ප්‍රේමයේ ආශ්වාදය හෙළිකරන සිකුරු මණ්‌ඩලය
සිකුරු ග්‍රහයාගෙන් නිකුත් කරන තරංග චලන ශක්‌තින් ගබඩා වී ඇත්තේ සිකුරු මණ්‌ඩලයේ යයි කීවොත් එය වැරදි නොවේ. එම සිකුරු මණ්‌ඩලය පිළිබඳවයි අද විස්‌තර කරන්නේ. අනෙකුත් ග්‍රහ මණ්‌ඩල අතරින් විශාලම ග්‍රහ මණ්‌ඩලය මෙයයි. මහපට ඇඟිල්ලේ මුල වැටී ඇති ගොඩැලි ප්‍රදේශය සිකුරු මණ්‌ඩලයට අයත් වෙයි. මෙය ජීවන රේඛාවෙන් වෙන්වීම විශේෂ ලක්‍ෂණයකි.
ප්‍රේමයේ ආශ්වාදය. ලෞකික ජීවිතයේ සතුට කරුණාව, දයාව, පරිත්‍යාගශීලි බව ආදී යහපත් ගුණාංග සිකුරු මණ්‌ඩලය මගින් පෙන්නුම් කරයි. ක්‍රීඩා, සංගීතය වැනි කලාත්මක දේට ඇති ලැදි බවද සිකුරු මණ්‌ඩලය තුළින් විද්‍යාමාන වෙයි. සිකුරු මණ්‌ඩලය මනාව උස්‌ව, රෝස පාටින් යුක්‌තව ඇත්තේ නම් සිකුරු ග්‍රහයාගේ බලපෑම් වඩාත් ප්‍රකට වේ. එවැනි අයට සිකුරු ග්‍රහයාගේ උසස්‌ ප්‍රතිඵල වඩාත්ම හිමිවෙයි. ලෝකයේ බිහි වූ ශ්‍රේෂ්ඨ කලාකරුවන් සිකුරු මණ්‌ඩලය බලවත්ව ඉපදී ඇති අයවේ. බොහෝ සමාජ සේවකයන්, මානව හිතවාදීන් මෙම මණ්‌ඩලය යහපත්ව බිහි වූ අය වෙති. සිකුරු මණ්‌ඩලයේ සිරස්‌ව හෝ හරස්‌ව රේඛා විහිදී ඇත්නම් සිකුරුගේ බලපෑම්වලින් වඩාත් යහපත් ප්‍රතිඵල ප්‍රකට වේ. ඒ මගින් පුද්ගලයා ධනවත් භාවයට පත් වෙයි. එමෙන්ම දේපල, ඉඩකඩම්, යාන වාහන මෙන්ම සුව පහසු ගෙවල් දොරවල්ද හිමිකර ගැනීමට වාසනාව උදාවේ. අන් අය අතර ජනප්‍රිය වීමටත්, සමාජයේ ගරු බුහුමන් ලැබීමටත් හේතුවෙයි. කලා ක්‍ෂේත්‍රයන්හි නියෑලී සිටින අයගේ සිකුරු මණ්‌ඩලය බලවත්ව පිහිටා ඇති අයුරු දැක ගත හැකිය. මොවුන් හට බොහෝ කටයුතුවලදී ප්‍රධානත්වය හිමිවේ. අන්‍යයන්ගේ සිත් ඇද ගන්නා කතා විලාශයත් ප්‍රිය මනාප දේහ විලාශයත් නිසා කුමන ස්‌ථානයකදී වුවද කාගේත් ප්‍රසාදයට ලක්‌වේ. බොහෝ විට ව්‍යාපාර කටයුතුවලදී ඔවුන් තුළ ඇති ප්‍රසන්න බව හා සුහදතාවය නිසා එම කටයුතු දියුණු කර ගැනීමට නිරායාසයෙන්ම හැකියාව ලැඛෙයි. සැරසිලි භාණ්‌ඩ, සංගීත භාණ්‌ඩ, මල් අලෙවිය. රූපලාවන්‍ය කටයුතු සුඛෝපභෝගී භාණ්‌ඩ ආදී කලාවට සම්බන්ධ ව්‍යාපාර තුළින් ඔවුනට දියුණුව ලඟා කරගත හැකිවේ. සිකුරු මණ්‌ඩලය මනාව පිහිටා ඇති අයට විරුද්ධ පාර්ශවයේ අයගේ ආකර්ෂණය ලබා ගැනීමට කිසිදු උත්සාහයක්‌ දැරිය යුතු නොවේ. මේ නිසා මොවුන්ට පෙම් සබඳතා බහුලව ගොඩනැගෙන්නට හැකිය. මෙවැනි සබඳතා දුර දිග යාමෙන් බොහෝ විට පවුල් ජීවිතයේ ප්‍රශ්නද ඇති වෙයි. සිකුරු මණ්‌ඩලය ප්‍රමාණයට වඩා උස්‌ව පිහිටීමද එතරම් සුභ නොවේ. අතිධාවන කාම භෝගි බව එමගින් ප්‍රකට වේ. මේ නිසා නොමනා සම්බන්ධතා හේතුවෙන් සමාජ රෝග පවා ඇති විය හැක. කාන්තාවකගේ අතක සිකුරු මණ්‌ඩලය වඩා උස්‌ව තිබීම සුභදායක නොවේ. වැරදි කාම සේවනයෙහි යෙදෙන අය තුළ මෙම ලක්‍ෂණය දැකිය හැකි අතර ඔවුන්ගේ විවාහ ජීවිතයද බොහෝ විට අසාර්ථක වේ.
සිකුරු මණ්‌ඩලය දුබල වීම එනම් පහත් වූ ආකාරවීම, සිරස්‌ව, හරස්‌ව රේඛා නොපිහිටීම සිකුරු ග්‍රහයාගෙන් ලැඛෙන බලපෑම් හීන බව ප්‍රකට වේ. එවැනි ලකුණු ඇති අය උදාසීන ආදරය නොලබන, දුර්වල ශරීරයක්‌ ඇති අය වෙයි. දුෂ්ට ගතිගුණ ඇති මෙවැන්නන් සමාජයේ අගෞරවයටත් අවඥාවටත් ලක්‌වෙයි. අධ්‍යාපන කටයුතු සහ ශාස්‌ත්‍රීය කටයුතු පිළිබඳව දක්‍ෂතාවක්‌ නොපෙන්වයි. සැපවත් ජීවිතයක්‌ ගත කිරීමට සිහින වැව්වත් උදාසීන බව නිසා එයින් ප්‍රතිඵලයක්‌ නොලබයි. විවාහ ජීවිතයද සාර්ථක නොවන අතර ජීවිතය අතෘප්තිකර ආකාරයෙන් ගෙවෙනු ඇත. සිකුරුගේ බැල්මක්‌ නැති වූ විට පුද්ගලයාට සෝදුක්‌, කනස්‌සල්ල හා දුක්‌ පීඩාද ඇති කරනු ඇත. නිදසුනක්‌ ලෙස සඳහන් කළහොත් සිකුරු ග්‍රහයා පියකරු බවේ හා ආකර්ෂණය බවේ බලයයි.
මනාව පිහිටි සිකුරු මණ්‌ඩලයක්‌ හිමි කාන්තාව නිවසට භාග්‍යයක්‌ වෙයි. නිවසේ හැම කාර්යයක්‌ම සතුටු සිතින්, සැහැල්ලුවෙන් නොපිරිහෙලා ඉටු කරන ඔවුන් නිතර සතුටින් කාලය ගත කරයි. තම ස්‌වාමි පුරුෂයාට මෙන්ම දරුවන් හටද ඇත්තේ ඉමහත් ආදරයකි. ආගමට, දහමටද දැඩි භක්‌තියක්‌ ඇත. කුඩා වුවත් විශාල වුවත් නිවස අලංකාර ලෙස තබා ගැනීමට ඔවුන් යුහුසුලු වෙති. සාර්ථක ප්‍රේම සම්බන්ධයක්‌ අනුව සිදු වන විවාහයක්‌ සහ සැපවත් විවාහ ජීවිතයක්‌ සිකුරු මණ්‌ඩලය මත වැටෙන කතිර ලකුණින් පෙන්නුම් කරයි. එහි වැටෙන තාරකා ලකුණත් ඒ වගේම සුභ ඵල දෙයි. විනෝදකාමී ගතිය ඒ අයගේ ජීවිතයේ කැපී පෙනෙන ලකුණක්‌ වෙයි. ආදරය සම්බන්ධ කටයුතුවලදී නොයෙකුත් විදියේ ආරවුල් ඇති වන නිසා සිකුරු මණ්‌ඩලයට දැල් සලකුණු සුභ නොවේ. සිකුරු මණ්‌ඩලය මත විශේෂ රේඛා කීපයක්‌ හෝ දැකිය හැක. දරුපල රේඛා වශයෙන් ඒවා හඳුන්වයි. එහි වැටෙන මහත රේඛාවලින් පුතාලගේ ගණනත්, සියුම් රේඛාවලින් දුවලගේ ගණනත් තීරණය කළ හැකිය. අතබලා දරුවන් ගැන කියන ක්‍රම කීපයක්‌ හස්‌ත රේඛා විද්‍යාවේ සඳහන් වෙයි. එය සංකීර්ණ විෂයයක්‌. ඒ පිළිබඳව පසු ලිපියකින් විස්‌තර කරන තෙක්‌ එම කරුණු කීපය මතකයේ තබා ගන්න.
සිකුරු මණ්‌ඩලය ප්‍රමාණයට වඩා ඝනව වැඩී සුලි ලකුණකින් යුක්‌ත වීම අධික කාමුක බවත්, එක්‌ විවාහයකින් සතුටට පත් නොවන බවටද සලකුණකි. තවද සිකුරු මණ්‌ඩලය දුර්වර්ණව විකෘති වී පිහිටා ඇති අයට අව ලක්‍ෂණ පෙනුමක්‌ ලැඛෙන අතර නිතර අනුන්ගේ දෝෂ දර්ශනයට ලක්‌වේ. අසුභ ලකුණු පිහිටා ඇති අයගේ විවාහ ජීවිතද අසාර්ථක වන අතර ස්‌ත්‍රියක්‌ නම් වෛශ්‍යාවක්‌ වීමටද ඉඩ ඇත. කෙසේ වුවත් අත්ලේ පිහිටි අනිකුත් රේඛා සලකුණුත් බලා ගලපා පලාපල ප්‍රකාශ කිරීම වැදගත් වෙයි.ගලපා පලාපල ප්‍රකාශ කිරීම වැදගත් වෙයි.
හිඹුටානේ පියතිලක ද අල්විස්‌
උපුටා ගැනීම දිවයින පුවත් පත
