මුහුණේ හැඩයෙන් සහකරු හඳුනා ගනිමු
මුහුණ කෙනෙකුගේ චරිත ලක්‍ෂණ කියාපාන කැඩපතක්‌ යනුවෙන් දේහ ලක්‍ෂණ විද්‍යාවේ සඳහන් වේ. මේ අනුව යුවතියකට ඇයට හිමි සහකරු කෙබඳු අයෙක්‌ද යන්න නවග්‍රහ මණ්‌ඩලයේ ග්‍රහයන්ට වෙන් වූ මුහුණේ හැඩයට අනුව ඉතා සැළකිලිමත්ව පරීක්‍ෂා කර බලා තීරණය කර ගත හැකිය. රාහු කේතු යන ඡායා ග්‍රහයන් දෙදෙනාට හැර අනෙකුත් ප්‍රධාන ග්‍රහයන් සත් දෙනාට වෙන් කර ඇති මුහුණේ හැඩය අනුව ඔබේ සහකරු මෙලෙස හඳුනා ගනිමු.
රවි ග්‍රහයාට අයත් ත්‍රිකෝණාකාර මුහුණ
හිස්‌ මුදුන සිහින්ව නිකට ප්‍රදේශයට ක්‍රමයෙන් මහත්ව පිහිටි මුහුණ රවි සිටි අග්නි භූතයට අයත්ය. නායකත්වය, අභිමානවත් බව, අන්‍යයන් තම මතයට යටත් කර ගැනීමේ හැකියාව මෙම අයට උපතින්ම පිහිටා ඇත. නිවසේ පාලනය, ගම් ප්‍රදේශයේ හෝ සමාජයේ හෝ මූලිකත්වය දැරීමට මෙම කාන්තාවන් ඉතා දක්‍ෂය. එපමණක්‌ නොව නගරයේ හෝ රටේ හෝ ප්‍රධාන පාලිකාව විමේ හැකියාවද ඇත.
වර්ගය, ජාතිය, ආගම, කුලය, ස්‌ත්‍රී පුරුෂ බව නොසලකා හැමට සමානත්වයෙන් සලකයි. තමා ඇසුරේ සිටින අය අභිබවා ක්‍රියාකිරීමට පෙළඹෙයි. ප්‍රතිඵලය හොඳ හෝ වේවා නරක හෝ වේවා තම මතය අනුවම ක්‍රියාකරයි. බොහෝ විට ප්‍රතිඵල යහපත් වේ. අයහපත් වන්නේ ඉතා කලාතුරකිනි. උස මහත ශක්‌තිමත් ශරීරයක්‌ හිමි වේ. බොහෝ සෙයින් නිරෝගිය. ආහාරපාන ගැනීමේදී බොහෝ විමසිලිමත් වේ. නිරෝගී වීමට ප්‍රධාන හේතුව එයයි. තම අරමුණ ඉටුකර ගැනීම සඳහා තම සතුරන් සමග වුවද මිතුරුවීමට කැමති වේ.
තම සහකරු තමාගේ අදහස්‌වලට නැඹුරු කර ගැනීමට බොහෝ උත්සාහ දරයි. අවංකව ආදරය කරයි. පිත අධික ශරීරයකි. ආමාශගත දැවිල්ල රුධිර පීඩනය වැනි රෝගවලට ගොදුරු වේ. දීර්ඝායුෂ විඳියි. රවි බලවත් වූ වේලාවක උපත ලබා ඇත.
සඳු ග්‍රහයාට අයත් වෘත්තාකාර මුහුණ
පුන්සඳ මෙන් පිරුණු මුහුණක්‌ ඇත. සඳු හිමි ජල භුතයාට අයත්ය. ප්‍රීය මනාප ගතිය ඇත. නිතර වෙනස්‌වන සුළු ගතිගුණ ඇති සෞඛ්‍ය කාරුණික හදවක්‌ හිමිය. අනුන්ට උදව් උපකාර කිරීමට පසුබට නොවේ. මධ්‍යම හෝ කුඩා ප්‍රමාණයේ හෝ ශරීරයක්‌ හිමිය. සම පැහැපත්ය. සියුමැලිය, නැහැය සිහින්ව උස්‌ව පිහිටා ඇත. බොහෝ විට සඳු බලවත් වූ වේලාවක කටක ලග්නයෙන් උපත ලබා ඇත. පීනස්‌ රෝග, සෙම අධික අසනීප, හතිය, ඇදුම වැනි රෝග සාදයි.
ශරීරය මහන්සි කරන වැඩවලට කැමති නැත. මොළය වෙහෙසා කරන වැඩ කටයුතුවලට දක්‍ෂය. සීතල ආහාර පාන සීතල දේශගුණය අගුණ විය හැකිය. දිවා කාලයේ නින්දට ප්‍රිය කරයි. පළමු තැනට පත්වීමට හෝ ප්‍රධානත්වය දැරීමට හෝ කැමති නැත. දෙවැනි තැන ලබාගෙන ප්‍රධානියාට ගරු කරමින් කටයුතු කරයි. සහකරුට ඉතා හිතවත්ව ඔහුට ප්‍රධානත්වය දී කීකරුව ජීවත්වීමට සිතයි.
කුජ ග්‍රහයාට අයත් චතුරශ්‍රාකාර මුහුණ
හිස්‌ මුදුන ප්‍රදේශය සහ නිකට ප්‍රදේශය එක සමානව පළල්ව හතරැස්‌ව හැඩයෙන් යුක්‌ත මුහුණ කුජ ග්‍රහයාට හිමි පඨවි භූතයට අයත්ය. පෞරුෂත්වය, එඩිතර කම නිර්භීත බව, ඉදිරිපත් වීමේ ගතිය, සටනට කැමති බව පෙන්නුම් කරයි. අනුන්ගේ අවවාද උපදෙස්‌ පිළිගැනීමට කැමති නැත. තම අදහස්‌ අනුවම කටයුතු කරයි. සටනට ඉදිරිපත් වුවහොත් මරණය දක්‌වාම සටන් කරයි. යුද හමුදාව, පොලිසිය, ආරක්‍ෂක සේවය වැනි කියාවලට ප්‍රිය කරයි.
කලාත්මක අදහස්‌ පහළවන්නේ නැත. මෙවැනි කාන්තාවන් පිරිමින් හා සමානව වැඩකිරීමට දක්‍ෂය. තම සහකරුට බොහෝ ආදරය කරයි. කුජ බලවත් වූ වේලාවක, මේෂ වෘශ්චික ලග්නවලින් උපත ලබයි.
බුද ග්‍රහයාට අයත් ත්‍රිකෝණාකාර මුහුණ
හිස්‌ මුදුන පළල්ව නිකට ප්‍රදේශය සිහින්ව ත්‍රිකෝණාකාර හැඩයෙන් යුක්‌ත මුහුණ බුධ ග්‍රහයාට හිමිවේ. මෙය වායෝ භූතයට අයත්ය. බුද්ධිමත් කෙනෙකි. නුවණින් කල්පනා කර බලා කටයුතු කරයි. තමා ළඟ සිටින තමා ඇසුරු කරන පුද්ගලයන් ගැන සිතමින් ඔවුන් අනුව කටයුතු කිරීමට උත්සාහ ගනියි.
තම සහකරුගේ ක්‍රියාකලාපය අනුගමනය කරමින් ඔහුගේ වැඩකටයුතුවලට පූර්ණ සහයෝගය ලබාදෙයි. සහකරු යහපත් කෙනෙකු නම්, ඔහුගේ යහපත් වැඩවලට උදව් දෙන අතර, අයහපත් කෙනෙකු නම් ඔහුගේ නරක වැඩවලටද සහයෝගය දීමට මැලි නොවේ. ඉගෙනීමට දක්‍ෂය. කරුණාවන්තය කවට කතා කීමට, සිත වසඟවන ලෙස කතා කිරිමට හා ලිවීමට, නිවේදන කටයුතුවලටද සමාජ දක්‍ෂතා ඇත. බුධ ග්‍රහයා බලවත් වූ අවස්‌ථාවක කන්‍යා, මිථුන ලග්නවලින් උපත ලබයි.
ගුරු ග්‍රහයාට අයත් දිගටි මුහුණ
හිස්‌ මුහුන සිට නිකට දක්‌වා එක සමාන පළලකින් යුක්‌ත දිගටි මුහුණක්‌ ඇත. ගුරු හිමි අකාශ භූතයට අයත්ය. හිස කෙස්‌ සිනිදුය. උස්‌ මහත්වූ සිරුරක්‌ ඇත. මැදි වයස ඉක්‌මවන විට, සිරුර තරබාරු වේ. ශරීරය වෙහෙස නොවන ගුරු සේවය, උපදේශක සේවය වැනි රැකියාවලට කැමතිය. බණ භාවනා කිරිමට ආගමික කටයුතුවලට සමාජ සේවයට ඉතා ලැදිය සහකරු අයහපත් කෙනෙකු වුවද කෙසේ හෝ යහපත් පැත්තට නැඹුරු කර ගැනීමට උත්සාහ දරයි. සෙම අධික රෝග, රුධිර පීඩනය, හෘද රෝග, දියවැඩියාව වැනි රෝගවලට ලෙහෙසියෙන් ගොදුරු වේ. ගුරු බලවත් වූ වේලාවක ධනු, මීන ලග්නවලින් උපත ලබා තිබීම විශේෂ කරුණකි.
සිකුරු ග්‍රහයාට අයත් විචිත්‍රාකාර මුහුණ
ඉතා ප්‍රිය මනාප වූ පැහැපත් මුහුණකි. බොහෝ විට හිසකෙස්‌ රැලි සහිතය. සිකුරු හිමි ජල භූතයට අයත්ය. ප්‍රිය මනාප වූ දෙතොල් මනාව පිහිටා ඇත. දුටුවන්ගේ සිත් වසඟයට ගැනීමට හැකි සිනහවක්‌ ඇත. ප්‍රිය වචන කතා කිරීමේ දක්‍ෂතාව ඇත. බොහෝ ඉක්‌මනින් සන්සුන් වේ. අපක්‍ෂපාතීව සාධාරණය ඉටුකිරීමට හැකි හැම විටම උත්සාහ දරයි. ලස්‌සන ඇඳුම්වලට සුවඳ වර්ගවලට ප්‍රිය කරයි. තම වැඩකටයුතු ක්‍රමානුකූල පිළිවෙළට ඉටුකරයි. තමාගේ කාමරය, තමා දිංචි වී සිටින නිවස, අවට පරිසරය ඉතා පිරිසිදුව තබා ගනියි. මල් වැවීමට බොහෝ කැමතියි. ආදරය වෙනුවෙන් ඕනෑම දෙයක්‌ පරිත්‍යාග කරයි. වයසට පත් වුවද ඒ ආදරයේ වෙනසක්‌ නොමැත. රූපලාවන්‍ය ශිල්පය, සුවඳ විලවුන් රෙදිපිළි ව්‍යාපාර, කලා අංශයේ රැකියා, මල් වගාව මෙම අයට ඉතා සුදුසුය. සෙම අධික අසනීප වලින් නිතරම පීඩා විඳිති. සිකුරු බවත් වේලාවක බොහෝ විට උපත ලබයි.
සෙනසුරු ග්‍රහයාට අයත් වයස්‌ගත පෙනුමැති මුහුණ
තම වයසට වඩා වැඩිමහල් පෙනුමක්‌ මෙම මුහුණේ පෙන්නුම් කරයි. සෙනසුරුට හිමි වායෝ භූතයට අයත්ය. ප්‍රිය මනාප ගතිය නැත. බොහෝ විට දුක්‌මුසු බව, නොරිස්‌සුම් බව, නපුරු බව පෙන්නුම් කරයි. ලස්‌සනට සිටීමට, පිරිසිදු ලෙස ඇඳුම් ඇඳීමට උවමනාවක්‌ නැත. කලුපාට, තද නිල්පාට, දුඹුරු පාට ඇඳුම්වලට වැඩියෙන් ප්‍රිය කරයි. ඉතාම චාම්ය. සරලය. නිතර වැඩෙහි යෙදේ. විවේකය අඩුය. මුදල් ඉපයීමට දක්‍ෂය. දාසියක මෙන් තම සහකරුට සේවය කරයි.
වියදම් කිරීමේදී සැලකිලිමත් වේ. මෙලොවට වඩා පරලොව ගැන සිතයි. ලෞකික ජීවිතයේ සැප සම්පත්වලට වැඩි ආශාවක්‌ නැත. අවංකය, අනුන් රැවටීමට උත්සාහ දරන්නේ නැත. වාත අමාරු තුනටිය අමාරු වැනි රෝග සෑදේ. සෙනසුරු ග්‍රහයා බලවත් වූ වේලාවක මකර, කුම්භ ලග්නවලින් උපත ලබයි.
ජ්‍යොතිෂවේදී රංජන් සිසිර කුමාර
උපුටා ගැනීම දිවයින පුවත් පත
