සටන්කාමිත්වය අධිෂ්ඨාන ශක්‌තිය හෙළිකරන කූජ මණ්‌ඩලය
අද විස්‌තර කරන්නේ අල්ලේ පිහිටි කූජමංඩලය පිළිබඳවයි. ගුරු, ශනි, බුධ, චන්ද්‍ර, සිකුරු යන ග්‍රහයන්ට අත්ලේ එක ස්‌ථානය බැගින් හිමිවුවත් කුජ ග්‍රහයාට පමණක්‌ අත්ලේ ස්‌ථාන තුනක්‌ම හිමිවෙයි. ඉහළ කුජ මංඩලය පහළ කුජ මංඩලය සහ කුජ තලාව එම ස්‌ථාන තුනයි. මේ සමග පලවන රූපසටහකින් එය ඔබට හඳුනාගත හැකියි. කුජ ග්‍රහයා ග්‍රහ මංඩලයේ සෙන්පතියා ලෙස හඳුන්වනු ලබයි. ජ්‍යොතිෂ විද්‍යාවේදී මෙන්ම හස්‌ත රේඛා විද්‍යාවේදීන් කුජ බලවතෙක්‌ ලෙස හැදින්විය හැකියි. පුද්ගලයාගේ කඩිසරකම, සටන්කාමිත්වය අධිෂ්ඨාන ශක්‌තිය කුජ මංඩලය මගින් අනාවරණය වෙයි. දැන් අපි බලමු ඉහත සඳහන් කුජ මංඩලය අයත් වන්නේ අත්ලේ කුමන ස්‌ථානවලටද කියා. ඉහළ කුජ මණ්‌ඩලයට අයත් වන්නේ බුද මණ්‌ඩලයටත් එයට පහළින් ඇති චන්ද්‍ර මණ්‌ඩලයටත් අතර මැද ඇති ප්‍රදේශයයි. ගුරු මණ්‌ඩලයටත් අතර ඇති ප්‍රදේශය පහළ කුජ මණ්‌ඩලයට අයත්වෙයි. මෙයින් ඉහල කුජ මණ්‌ඩලය පුද්ගලයාගේ සිරුර පිළිබඳ තොරතුරත් ඒ හා බැඳුන ගතිගුණත් ප්‍රකට කරන අතර පහළ කුජ මණ්‌ඩලයෙන් මානසික තත්ත්වය පිළිබඳ තොරතුරුත් ඒ හා බැඳුණ ගතිගුණ හා සටන් කාමිත්වය ආදිය පෙන්නුම් කරයි. කුජ ඉහළ පහළ මණ්‌ඩලත් කුජගේ ප්‍රදේශයක්‌වන කුජ කලාවත් කුජ ග්‍රහයාගෙන් නිකුත්වෙන තරංග චලන ශක්‌තිය ගබඩාවෙන ස්‌ථාන වේ.
මෙම මණ්‌ඩලවල කුජ ග්‍රහයාගේ බලපෑම් තදින් සිදුවේ. මෙම මණ්‌ඩල මත සිරස්‌ව හෝ හරස්‌ව රේඛා පිහිටා ඇත්නම් මණ්‌ඩලවල බලපෑම් වඩාත් යහපත්වේ. රේඛා නොමැතිනම් බලපෑම් හීනවේ. මෙම මණ්‌ඩලත් කුජ කලාවත් හොඳින් වැඩී රේඛා වැටී තිබීම වඩාත්ම සුභඵල දෙන පිහිටීමක්‌ වෙයි. ධෛර්ය වන්තකම කඩිසරකම, ආපදාවලදී නෙසැලෙන ශක්‌තිය ආදී ලෞකික දියුණුවට හේතුවන ගුණාංග රාශියක්‌ ඇතිවීමට එම මණ්‌ඩලවල ක්‍රියාකාරීත්වය උදව් දෙයි. අභීත සටන්කාමීන් වශයෙන් කැපී පෙනෙන එවැනි අයට තේජවන්ත ගතිගුණත් පිහිටයි. උපතින්ම නම්බුනාම ප්‍රසංශා ආදියට කැමති ඔවුන් එකවර වැඩ රාශියක්‌ කිරීමට තරම් දක්‍ෂය, හැම කාර්යයකදීම ඔවුන් ප්‍රමුඛත්වය ගෙන කටයුතු කරයි. අන්‍යයන්ට උපදෙස්‌ දෙනවා මිස ඔවුන් අන්‍යයන්ගේ උපදෙස්‌ පිළිපැදීමට කැමති නොවේ. හැම විටම මා නිවැරැදි බව සිතයි. ත්‍යාගශීලිබවද ඔවුන් තුළින් කැපී පෙනේ. අන් අය පරයා උසස්‌වීමේ දැඩි අභිලාෂයකින් යුතු අය වෙති. බොහෝවිට මොවුන්ගේ විවාහ ජීවිතය අවාසනාවන්ත වේ. කීර්තියත්, නම්බුවත් ආරක්‍ෂා කිරීම වෙනුවෙන් කිසිවක්‌ පිටතට හෙලිදරව් නොකරයි. ඉහළ කුජ මණ්‌ඩලය යටට පහත්වී තිබීම කුජ ග්‍රහයාගේ බලපෑම අඩුබව ප්‍රකට කෙරේ. කරන හැම කාර්යයකින්ම සාර්ථක ප්‍රතිඵල නොලබන ඔවුන් බියසුළු පුද්ගලයින් ලෙස හැඳින්විය හැකිය. ඉතා සුළු දෙයකින් පවා අධෛර්යයට පත්වන්නෝ වෙති. බොරුවට ගර්ජනා කළත් ඔවුන් සටන්කාමි අය නොවේ. සටනකදී ශීඝ්‍රයෙන් පසු බසින ඔවුන් ප්‍රතිවාදියාගෙන් සමාව ගන්නා තරමට නිවට බවක්‌ පෙන්නුම් කරයි. අන්‍යයන්ගේ අගෞරවයටත් අපහාසයටත් ලක්‌වෙයි.
පහළ කුජ මණ්‌ඩලය මනාව උස්‌ව පිහිටියේ නම් වඩාත් යහපත් ගතිගුණ ඇති කෙනෙක්‌ විය හැකිය. මනා ශරීර ශක්‌තියකුත් ඥණ ශක්‌තියකුත් ඔවුන් හට පිහිටයි. උපතින්ම නිර්භීත බවක්‌ පෙන්නුම් කරන අතර බොහෝ අවස්‌ථාවල සිතට වහල් නොවේ. නිදහස්‌ අදහස්‌වලට ගරු කරයි. ඕනෑම භාරදූර කටයුත්තකට මුල පුරන ඔවුන් තමන්ගේ ස්‌ව උත්සාහයෙන් ඒ හැම දෙයකින්ම දියුණුව ළඟාකර ගනිති. පහළ කුජ මංඩලය දුර්වල වීම අඥන බව ප්‍රකට කරයි. ඉතා සුළු දෙයකට පවා කෝප සහගත වන ඔවුන් සාහසික අපරාධවලටද පෙළඹේ. පහසුවෙන් බෝවෙන රෝග වැලඳීමටත් පහළ කුජ මණ්‌ඩලය දුර්වලවීම හේතුවෙයි. අනාගත බලාපොරොත්තුවලින් තොරව ජීවත්වන මොවුන් අන්‍යයන්ට ඊර්ෂ්‍යා කරන අයවෙති.
කුජ මංඩලවල චතුරස්‍රයක හෝ ත්‍රිකෝණයක ලකුණක්‌ පිහිටියේ නම් එවැනි අය කුමන ක්‍රමයකින් හෝ ප්‍රසිද්ධ වෙති. නිර්භීත අය බැවින් මොවුන් හමුදා සේවය පොලිස්‌ සේවය වැනි අංශවලට වඩාත් ගැලපේ. තාරකා ලකුණක්‌ පිහිටීම වඩාත් සුභ පලදේ. ඊර්ෂියාව, කුහකකම ඔවුන් තුළින් දැකිය හැකි දුර්වලකම් වේ. මේ හදිසි අනතුරුවලින් ජීවිතය අඳුරුවන බැවින් පහළ කුජ මණ්‌ඩලය මත් වැටෙන දැල් සලකුණ සුභ නොවේ. කුජ මණ්‌ඩලය මත කළු ලප වැටී තිබේනම් කැපීම් කෙටීම් වැනි දෙයකින් ඔවුන්ගේ ශරීරයට හානි සිදුවන බව ප්‍රකාශ වෙයි. කුජ මණ්‌ඩල දෙකේම කතිර ලකුණ වැටී ඉරිවලින් කැපී තිබේනම් ඔවුන් තමන්ගේ ජීවිතය හානි කර ගන්නට පෙලඹෙන බව කියෑවේ.
හිඹුටානේ පියතිලක ද අල්විස්‌
උපුටා ගැනීම දිවයින පුවත්පත
