පරිගණක පරිහරණයේ ජීවිත අනතුරු
එදා වගේ නෙවෙයි අද කාන්තාව එදිනෙදා ජීවිතේදී බොහෝ ක්‍ෂේත්‍ර එක්ක කටයුතුකරනවා. ඒ හින්දම පිරිමින්ටත් වඩා වේගයෙන් දැනුම හොයාගෙන යන්න වෙනවා. එහෙම නැති වුණොත් ඔබ පරාදයි. හැබැයි එහෙම පැරැදෙනවට වඩා හොඳයි ඒ ඉස්සරහට යන්න උදවු කරන තාක්‍ෂණය ගැන දැනගන්න එක. තාක්‍ෂණය ගැන කතා කරනකොට සමහර කෙනෙක්ට බයක් චකිතයක් දැනෙනවා වැරැදියට පාවිච්චි කළොත් ඕනෑම හොඳ දෙයක් වුණත් භයානක වෙන හින්දා. තාක්‍ෂණය ගැනත් නිවැරැදිව දැනුවත් වෙන එක නම් කවුරු කීවත් කාලීන අවශ්‍යතාවක්. පරිගණකය තාක්‍ෂණයත් එක්කම එකට යන දෙයක් කියලා හැමෝම දන්නවනෙ. ගෙදර තියෙන Desktop Computer ලැප්ටොප්වල ඉඳලා mobile වෙනකල්ම තියෙන උපාංග මීට අයිති වෙනවා. බොහෝ වෙලාවට ඔබ පාවිච්චි කරන පෞද්ගලික පරිගණකය අනාරක්‍ෂිත එකක් බවට පත්වුණොත් තවත් අයකුට ඒ පරිගණකයේ තොරතුරුවලින් ඔබේ ජීවිතය අවුල් කරලා දාන්නත් පුළුවන්. එහෙම නම් ඒකට කරන්නත් දෙයක් තියෙනවා. ඒ තමයි මුර පදයක් (password) යෙදීම. මෙහෙම පාස්වර්ඩ් යොදන අයට අමතක වෙන තවත් දෙයක් තියෙනවා. තමන්ට සමීප නමක් එහෙමත් නැත්නම් "පාසලේ නම" වගේ ඉතා ලෙහෙසි මුරපද පාවිච්චි කරනවා. නමුත් එයින් පරිගණකයේ ආරක්‍ෂාව බිඳිලා යන්නත් පුළුවන්. ඒ හින්දා හොඳම දේ ඒ මුරපද යොදනකොට එය අකුරුත්, ඉලක්කමුත් මාරු කළ පදයක් බවට පත් කරන එක. මේ හින්දා ගෙදර ඉන්න ළමයින්ටත් අනෙක් අයටත් පරිගණකය පාවිච්චි කරනකොට ඔබෙන් විමසීමක් කරන්නම වෙනවා. ඒ වගේම සමහර කාන්තාවො තමන්ගෙ පෞද්ගලික පරිගණකය කාර්යාලයේ භාවිත කරන විට තවත් අයට හවුලේ පාවිච්චි කරන්න ඉඩ ලබා දෙනවා. computer එකේ ගිණුමක් පවත්වාගෙන යන කෙනෙක් නම් ඉන් log වෙලා නොහිටියොත්, අර පාවිච්චි කරන පුද්ගලයට ඒ සියලු තොරතුරු දැනගන්නත් ලැබෙනවා. ඊළඟට පරිගණක තිරය එල්ල වෙලා තියෙන ස්ථානය ගැනත් සැලකිල්ලට ගැනීමත් වැදගත්. නිවෙසේ පරිගණකයේ තිරය අසල්වැසි නිවෙසේ කාමරයක කවුළුවට එල්ල වෙලා තියෙනව නම් ඔය හරහා තවත් කෙනෙක්ට ඔයා ගැන හොයා ගන්න පුළුවන්. පුළුවන් තරම් පරිගණක තිරය ඔබ වෙත පමණක් එල්ල වෙලා තියෙනව නම් ඒ ප්‍රශ්නෙ ඇති වෙන්නෙ නෑ. යන්ත්‍රවලට මිනිසුන්ට වඩා ඉක්මනට ලෙඩ හැදෙන්න පුළුවන්. ඒ පරිගණකයට කාර්මික දෝෂයක් හැදුණොත් කාන්තාවො ගොඩක් කලබල වෙනවා. හැබැයි කරන්න තියෙන්නෙ නාඳුනන කාර්මිකයෙක්ගෙ සහාය පතන්න කෙළින්ම යනවට වඩා ඔබ, සොහොයුරෙක් හෝ මිතුරු පිරිමි පාර්ශ්වයක් ඔස්සේ ඒ තැනට පරිගණකය යොමු කරනවා නම් ඒ කාර්මික ශිල්පියාපරිගණකය ගැන ගොඩක් උනන්දු වෙලා එහි ඔබේ තොරතුරු සොයා ගන්න එක වළක්ව ගන්නත්පුළුවන් වෙන්නෙ ඔබටමයි.
නදීෂ නිර්මාණ හේරත්
මව්බිම
