ඒඩ්ස් - හර්පීස් ලෙඩටත් ආයුර්වේද ප්‍රතිකාර
වර්තමානයේ දී පමණක් නොව ඈත අතීතයේ සිටම සමාජ රෝග භීතිකාව මුළු ලොව පුරාම ව්‍යාප්ත වී තිබිණි. ආයුර්වේද වෛද්‍ය විද්‍යාවට අනුව සමාජ රෝග සම්බන්ධව පුරාණ ආයුර්වේද පොත්පත්වලද මේ සම්බන්ධව සඳහන් වේ. මෑත කාලයේ දී ලිංගාශ්‍රිත රෝග කීපයක් වැඩිපුර ව්‍යාප්ත වෙමින් පවතී. මේ අතරින් ඇතැම් රෝග,
- ඖෂධ මගින් නිට්ටාවටම සනීප කරගත හැක.
- ඖෂධ ප්‍රතිකාර මගින් පාලනය පමණක් කරගත හැකි වීම.
- තවමත් ඖෂධ වලින් නිට්ඨාවටම සුවකරගත නොහැකි වීම වශයෙන් බෙදෙයි.
ලිංගාශ්‍රිත සමාජ රෝග අද බහුල වීමට හේතු කීපයක් බලපායි.
- රෝගය සඳහා ප්‍රතිකාර ලබාගන්නා රෝගීන්ගෙන් බහුතරයක් වයස අවුරුදු 20 ත් අවුරුදු 40 ත් අතර වයස්වල පසුවන්නන් වීම.
- කාන්තාවන්ට වඩා වැඩි ප්‍රතිශතයක් පිරිමි පාර්ශ්වයෙන් රෝගවලට ගොදුරු වීම.
- මෙම රෝග වැළඳුණු බොහෝ පුද්ගලයන් රුකියාව සඳහා නිවසින් පිට ප්‍රදේශයක හෝ වෙනත් රටක දිගු කාලයක් ජීවත් වූ පුද්ගලයන් වීම.
- බොහෝ පුද්ගලයෝ මෙම රෝගවාහකයකු ලෙස සිටිමින් රෝගය සමාජය තුළ ව්‍යාප්ත කිරීමට උත්සාහ ගනිති. එයට ප්‍රධාන හේතුව වන්නේ ඔහු හෝ ඇය තුළ සමාජය පිළිබඳව හෝ සමාජයේ වෙසෙන පුද්ගලයන් පිළිබඳව හටගන්නා දැඩි වෛරයයි.
- රෝග පිළිබඳව අවබෝධයක් නොමැතිකමින් තවත් කෙනකු සමඟ ලිංගිකව එක්වීමක් තුළින් ද මෙම රෝග වැළඳිය හැක.
- විශ්වාසවන්ත කෙනකුගෙන් තොරව වෙනත් කෙනකු සමඟ ලිංගිකව ඒකවීමෙන් මෙම තත්ත්වයට පත් විය හැක.
- අද වෙද්දී සමාජයේ බහුලව පවතින ප්‍රධානතම සමාජ රෝග වන්නේ ඒඩ්ස් සහ හර්පීස්ය.
- මිනිසුන් තම ජීවිතයේ පවතින ආර්ථික සහ මානසික පීඩනයෙන් තාවකාලිකව අත්මිදීමට නොයෙකුත් ඇසුරු කරා යොමුවෙති. ඇතැමුන් තම පීඩනයෙන් මිදීමට ලිංගිකත්වයේ පිහිට පතති. ඔවුහු ගණිකා ඇසුර සහ වෙනත් ලිංගික ඇසුර කරා යොමුවෙති.
- මෙවැනි රෝගයන්ට ගොදුරු වූ බොහෝ රෝගීහු එයින් අත්මිදීමට උත්සාහ නොගනිති. එමෙන්ම සමාජයේ වසන් වී රෝගය ව්‍යාප්ත කිරීමට උත්සාහ ගනියි. නූගත්කම හා දරිද්‍රතාවය ද මෙම රෝග බහුල වශයෙන් ඇතිවීමට හේතු වේ.
රෝගය හඳුනාගැනීම :
මිනිසුන්ගේ ස්වභාවිකව පවතින ප්‍රතිශක්තීකරණය හීනවන අවස්ථාවක් ලෙසින්
ඒඩ්ස් රෝගය හැඳින්විය හැක. මෙය වෛරස රෝගයකි. මෙම රෝගය වැළඳුණු විට ශරීරයට
ඇතුළු වන ඕනෑම විෂබීජයකට ශරීරය විනාශ කිරීමේ හැකියාවක් ඇත. ඒඩ්ස් රෝගීන්
බොහෝමයක් මරණයට පත්වන්නේ රෝගයෙන් ප්‍රතිශක්තීකරණය හීනවීම නිසා පෙනහළු
ආශ්‍රිත රෝග හෝ නිව්මෝනියා ආශ්‍රිත රෝග හේතුවෙනි. එවැනි රෝග තත්ත්වයන්
නිට්ඨාවටම සුව කරවීමට ලොව තවමත් දියුණු ප්‍රතිශක්තියක් සොයාගෙන නැත.
හර්පීස් රෝග තත්ත්වය අද වෙද්දී බහුල වශයෙන් සමාජය තුළ පවතී. එම රෝග තත්ත්වය එක්වර හඳුනා ගැනීමට අපහසු වේ. හර්පීස් රෝගය සඳහා ද බටහිර වෛද්‍ය ක්‍රමයට පාලනය කර ගැනීමට ප්‍රතිකාර ලබාදුන්නද නිට්ඨාවටම සුවකරගත හැකි ප්‍රතිකාරයක් අදටත් නොමැත. හර්පීස් රෝගවාහකයෝ ද සමාජය තුළ බහුලව සිටිති. ඔවුන් සමාජය තුළ නිරෝගී පුද්ගලයන් ලෙසින් ජීවත් වූවත් හර්පීස් රෝගවාහකයන් ලෙස අනතුරැදායක ජීවිත ගත කරති.
රෝග ලක්ෂණ
හර්පීස් :
- ලිංගාශ්‍රිත ප්‍රදේශවල තුවාල ඇතිවීම.
- ඒ ආශ්‍රිතව අධික දැවිල්ල සහ රතු පැහැයට තුවාල කැළැල් පැවතීම.
- ඉඳහිට ඇතිවන අධික හිසරදය
- උණ
- ඇතැම් විට රෝගියාගේ මුඛය ආශ්‍රිතව ද තුවාල ඇතිවීම.
- මෙවැනි තුවාල ටික කලකට පසුව සුව වී නැවත ඇතිවීමට ද පුළුවනි.
- තුවාල ආශ්‍රිතව තදබල ලෙස පවතින කැසීම.
- රුධිරයට අමතරව සැරව තුවාල ආශ්‍රිතව තැන්වලින් පිටවීම.
- මෙවැනි රෝග ලක්ෂණ වෛද්‍ය පරීක්ෂාවකින් පසුව නිට්ඨාවටම රෝගය හඳුනාගත හැක.
ඒඩ්ස් :
ඒඩ්ස් රෝගීන්ගේ රෝග ලක්ෂණ පහළ වෙද්දී රෝගය බොහෝ විට ව්‍යාප්ත වී හමාරය. ඇතැම් විට ඒඩ්ස් රෝගය හඳුනාගනිද්දී රෝගවාහකයකු ලෙසින් තවත් බොහෝ ජීවිත අනතුරට පත් කර හමාරය.
- රෝගියාගේ ප්‍රතිශක්තීකරණය හීනවෙද්දී ශරීරය දුර්වල වේ.
- ශරීරය දුර්වර්ණ වේ.
- අධික ලෙස තෙහෙට්ටුව දැනේ.
- චර්ම රෝග ඇති වේ.
- නිතරම උදරය ආශ්‍රිත රෝග ඇති වේ.
- හිසකෙස් ගැලවී යයි.
- මුහුණේ පිරිපුන් බව නැති වී යයි.
- කෑම අරුචිය ඇති වේ.
ප්‍රතිකාර :
පෙර සඳහන් කළ පරිදි මේ සඳහා නිට්ටාවටම සනීප කරගත හැකි ප්‍රතිකාර දැනට
සොයාගෙන නැත. විශේෂයෙන් ඒඩ්ස් රෝගය සඳහා ප්‍රතිකාරවලින් නිට්ඨාවටම රෝගය
සුවකරගත නොහැක. නමුත් ලිංගික සම්බන්ධතා ඇතිකරගනිද්දී විශ්වාසවන්ත කෙනකු සමඟ පමණක්
ලිංගිකව එක්වීම මගින් මෙම සමාජ රෝග බොහෝමයකින් වැළකිය හැක. අනාරක්ෂිත
ලිංගික එක්වීමෙන් අවසානයේ දී ජීවිතය පුරාවටම රෝගියකු වීමේ ප්‍රතිශතය ඉතා
වැඩිය. රජයේ රෝහල් තුළින් රෝගය හඳුනාගෙන ආයුර්වේද ප්‍රතිකාර ලබන රෝගීහු ද බහුල වශයෙන් සිටිති. ආයුර්වේද ප්‍රතිකාර මගින් ප්‍රතිශක්තීකරණය වැඩිදියුණු කරගත හැක. ආයුර්වේද වෛද්‍ය ප්‍රතිකාර මගින් නිරෝගී පුද්ගලයන්ගේ නිරෝගීකම ආරක්ෂා
කෙරේ. රෝගී පුද්ගලයා එයින් මුදවා ගැනේ. මෙම සංකල්පයේ සිට මෙවැනි රෝගීන්ගේ
ශරීර ප්‍රතිශක්තීකරණය වැඩිදියුණු කිරීම හෙවත් ලෙඩවලට ඔරොත්තු දීමේ හැකියාව
වැඩිදියුණු කිරීමට ආයුර්වේදයේ මේ සඳහා ප්‍රතිකාර කෙරේ.
නැතිවෙන ප්‍රතිශක්තීකරණය නැවත රෝගියාට ලබාදීමට ආයුර්වේද ඖෂධ සමත් වේ. ඒ සඳහා රසායනික ප්‍රතිකාර, ඖෂධ ප්‍රතිකාර වැනි ප්‍රතිකාර ආයුර්වේදයේ සඳහන් වේ. ශරීර ශක්තිය නොසැලී පවත්වාගෙන යාමට මෙම ආයුර්වේද ප්‍රතිකාරවලින් සමත් වේ. මානසික විවේකය හා හිත නිරවුල් බව ඉතා වැදගත් වේ. විශේෂයෙන් ජීවිතයට සිදු වූ එක් සිදුවීමක් හේතුවෙන් මුළු ජීවිත කාලයම විඳවා පලක් නැත. එබැවින් නැවත නැවතත් මෙවැනි අනාරක්ෂිත ලිංගික එක්වීමට නොගොස් පාලනය කරගැනීම ඉතා වැදගත් වේ. ඒඩ්ස්, හර්පීස් වැනි සමාජ රෝගයන් වැළඳුණු කිසිවිටකත් අන් අයට රෝගය බෝ කරන රෝගවාහකයකු නොවන්න. රෝගය නිට්ඨාවටම සුවකරගත නොහැකි වුවද රෝගය පාලනය කරගැනීමේ හැකියාව රෝගියා සතුව පවතී.
ආයුර්වේද වෛද්‍ය සුජීව විතානගේ
දේශය
