වෛරයේ විපාකය හෙවත් කේතු ගේ අපලය

අනුරුද්ධ මහ රහතන් වහන්සේගේ නැඟණිය රෝහිණී නම් විය. වරක්‌ අනුරුද්ධ හිමියන් දැකීමට නෑදෑයන් පැමිණි අතර ඒ අතර රෝහිණී නොසිටි බැවින් ඇය පිළිබඳව විමසන විට දැනගත්තේ ඇය දරුණු කුෂ්ඨ රෝගයකින් පෙළෙන බවයි. හිමියන්ගේ උපදෙස්‌ වූයේ ශාලාවක්‌ සාදා සඟසතුකොට පූජා කර සඟරුවනට උපස්‌ථාන කළ යුතු බවයි. එහි වියදම ඇයගේ කණ කර ආභරණ අලෙවි කොට කළ යුතු විය. ඒ අනුව ක්‍රියා කරන විට ඇයට කොපමණ බෙහෙත් කළත් සුවපත් නොවූ කුෂ්ඨ රෝගය සුවපත් විය. පසුව දානයට වැඩිය බුදුරජාණන් වහන්සේ කුෂ්ඨ රෝගයට හේතුව දන්නේ දැයි රෝහිණියගෙන් විමසා ඒ පිළිබඳව පැහැදිලි කරන ලදී. පෙර ආත්මයක ඇය රජ බිසවකව සිටි බවත් එම රජුගේ නාටිකාංගනාවක කෙරෙහි ඊර්ෂාවෙන් හා ක්‍රෝධයෙන් ඇයගේ යහනේ හා ඇඳුම්වල කසඹිලියා නම් වැල් වර්ගය පොඩි කර ආලේප කරන ලදුව ඒවා ගෑවී කසමින් වේදනා විඳින නාටිකාංගනාව දෙස බලා සතුටුවීමේ විපාකය, මේ ආත්මයේ කුෂ්ඨ රෝගය බවත් දේශනා කරන ලදී.

ඉහත කථාව, කර්මය, විපාකය හා එයින් ජයගත් අන්දම කදිමට විග්‍රහ කරයි. රෝහිණීට සෑදුණු ආකාරයේ කුෂ්ඨ, දද, හොරි ආදී සමේ රෝග සෑදෙන්නේ කේතු අපලයක දීය. තවද අඳුරට, මුල්ලට පැත්තකට තල්ලුවීම, පෝෂණ ඌනතා ඇතිවීම නිසා ඇඟ කෙට්‌ටුවීම, දුබලවීම, දුෂ්කර පළාත්වලට ස්‌ථානමාරු ලැබීම, සැකය, අවිශ්වාසය, ආත්ම ධෛර්යය හීනවීම, ඔත්පලවීම, ස්‌ත්‍රීන්ට සෑදෙන ඔසප් රෝග, මාස්‌ ශුද්ධිය ප්‍රමාද වීම, නින්දට බාධා පැමිණීම, නපුරු සිහින පෙනීම, අමනුෂ්‍ය ප්‍රේත දෝෂ ආදිය කේතු අපලයකදී පෙන්වන ප්‍රධාන ගති ලක්‍ෂණ වෙති. කුඩා දරුවන් කෑමට ප්‍රිය නොකිරීම, මාන්දම, ග්‍රහණිය වැනි රෝග කේතු හිමිවේ. “ඔළුව ලොකුයි, බඩ මහතයි, කෙහෙතුගෙ අපලේ” යෑයි පැරැණි කියමනක්‌ ඇත්තේ ද කේතු අපලය පිළිබඳවය. කුඩා දරුවන් කෙට්‌ටු වී බඩ මහත් වී මාන්දම නම් රෝග ලක්‍ෂණ පෙන්වයි. මේ සියල්ල කර්ම විපාක වශයෙන් ගෙන දෙන්නේය.

රාහුගේ ලක්‍ෂණවල සම්පූර්ණයෙන් ප්‍රතිවිරුද්ධ ගති ගුණ කේතු පෙන්වයි. රාහු ප්‍රසිද්ධ කරවයි. කේතු අප්‍රසිද්ධ කරවයි. සඟවයි. රාහු නිතර ඇවිද්දවයි. කේතු එකතැන සිටින්නට සිදුවන රෝග සාදයි. රාහු සිත එකඟ කරවීමට බාධා කරයි. කේතු ඉගෙනීමට පොළඹවයි. රාහු ඉනෙන් යට මනුෂ්‍ය ශරීරයක්‌ හා උඩ සර්පයකුගේ ශරීරයකි. කේතු ඉනෙන් උඩ මිනිස්‌ රූපයක්‌ හා යට සර්පයකු මෙන් ඇඳ ඇත්තේ ඉහත ගති ලක්‍ෂණ පෙන්වීමට ය. කේතු කරන එකම හොඳ නම් ඉගෙනීමට දක්‍ෂතා දීම පමණි. මේ හැර බොහෝ අපල කේතුගේ දශාවලදී ලබන බව පෙනේ. ඔබේ කේන්ද්‍රයේ කේතු තැන්පත්ව තිබිය යුත්තේ රාහු සිටින කොටුවේ සිට කොටු 7 ක්‌ දුරිනි. එහි පිssහිටීම විවිධ ප්‍රතිඵල පෙන්වයි.

පළමුවැනි කවයේ කේතු සිටින විට ආත්ම විශ්වාසය හීනවීම, සැකය, නෑදෑයින්ගෙන් කරදර ඇතිවීමට ද, විවාහය පිළිබඳ චිත්තපීඩාද යන අපල ඇති කරවයි.

දෙවැන්නේ කේතු ධන හානි වීමද, ඉතිරි කිරීම්වලට බාධා ද පමුණුවයි. මුහුණේ ලප කැලැල් ඇස්‌ වටේ කළු වීම, ආදි මුහුණේ ආකර්ශනීය බව නැති කරයි. කුඩා ළදරු අවස්‌ථාව නම් කතා කිරීමට ප්‍රමාද වීම හෝ ගොත බව ආදී රෝග ඇති කරවයි.

තුන්වැන්නේ කේතු බොහෝ දුරට ශුභඵල දෙයි. උත්සාහය, ධෛර්යය, මෙන්ම සැපවත් ජීවිතයක්‌ ගත කිරීමට අවශ්‍ය ශක්‌තිය ද ලබයි. සතුරන්ගෙන් ජය ලබන කෙනෙක්‌ වේ.

සතර වැන්නේදී උපන් ගමේ දියුණුව ලැබීමට නොහැකි වෙයි. මවු හෝ මුල් නෑයින්ගේ උපකාර නොලබයි. සැකයෙන් ජීවත් වෙයි. මුල් ගෙවල් ඉඩම් ආදිය ලැබෙන්නේ ඉතා බලවත් නම් පමණයි.

කේතු පස්‌වැන්නේ සිටින අයට දරුවන් ලැබෙන්නේ බොහෝ බලවත් නම් පමණි. දරුවන් නොලැබීමට හෝ හේතුවිය හැකියි. එහෙත් ඉගෙනීමට ශුභයි. බුද්ධිමතෙකු වේ.

හයවැන්න හෙවත් රෝගස්‌ථානයේ කේතු සිටින විට එම දශා කාලයේදී ඔත්පල විය හැකියි. සතුරු කරදර ඇති වේ. අධික වියදම් යෙදේ.

හත්වැන්න හෙවත් විවාහ ස්‌ථානයේ කේතු විවාහය ප්‍රමාද කරවන බව පෙන්වයි. විවාහය පිළිබඳ ගැටලු ද ඇති වේ. තමන්ට උදව් උපකාර කරන අය නැති වේ. ප්‍රජනන ඉන්ද්‍රියයන්ගේ රෝග හට ගනී.

අටවැන්නේ කේතු එම දශාවේදී බොහෝ අපල කරවයි. අමනුෂ්‍ය දෝෂ ඇතිවේ. බොහෝ කාලයක්‌ ඔත්පලව සිට මරණයට පත්වීම, අර්ශස්‌ රෝග, ධන හානි ආදිය ඇති වේ.

නවවැන්නේ දී කේතු ආගම පිළිබඳ අන්ධභක්‌තිය ඇති හෙවත් ආගමේ ඉගැන්වීම්වලට නොව මතුපිට පුද පූජාවලට පමණක්‌ සීමා වූ කෙනකු බව පෙන්වයි. උසස්‌ අධ්‍යාපනය ලබයි. තරමක්‌ ශුභයි.

දහවැන්නේ කේතු සතුරන් පරාජය කළ හැකි කෙනකු බව පෙන්වයි. එහෙත් කොන්ද, දණහිස්‌ ආදී සන්ධිවල රෝග ඇති කරයි. රැකියා ලාභවලට බාධා පමුණුවයි. ආත්ම විශ්වාසය දුර්වල කරයි.

එකොලහේදී ශුභ ඵල දෙයි. භාග්‍යය, ලාභ ලබන කෙනෙක්‌ද රට පුරා යාළුවන් ද ඇති කෙනෙක්‌ ද වෙයි. ධෛර්යවත් වෙයි. බලවත්කම් ඉඩකඩම් ධනය හා රූප සම්පත්තිය ද ඇති කරයි.

දොළහ පුනරුත්ථාපන කටයුතු රෝහල් ගැන කියන ස්‌ථානයයි. එහි කේතු තැන්පත් වූ අයට එවැනි අංශවල රැකියා ලැබේ. බුද්ධිමතෙකු වෙයි. ශුභඵල දේ.

ග්‍රහයකු ශුභ ඵල හෝ අශුභ ඵල උදා කරන්නේ එම ග්‍රහයාගේ දශා කාලය ලබන විටය. මනුෂ්‍යයකුගේ පරමායුෂ වර්ෂ 120 වශයෙන් සලකා විංයෝත්තර දශා ක්‍රමය නිර්මාණයවී තිබේ. එහි කේතුට අයත් මහ දශා කාලය අවුරුදු හතකි. මෙම වර්ෂ හතක දශා කාලයට අමතරව ඒ කාලයේ කේතු ගමන් කරන (කේන්ද්‍රයේ) භාවය ද දුර්වල නම් ජන්මියාට බොහෝ අපල ඇති වේ. කේතුව එක්‌ රාශියක්‌ පසු කිරීමට අවුරුදු එකයි මාස හයයි දින විස්‌සක්‌ පමණ ගත වේ.

මේ කාලය ඇතුළත කේතු 1 වැනි භාවයේ ගමන් කරන වසර 1 1/2 තුළ ශරීරය දුර්වල වී ආත්ම ශක්‌තිය පිරිහේ. මුහුණ අවලක්‍ෂණ වේ. අපල කාලයකි. කේතු දෙවැන්නේ ගමන් කරන කාලයේ තැන්පත් ධනය වැය වීමට කරුණු යෙදේ. අනාගතය, පිළිබඳ අවිනිශ්චිත බවක්‌ දැනේ. පවුලේ සමගියට බාධා පැමිණේ. තුන්වැන්නේ ගමන් කරන කාලයේදී තරමක ශුභඵල ඇතිවන නමුත් සහෝදරයන් හා අසල්වාසීන් අතර අමනාපකම් ඇති වේ. ගමන් බිමන්වලින් පාඩු සිදුවේ. හතර වැන්නේ ගමන් කරන කාලයේ නිවාස ඉඩකඩම් පිළිබඳ අවුල්, මවුට අසනීප, හිතට භය ඇති වීම, අමනුෂ්‍ය දෝෂ, ප්‍රේත දෝෂ ආදිය ඇති වේ. කේතු හතරේ ගමන් කරන කාලය නිවාස ඉදකිරීම් වැඩට අශුභයි. පස්‌වැන්නේ ගමන් කරන විට ඉගෙනීමේ කටයුතුවලට බාධා ඇති වේ. දරුවන්ට අපල සිදු වේ. දරු උපත සඳහා බාධා කරදර ඇති කාලයක්‌ වේ ආයෝජනවලින් පාඩු සිදුවේ. හයවැන්නේ ගමන් කරන කාලයේ තරමක ශුභ ඵල ඇති වේ. සතුරන්ගෙන් ජය ලැබේ. ශරීර සෞඛ්‍ය යහපත් වේ. කේතු හත්වැන්නේ ගමන් කරන විට විවාහ බාධා. බිරිඳට අපල ඇති වේ. ප්‍රසිද්ධ සතුරන් ඇති වේ. හවුල්කරුවන් අමනාප වේ. අටවැන්නේ ගමන් කරන විට ඉතා අශුභයි. අසනීප කුෂ්ඨරෝග, අර්ශස්‌ ආදි රෝග හා චිත්ත පීඩා ඇති වේ. නින්දා අපහාස ලබන්නට සිදු වේ. නව වැන්නේ තරමක්‌ අශුභයි. සෞඛ්‍ය ගැටලු ඇති වේ. භාග්‍ය වාසනාව යටපත් වී යයි. අධික වියදම් යෙදේ. දහයේ ගමන් කරන විට රැකියා බාධා, ස්‌ථාන මාරු කරදර ඇති කාලයක්‌ වේ. කේතු එකොළහේ ගමන් කරන වසර 1 1/2 ශුභපල ඇති වේ. ආදායම් මාර්ග උසස්‌ වේ. හදිසි ධන ලාභ ලැබේ. ගොවිතැන්වලින්ද උසස්‌ ප්‍රතිඵල ලැබෙන කාලයකි. කේතු දොළොස්‌වැන්නේ ගමන් කරන කාලය අධික වියදම් යෙදේ. සුළුවට සෑදෙන අසනීප අසාධ්‍ය වනවා ඇත. නීතියේ පිහිට ලැබීමට සිදුවීම හෝ රාජ දඬුවම් ලැබීමට සිදුවන කාලයකි. මේ සඳහන් කළේ කේතු ඒ ඒ භාවවල ගමන් කරන විට ඇතිවන ප්‍රතිඵලය.

දශාව හෝ ගමනින් හෝ කේතු අපලයක්‌ ඇති විටෙක ඊට අදාල ශාන්තිකර්ම කර ගැනීමෙන් අපල අඩු වී යයි. කේතු අපලයට වෛරෝඩි මැණික පැලඳීම බොහෝ අය විසින් කළ ද එයින් ශුභ ඵල ලැබෙන්නේ උපතේදී කේතු බලවත් නම් පමණි. නැතහොත් අපල වැඩිවීමට හේතුවේ.බුද්ධ පූජා, බෝධි පූජා තබා කතරගම දෙවියන්ට ම පින්දීම සුදුසුය. මෙහිදී කේතු හිමි අංක 9 එකතුවට ලැබෙන 9, 8, 27, 36, 45 ආදි සංඛ්‍යාවලින් මල් වට්‌ටි පහන්, කොඩි ආදිය පූජා කිරීම සුදුසුය. බෝධි පූජා තබන විට පුවක්‌ මල් හා කෙසෙල් මල් (කෙසෙල් මුවේ ඇති මල්) සමඟ රතු මල්, රතු කොඩි, උඳු, තල මිශ්‍ර කිරිබත්, මී කිරි, කෙසෙල් පුජා කිරීම සුදුසුය. මෙම පූජා තබා කතරගම දෙවියන්ට පින් දෙන්න. කතරගම දෙවියන්ට පලතුරු පූජා තබන විට රත් කෙසෙල් ඇතුළු පලතුරු වර්ග 9 ක්‌ රතුමල් ආදිය පූජා තබා සෙත්පතා ගන්න. බෝධි පූජාව අවසානයේ කරණීය මෙත්ත සූත්‍රය හෝ චන්ද පිරිත කියවා මෛත්‍රි භාවනාව කරන්න. දරුවකුට කේතු අපල ඇතිවිට මෙම පිරිත් කියා සෙත් පතන්න. කේතු ග්‍රහයාගේ අපලයක්‌ ඇති විට කළු පාට ඇඳුම් පැළඳුම් භාවිතය ඉතා අශුභය. මෙම අපලයට හේතුවන්නේ ක්‍රෝධය අධික වීම මත කරන වැරැදි නිසා අපලය දුරු කර ගැනීමේදී මෛත්‍රි භාවනාව අතිශයින්ම මහෝපකාරී වන බව දන්වමු. බුදු ගුණ යන්ත්‍රයක්‌ පැළඳීම විශේෂ ශාන්ති කර්මයකි.