දරුඵල ලබන්න ක්‍රමයක්‌ මෙන්න
දරු සුරතල් බැලීමට ඉතා ආශාවෙන් සිතින් දුක්‌ විඳින යුවතිපතියන් දස දහස්‌ ගණනක්‌ අප රටේ සිටින බව නොරහසකි. විවිධ වෛද්‍ය පරීක්‍ෂණවලට ලක්‌වෙමින්, දේවාලවල පිහිට පතමින්, බෝධි පූජා ආදිය පවත්වමින් දරුසම්පතක්‌ ලබාගැනීමට මුදල් දසදහස්‌ ගණන් වියදම් කරමින් ලතවෙති. මෙසේ වූයේ ඇයි යන්න විමසන විට කර්මය සම්බන්ධයෙන් අනිවාර්යයෙන්ම සිතන්නට සිදුවේ.
විශේෂයෙන් දරුවන් සම්බන්ධව පෙර භවයන් තුළ සිදුකළ අයහපත් ක්‍රියාවන්ගේ ප්‍රතිඵල ලෙස එවැනි තත්ත්වයන් ඇතිවෙයි. ගබ්සා කර දරුඵල නැති කිරීමෙන්ද, දරුවන්ට කෲර ලෙස සැලකීමත් යන අයහපත් දේවල්වල පෙර භවයන් තුළ නියෑලී සිටි හෙයින් මෙවැනි තත්ත්වයන්ට මුහුණ දීම සිදුවන බව ධර්මය තුළින් දැකිය හැකිය. එබැවින් එය ප්‍රධාන වශයෙන්ම පාප විපාකයකි. එනිසා සත්‍ය වශයෙන්ම කටයුතු කරගත යුත්තේ පහත පරිදි කටයුතු කිරීමෙනි.
ඇතැම් අයට මෙම පාප බලය වසර දෙක තුනක්‌ පැවතිය හැකිය. ඇතැම් විට වසර හතරක්‌, පහක්‌ දහයක්‌ පැවතිය හැකිය. එසේ කර්මයේ ස්‌වභාවය අනුව කාලය තීරණය වෙයි. ඇතැම් අයට ජීවිතාන්තය දක්‌වා දරුඵල නැතිවිය හැකිය. වෛද්‍ය ප්‍රතිකර්ම හෝ වෙනත් සෙත්ශාන්ති කළ අයට මෙම අකුසලයේ පැවැත්මට අදාළ කාලය අනුව දරුඵල ඇතිවීම හෝ නැතිවීම තීරණය වෙයි.
දරුවන් පිළිබඳව කේන්ද්‍රයෙන් හෙළි කරන්නේ 5 වැනි භාවයයි. එම භාවයට දෘෂ්ටි වන සුබ හෝ අසුබ ග්‍රහයන් ද 5 වැනි භාවයේ තැම්පත් වුණ ග්‍රහයන්ද විශේෂයෙන් දරුවන්ට කාරක වන ගුරු ග්‍රහයාගේ පිහිටීමද, සඳු ග්‍රහයාගෙන් 5 වැනි භාවයද, විශේෂ පරීක්‍ෂණයකට ලක්‌කළ යුතුය. එපමණක්‌ නොව 5 වැනි භාවාධිපති සිටින්නේ කුමන නවාංශකයකද එයින් නාශාංශක යෝග පවතීද යන්න පරීක්‍ෂා කළ යුතුය.
එසේ එම ග්‍රහයින්ගේ මහ දශා අතුරු දශා ගැනද ජන්මියා වර්තමානය තුළ ගතකරන දශාවන් පිළිබඳවද කරුණු සොයා බැලිය යුතුය. ඒ අනුව දරුඵල ප්‍රමාද වීමක්‌ද සදහටම අහිමි වීමක්‌ද යන්න සොයා බැලිය යුතුවෙයි. කේන්ද්‍රයේ 5 වැනි භාවය කටක, වෘශ්චික, මීන යන ජලරාශි වී නම් දරුඵල වැඩියෙන් ලබාදෙන රාශිවෙයි. එසේම 5 වැනි භාවය අසුබව පිහිටියේ නම් සඳු ග්‍රහයාගෙන් 5 වැන්න පරීක්‍ෂා කළ යුතුය. එසේම විවාහ ස්‌ථානය වූ 7 වැනි භාවයෙන් 5 වැන්නවූ කේන්ද්‍රයේ 11 වැනි භාවයද දරු ඵල සම්බන්ධයෙන් විමසා බැලිය යුතු තැනකි.
එසේම චන්ද්‍රයා මේෂ, මිථුන, සිංහ, කන්‍යා, මකර යන රාශියක සිටින්නේ නම් දරුඵල අඩුවන බව කියවේ. ඒ එම රාශි වඳ රාශි ලෙස නම්කර තිබෙන නිසාය. 5 වැනි භවයෙහි රවි, කුජ, ශනි, යුරේනස්‌ වැනි වැඳ ග්‍රහයන් සිට 5 වැන්න මේෂ, මිථුන, කන්‍යා, මකර යන වඳ රාශියක්‌ වීනම් දරුඵල අහිමිය. එසේම සඳුගෙන් 5 වැනි භාවයත්, 11 වැනි භාවයත් අසුබව තිබිය යුතුය.
ලග්නාධිපති ග්‍රහයාත් පුත්‍ර කාරක ගුරු ග්‍රහයාත්, 5 වැනි භාවාධිපති ග්‍රහයාත් දුර්වල තත්ත්වයේ සිට තවත් ග්‍රහයන් ගේ අසුබ දෘෂ්ටිවලට ලක්‌වේ නම් එයද දරුඵල අහිමිවන ග්‍රහ යෝගයකි. ඒවා බරපතළ ආත්ම කර්ම ලෙස දැක්‌විය හැක.
ස්‌ත්‍රි කේන්ද්‍රයක අසුබ ග්‍රහයෙක්‌ 12 වැන්නේ සිට තවත් අසුබ ග්‍රහයන්ගෙන් ඔහු පීඩාවී නම් ගබ්සා වීම් වැනි තත්ත්වයන් ඇතිවී දරුඵල හානිවෙයි. 12 වැන්න වූ කලී "සයන සුබ" ලෙස හැඳින්වෙන ස්‌ථානයයි. අඹුසැමි ලිංගික පහස එයින් විදහා දක්‌වන බැවිනි. සඳු ග්‍රහයා කුජ, ශනි, යුරේනස්‌ යන ග්‍රහයන්ගෙන් අසුබ දෘෂ්ටි ලබා පීඩාවී ඇත්නම් හෝ සංයෝග වී ඇත්නම් දරුඵල ඉතා අඩුවෙයි.
05 වැන්නාධිපති 08 වැන්නාධිපති සමඟ සංයෝගව තවත් ග්‍රහයන්ගෙන් අසුබ දෘෂ්ටි ලබා සිටින්නේනම් උත්පත්ති අවස්‌ථාවේ දී දරුවන් මිය යැමෙන් දරුඵල නැතිවෙයි. ජන්ම පත්‍රයේ 1-4-7-10 යන කේන්ද්‍රස්‌ථානයක සිටින සෙනසුරුට මේෂ, සිංහ, මකර යන රාශියක සිටි සිකුරුගෙන් හෝ සඳුගෙන් අසුබ දෘෂ්ටි ලැබුණේ නම් දරුඵල අහිමි වෙයි.
විශේෂයෙන් එවැනි තත්ත්වයෙන් දරුඵල නැත්තට නැති ස්‌වභාවයෙන් පවතින ග්‍රහ බලයන් තුළින් පෙන්වන්නේ එකී පව බලවත් බවයි. එය සමස්‌ත ජීවිතය පුරා බලගැන්වෙයි. දරුඵල ඉතා අඩු මට්‌ටමක පවතින ග්‍රහ පිහිටීම් වල ඇත්තේ එකී පව කෙටි කලකින් විසන්ධිවී යන බවය. එය අවබෝධ කර ගැනීමට ගතකරන මහ දශාව, අන්තර් දශාව, විදසාව පිළිබඳව පරීක්‍ෂා කළ යුතුය.
මේ අන්දමට දහස්‌ ගණනක්‌ විවිධ අතට බලගැන්වී දරු ඵල නැතිකරන හෝ සුළු වශයෙන් ලබාදෙන හෝ ග්‍රහ පිහිටීම් ජ්‍යෙdතිෂය තුළ පවතී. මේවා පෙර ආත්ම කර්ම හා බැඳී පවතී. එය බුදු දහමේ දැක්‌වෙන පරිදි "සත්වයා කර්මය දායාද කර සිටී. සෙවනැල්ල කර සිටී. පිහිට කර සිටී", යන බුද්ධ වචනයට අනුකූල තත්ත්වයන් වෙයි. කර්මය යනු කුසල හා අකුසල ලෙස දෙවැදැරුම්ය. මෙවන් තත්ත්වයන් අකුසල් කර්ම වශයෙන් දැක්‌වෙයි.
දරුඵල අහිමි අය තමන්ගේ ජන්ම පත්‍රය පරීක්‍ෂා කරවා එම තත්ත්වය දිගු කාලීනද කෙටිකාලීනද යන්න විමසා දැන ගත යුතුය. ඇතැම් විට වසර එක දෙක තුන වශයෙන් හා පහ හය වශයෙන් දිගු කාලවලින් පසු දරුඵල හටගත හැකි තත්ත්වයන් පවතී. කෙසේ නමුත් දරුඵල ඇතිකර ගතහැකි ශාන්තියක්‌ අප මෙහි සඳහන් කරන්නෙමු. ඇත්ත වශයෙන්ම එය බෝධි පූජාවකි. මෙය කළ යුත්තේ නුවණින් යුතුවය. එනිසා පහත පරිදි කටයුතු කරන්න.
බෝධි පූජාව පවත්වා එමගින් දරුඵල ලැබේවායි ප්‍රාර්ථනා කිරීමට තරම් ඔබ මෝඩ නොවන්න. ඉපදීම නවත්වන "නිවන" අරමුණු කළ බුදුරජාණන් වහන්සේගෙන් එවැන්නක්‌ නොපැතිය යුතුය. උතුම් ලෙස මෙම බෝධි පූජාව පවත්වා මහත්ඵල මහානිශංස කුසල් (පින්) උපදවාගෙන ඒ පිං බලයෙන් දරුඵල නැති කළාවූ අකුසල් දුර්වල වේවායි පැතිය යුතුය.
මෙම බෝධිපූජාව උදැසනක බෝධියක්‌ ළඟ කළ යුතුය. ඒ සඳහා ඉතා පිරිසිදුව සාදාගත් කිරිබත් පිඟානක්‌ද, කිරි කළයක්‌ද (යෝගට්‌ කෝප්පයක ප්‍රමාණයෙන් මැටියෙන් තැනූ කළ) සුදු මල් වට්‌ටියක්‌ද - සුදු කොඩියක්‌ද - හොඳ ඉදුනු අඹගෙඩියක්‌ද, ගිතෙල් පහනක්‌ද, සුවඳ පැන් කළයක්‌ද (පෙරසේම) වී පොරි, සුදු හඳුන් ස්‌වල්පයක්‌ද බන්දේසියක තබා ගිතෙල් පහනද දල්වා බෝධියෙහි තැම්පත් කරන්න.
වී පොරි ස්‌වල්පයකට ගිතෙල් දමා අනා ඒවායින් බෝධිය වටා දුම් අල්ලන්න. බෝධිය නෑවීමේදී සුවඳ මිශ්‍ර පැන්වලින් බෝධිය නාවන්න. ඒ සෑම විටකම ඉහත කී පරිදි අරමුණ සිතට ගන්න. පසුව බෝධි පූජාව තබමින් ඒ සියල්ල බුදුරජාණන් වහන්සේට පූජා කරන්න.
එයින් ඔබ උපදවන්නේ අති ප්‍රබල කුසල කර්මයකි. බලගතු පිනකි. එපින් බලයෙන් දරුඵල නැති කළ අකුසල් බලය දුරස්‌වේවායි පතමින්, අරමුණු කරමින් බෝධි පූජාව අවසන් කරන්න. එසේ අවසන්කර ඔබ උපද්දාගත් ඒ කුසලයේ අග්‍රවූ භාගය සත්පත්තිනි මෑණියන්ට අනුමෝදන් කරන්න. එසේ අනුමෝදන් කර තමන්ට දරු සම්පතක්‌ ලබාගන්නට අවහිර වන සියලු බලවේග සිඳ බිඳ දරුඵල ඇතිකර දෙන ලෙස ඉල්ලා සිටින්න. පහත දැක්‌වෙන ගාථාව කියා පිං අනුමෝදන් කරන්න.
යං අම්මේහි කතං පුඤ්ඤංසබ්බ සම්පත්ති සාධකං
සත් පත්තිනි දේව මාතානං
මෙම බෝධි පූජාව සතියේ සඳුදා සහ සිකුරාදා දිනවල උදැසනක කළ යුතුය. සවස කරන්නේනම් කිරිබත් පිදිය නොහැක. පලතුරු යුෂ පමණක්‌ පිදිය හැකිය. වඩාත් යෝග්‍ය වන්නේ උදැසනකයි. උදේ 06 ත් 08 ත් අතර පමණක්‌ සුදුසු වේ. එසේම එම දිනවල බිත්තර මස්‌ මාංශ ආහාරයට ගැනීමෙන් වැලකී සිටිය යුතුය. දරුඵල අහිමිවූ අයට එම ශාන්තිය ඉතා වැදගත් වේ. එය එක දිගට සඳුදා, සිකුරාදා දිනවල මාස කීපයක්‌ පැවැත්වීමෙන් ඔබගේ අරමුණ සාක්‍ෂාත් වනු ඇත.
අගලවත්තේ බී. හේරත්
උපුටා ගැනීම දිවයින පුවත්පත
