හරහාද මෙය කළ හැකිය. එක් එක් වබේ අඩවිවලට පැමිණීම අවහිර කිරීමටද මෙම ක්‍රමයම භාවිතා කළ හැකිය. ඒ අනුව අනවශ්‍ය වබේ අඩවිවලට පිවිසීම වැළැක්වීම සඳහා අන්තර්ජාල සේවා සපයන ආයතන සමග කතා බහ කිරීමෙන් අනවශ්‍ය වබේ අඩවි සඳහා පිවිසීමට ඇති ක්‍රියාමාර්ග අවහිර කිරීමට ඔබට දැනුවත්වීමට පුළුවන. ඒ අනුව බිය සැක නොමැතිව පරිගණකය භාවිතා කිරීමට දරුවන්ට අවස්ථාව ලබාදීමට පුළුවන. කෙසේ වෙතත් ලිංගික දර්ශන දැකීම ඒ පිළිබඳව ග්‍රහණයවීම දරුවන්ගේ නොවැඩුණු මනැසට ඉතාම අහිතකර බව මාපියන් විසින් මතක තබා ගත යුතුය. එම නිසා නිවසේදී දරුවන් ඉදිරියේ තම හැඟීම් පාලනය කර ගැනීම ඉතාම අවශ්‍යය. ඒ අතරම පරිගණක භාවිතයෙන් අන්තර්ජාලය හරහා මේ පිළිබඳව දරුවන් දැන ගැනීම ඉතාම අහිතකර බැවින් ඉහත සඳහන් කළ පරිදි ඒ සඳහා ඇති උපක්‍රම භාවිතා කර ඒවා නැරඹීමෙන්ද දරුවන්ව වැළැක්වීමට මාපියන් දැනුවත් විය යුතුය.
ශ්‍රී ලංකා පරිගණක හදිසි ප්‍රතිචාර සංසදයේ රොෂාන් චන්ද්‍රගුප්ත මහතාට අපගේ විශේෂ ස්තූතිය.
ජලදිනී සේනානායක පෙර පාසල් ඩිප්ලෝමා ශ්‍රී ලංකා විවෘත විශ්ව විද්‍යාලය
උපුටා ගැනීම ලක්බිම
