සුවදායි නින්දක් නොමැති නම් ඇස් යට කළු වෙන්න පුළුවන්

ඇස් යට කළු වීම සම්බන්ධයෙන් අපි දීර්ඝ වශයෙන් කරුණු සාකච්ඡා කළා ඔබට මතක ඇති. ඔබත් සතිපතා මේ ලිපි මාලාව කියවන කෙනෙක් නම් මෙහි අප සඳහන් කළ යම් යම් සරල ප්‍රතිකර්ම විධි දැනටමත් ඔබ අනුගමනය කරනවා වන්නට පුළුවන. අපි අපේ එදිනෙදා දින චර්යාව, යහපත් සෞඛ්‍ය පුරුදු සමඟත්, සෞඛ්‍යාරක්ෂිත ආහාර වේල් පිළිබඳවත් සැලකිලිමත්ව යොදා ගන්නවා නම් ස්වාභාවිකව අපමට ලැබී තිඛෙන රූපස්වභාවය ආරක්ෂා කර ගැනීම මහලොකු කාර්යයක් නොවේ. රූප ස්වභාවයට දැඩි ලෙසම බලපාන ඇස්යට කළුවීම වළකා ගැනීමට ඔබ අනුගමනය කළ යුතු තවත් සුවිශේෂී ක්‍රමෝපාය කීහිපයක් ගැන අදත් අපි ඔබට පැහැදිලි කරන්නම්. මේ තත්වය ඇතිවීම සඳහා විශේෂයෙන්ම බලපාන හේතුවක් තමයි නිදි වැරීම. එසේ නැතිනම් සුවදායක නින්දක් නොමැති වීම. ඔබ දන්නවා, යහපත් ලෙස සෞඛ්‍යය පවත්වාගෙන යාමට නම් පැය 08 ක නින්දක් අත්‍යාවශ්‍ය බව. නිදි වැරීම නිසා ඔබේ මුහුණේ සාමාන්‍ය ස්වරූපයට කිසියම් වූ වෙහෙසකර බවක් එක්වෙන අයුරු ඔබට අමුතුවෙන් පැහැදිලි කළ යුතු නොවේ. එය ඔබ අත්දැකීමෙන් ම දන්නවා ඇති. වැඩි කාලයක් නොවේ දින දෙකක් රාත්‍රි හරිහැටි නින්දක් නැතිව සිට පසුවදාට නැගිටිත් දී ඔබේ ඇස්දෙක වෙනදා මෙන් නිරෝගී නැති බව ඔබටම දැනේවි. දිගින් දිගටම මෙසේ නිදිවැරීම නිසා ඇස් යට ගිලුණු ස්වරූපයකුත් ඇස්වටේ කළුවුණු ස්වරූපයකුත් ඇතිවේ. එබැවින් ඇස් යට කළුවීම වළක්වා ගන්නට නම් අනිවාර්යයෙන් ම සුවදායී නින්දක් ඔබ ලැබිය යුතුය. පැය 06 - 07 ක නින්දක් නම් අනිවාර්යයෙන්ම අවශ්‍යයි. 

දීර්ඝව ඇස් වෙහෙස කිරීමත් මේ තත්වය සඳහා දැඩිව බලපාන බව ඔබ දන්නවාද? සමහර විට ඔබ අධ්‍යාපනය ලබන, නිතර පොත පත ඇසුරේ පාඩම් කරන යුවතියක් වන්නට පුළුවනි. අපි ඉතා හොඳින් අධ්‍යාපනය ලැබිය යුතු තමයි. පාඩම් කළ යුතු තමයි. නමුත් දීර්ඝ කාලීනව ඔබේ ඇස් පොත මත දිව යවමින් ඇස් වෙහෙසට පත් නොකරගෙන මේ ක්‍රමය අනුගමනය කරන්න. විනාඩි 15 ක් පොත් කියවූ පසු ඇස්දෙක ඉන් ඉවත්කරගෙන කිසියම් නිදහසක් ලබා දෙන්න. මනසත් නිදහස් කරගන්න. මේ ආකාරයට කළහොත් ඇස් දෙක අධික ලෙස වෙහෙසවන්නේ නෑ, අනිත් කාරණාව තමයි පරිගණක භාවිතය. වැඩි වේලාවක් පරිගණක තිරය දෙස බලා සිටීමද ඇස් යට කළුවීමට හේතුවක්. ඒ නිසා පරිගණක භාවිතයේදීත් වරින්වර තිරයෙන් ඇස් ඉවතට රැගෙන කිසියම් නිදහස් වීමක් ඇස් දෙකට ලබා දිය යුතුයි. 

මුහුණට නිතර නිතර මේක් අප් (Make up) යොදන අයද ඇස් යට කළු වීම පිළිබඳ පරිස්සම් විය යුතුයි. සමහරවිට මුහුණට යොදන මේක් අප් ඇස්යට තැවරීමෙන් සම දුර්වර්ණ විය හැකිය. විශේෂයෙන්ම මුහුණට හා ඇස අවට ආලේපනය කරන ක්‍රීම් වර්ග under - eye ක්‍රීම් ආදිය මිලදී ගැනීමේදී නියම ප්‍රමිතියකින් යුතු ආලේපන වර්ග තෝරා ගැනීමටත්, ඒවා කල් ඉකුත් වී තිබේද යන්න ගැන හොඳින් පරීක්ෂා කර බලා ගැනීමටත් ඔබ සැලකිලිමත් විය යුතුය. එසේම කිසිම මොහොතක මුහුණට පාවිච්චි කරන ක්ලෙන්සර් ක්‍රීම්, ස්ක්‍රබ්, ටෝනර් ආදිය ඇස් යටට පාවිච්චි කළ යුතු නොවේ. ඒ සඳහා ඇස යට පවතින සියුම් සමට හානිදායක නොවන ක්‍රීම් වර්ග හා අනෙකුත් ආලේපන වර්ග වෙනම ඇත. 

උපුටා ගැනීම සිළුමිණ