විසිරුණු පෙති යළි මලක් නොවෙයි නැඟණී
මෑතකදී මට පැමිණි ඊමේල් පණිවුඩයකින් මම යළිත් කලබලයට පත් වුණා. ඇයට ජීවිතය එපා වෙලා ඇති බවත් වැඩි කලක් යන්න කලින් ජීවිතය නැති කර ගන්නා බවත් ඇය එහි සඳහන් කරලා තිබුණා. එසේම ඇය ළඟ දැනටමත් නිදි පෙති 100ක් විතර තියෙන බව පැවසුවා. කෙසේ හෝ ඇය හිත සැහැල්ලු කර ගන්න ඇයගේ කතාව මට ඊ මේල් කරලා තිබුණා. අන්තිමේට ඇය මට කතා කළා. මා හැකි පමණින් ඇයට ජීවත්වීමේ වටිනාකම පැහැදිලි කළා. ඇය මුලින්ම අංශක 40කින් විතර වෙනස් වුණා. නැවත වරක් ජීවිතය වෙනස් කරන ලේඛකයෙක් වීමේ සතුට මම අත්වින්දා. එවැනි අතිශය බැරෑරුම් ඊ මේල් එකක් අවම වශයෙන් මාස 2කට වරක්වත් එනවා. ඒ ගොඩක් දේවල්වලට හේතුව යෞවන ප්‍රේමය තුළ සිදු වුණ අහිමිවීම්. තමාට දැන් මැරෙන්නම අවශ්‍යයි කියන ඔවුන්ගෙන් මම අහන පළමු ප්‍රශ්නය මෙයයි. "ඔයා මැරෙන්න හදන හේතුව මට කියන්න. ඊට පස්සේ මම කියන්නම් ඒ හේතුව වෙනුවෙන් සිය දිවි නසා ගැනීම සුදුසුද? නැද්ද? කියලා.
තාරුණ්‍යයේදී ප්‍රේම සම්බන්ධතා ඇති වෙනවා. ඒවාට බාධාද එල්ල වෙනවා. වැඩිහිටියන් ජීවිතය දිගේ ගොඩක් දුර ගිහින් තියෙන නිසා ඔවුන් තම දියණිය හෝ පුතා ප්‍රේම සම්බන්ධයක් ඇති කර ගත්ත ගමන්ම "ආහ් ඔයා නියම වැඩක් කරලා තියෙන්නේ. ඕක දිගටම කරගෙන යන්න" කියන්නේ නැහැ. මන්ද යත් ප්‍රේම කිරීම සහ ප්‍රේම කරන දෙන්නා එක වහලක් යට ජීවත් වෙන්න ගියාම ඇති වෙන ප්‍රශ්න ප්‍රේමය තරම් සුන්දර නැහැ. අන්න ඒ නිසා වඩාත් සුදුසු සම්බන්ධයක් වෙත තම දරුවන් යොමු කරන්න මවුපියන් කටයුතු කරනවා. කෙසේ වෙතත් තම නංගි ප්‍රේම සම්බන්ධයක් ඇති කර ගත්ත ගමන් ඒ ගැන ලොකු අවධානයක් යොමු කරන කෙනෙක් තමයි අයියා. ඉතින් අයියා නංගිගේ ප්‍රේමයට මුලින්ම උදැල්ල දානවා. නමුත් අයියලා එහෙම කරන්නේ නංගිලාට තියෙන ආදරේට කියන කාරණය නංගිලාට අමතක වෙනවා.
තරුණ වයසේ පසුවන ගැහැනු ළමයින්ට දෙන්න අවශ්‍ය සියලුම උපදේශ ආදරයෙන් ඇතුළත් කරලා ලියවුණ අපූරු ගීතයක් වශයෙන් විසිරුණු මල් පෙති දෝතට ගත් කුමරි ගීතය හඳුන්වන්න පුළුවන්. 90 දශකයේ අග භාගයේදී අපට අහන්න ලැබුණ මේ ගීතය ළයාන්විතව ගායනා කරන්නෙ අතුල අධිකාරි. ගීතය පන්හිඳෙන් ගෙත්තම් කළේ බන්දුල නානායක්කාරවසම් කියන අපූරු ගීත රචකයා. ගීතයට සවන්දෙන විට අහිංසක පෙනුමක් තියෙන අයියා කෙනෙක් තමන්ගේ ආදරණීය නංගිගේ සමීපයට ඇවිත් ඇයට ඉතාම ආදරයෙන් උපදෙස් අයුරු පිළිබඳ චිත්ත රූප මැවෙනවා. පුංචි කාලේදී අයියා කියන්නේ නංගිගේ ලෝකයේ වීරයා. සෙල්ලම් ගෙදර තාත්තා වෙන්නේ අයියා. ඒ වගේම ඉස්කෝලේ අයියා කෙනෙක් ඉන්නවා නම් ළමයි නංගිට මුකුත් කියන්නේ නැහැ. නංගිට මේක අභිමානයක්. නමුත් නංගි වැඩිවියට පත් වුණාම ටිකක් වෙනස් වෙනවා. ඇයට පෙම්වතෙක් හමුවුණාම නංගි ගොඩාක් වෙනස් වෙනවා. අයියා ආදරයට බාධාවක් නම් ආදරණීය අයියා නංගීට එපා වෙන්නම පටන් ගන්නවා. අයියා නංගිට වඩා පිරිමි ලෝකය සහ පිරිමියා කියන සත්වයගේ මූලික ලක්ෂණ හොඳට දන්නවා. ඒ නිසාම නංගිගේ ප්‍රේමණීය වෙනස්කම් දෙස අයියා බලාගෙන ඉන්නෙ. ඇය යන පාර හරිද වැරදිද කියලා දැන ගන්න මිසක් ඇයව ඉන් අෑත් කරන්න නෙවෙයි. නමුත් ඔය කාලේදී නංගිලාට අයියාගේ ආරක්ෂාව කරදරයක් වෙනවා. ඒ වගේම ඇයට නව පෙම්වතාගෙන් ආරක්ෂාව ලැබෙනවා කියලා ඇය හිතනවා. ඒ නිසා නංගිගේ සහ ඇගේ පෙම්වතාගේ පොදු හතුරා බවට අයියා පත් වෙනවා.
විසිරුණු මල් පෙති දෝතට ගත් කුමරි
ඒ පෙති එක් කර මලක් සොයන බොළඳී....
සරදම් නොකරමි... ආදරයෙන් කියමි....
විසිරුණු පෙති යළි මලක් නොවේ නැඟණී....
විසිරුණු මල් පෙති දෝතට ගත් කුමරි... ගීතය ගායනා කරන අයියා තම නංගිට ඉතා ආදරයෙන් ඔවදනක් දෙනවා. ඔහු නංගිට ඉතා සමීප උදාහරණවලින් ලොකු කතාවක් පැහැදිලි කරනවා. ගීතය අහද්දි වෙලාවකට හිතෙනවා මේ අයියා උපදෙස් දෙන්නේ වැඩ වරද්ද ගත්ත නංගි කෙනෙක්ටද කියලා. "නංගියේ කවදාවත් විසිරුණු මල් පෙති මලක් වෙන්නෙ නැහැ. අන්න ඒ වගේ මලක් වගේ නුඹත් විනාශ වුණොත් ආයෙත් ඔයාට කලින් හිටපු ඔයාම වෙන්න බැහැ. ඒක නිසා ඕන දෙයක කරන්න කලින් ටිකක් හිතන්න. මම මේවා කියන්නේ කිසිම තරහකින් නෙවෙයි. ඉතාම ආදරයෙන්. ඔයා කැමැති නම් මේවා පිළිගන්න." අයියා නංගීට ඉතා කාරුණිකව එහෙම කියනවා.
වෙරළ සොයා රළ පෙළ දිව ආවත්
වෙරළට කිසිදා දියඹ දකිනු හැකිදෝ
බඳට පියාපත් යුවළක් ලැබුණත්
අහස දෙකෙළවර නුඹට දිනනු හැකිදෝ....
සාමාන්‍යයෙන් වෙරළ සොයාගෙන රළ පෙළ අෑත සිටම එනවා. නමුත් වෙරළට හාදු දීලා යළිත් අෑතට යන ඒ රළ පෙළ අල්ලන්න වෙරළට කවදාවත් මුහුදට යන්න බැහැ. ඉතාම කෙටියෙන් කියන්නේ මේ ලෝකයේ ගැහැනුන්ට හිතෙන හිතෙන දේවල් කරන්න බැහැ. කාන්තා සංවිධාන ගැහැනුන් වෙනුවෙන් අයිතිය ඉල්ලුවත්, ඒ අයිතිය කවදාවත් ඒ අයට ලැබෙන්නේ නැහැ. ප්‍රවීනලා, ස්වප්නලා, තුල්සිලා සහ ඔෂින්ලා ඉන්නේ පුංචි තිරයේ කතාවල විතරයි. ඒක තමයි ප්‍රායෝගික සත්‍යය. මුහුද විශාලයි. ඒ වගේම ඉතාම ගැඹුරුයි. රළ පෙළ එන්නේ ඒ අෑත ගැඹුරු මුහුදෙන්, රළ පෙළ ලස්නන සංගීතයක් වෙලා වෙරළ සිප ගත්තත් එම රළ පෙළම අෑතට ගියාම හරිම අමුතුයි. ඔයා වෙරළ නිසා ඔයා ඒක දැකලා නැහැ. පිරිමින් ඔයාගේ ආදරය දිනා ගන්න කියන කතා නෙවෙයි. ඔයා අයිති කර ගත්තම කියන්නේ. එයාලා ඊට පස්සේ ගොඩක් වෙනස් වෙනවා. මමත් පිරිමියෙක් නිසා ඒක දන්නවා. ඒක නිසා පරිස්සමින්. ගීතය තුළ අයියා නංගීට ඉතා විවෘත වන බවක් පෙනෙනවා. දැන් ඔයා තරුණ වයසේ ඉන්න නිසා ඔයාට ලොකු නිදහසක් තියෙනවා කියලා හිතෙන්න පුළුවන්. එහෙත් ඒක මායාවක් විතරයි. පෙම්වතෙක් හමුවුණාම ලෝකයම මට ලැබුණා. දැන් මට ඕනෑම දෙයක් කරන්න පුළුවන් කියලා ඔයාට හිතෙන එක සාධාරණයි. නමුත් ඇත්තටම ප්‍රේමයේදී බොහෝ වෙලාවට ඔය කියන තරම් නිදහසක් ලැබෙන්නෙ නැහැ. අනික අත් තටු දෙකක් ලැබුණත් මේ ලෝකයේ හැම දේම දැකබලා ගන්න ඔයාට බැහැ. ඇත්තටම ගැහැනුන්ට සීමාමායිම් වැඩියි. තරුණ අයියා නම් නංගිට ඉතා සියුම්ව ලෝකයේ සැබෑ සත්‍යයන් ඒ ආකාරයට පැහැදිලි කරනවා.
බඹරුන් පසුපස මල් දිව නොගියත්
අවමන් වින්දේ මල් කුලයම නොවෙදෝ
මෙදහම් නුවණින් නුඹ නොදුටුවොතින්
නුඹේ සුසුම් ගිනි බොල් අහසම නොවෙදෝ
ආදරය දිනන තුරු කෙල්ලෝ පස්සේ කොල්ලෝ එනවා. නමුත් මොනවා හරි ප්‍රශ්නයක් වුණොත් අන්තිමේට ගොඩක් වෙලාවට අවමන් විඳින්නේ කෙල්ලෝ. ගැහැනු ගොඩක් එක්ක හිටිය ප්‍රාදේශීය සභා සභාපතිවරු පාටි දාන කාලයක අනියම් සම්බන්ධතා පැවැත්වූ ගැබිනි මවුවරුන්ට ගල් ගසා මරා දමන ලෝකයක ඔබ මා ඉන්නේ කියන කාරණය අමතක කරන්න එපා. අන්න ඒ නිසා මේ දේවල් නුඹ තේරුම් නොගත්තොත් ඔයාගේ දුක අහන්න කවුරුත් ඉදිරිපත් වෙන්නේ නැති වෙයි. මෙදහම් නුවණින් නුඹ නොදුටුවොතින් නුඹේ සුසුම් කියන අවසාන පැදි පෙළ මේ ලෝකයේ සැබෑම සත්‍යයක් ඉතා වක්‍රාකාරව පවසනවා. බොහෝ පිරිමි ආදරය කරලා එකට ජීවත් වෙන්න හොයන්නේ ප්‍රශ්න තියෙන ගැහැනු නෙවෙයි. ප්‍රශ්න නැති ගැහැනු. ඔයා ප්‍රශ්නයක ඉන්නවා කියලා දැනගත්තොත් ගොඩක් අය ඔයා ඉන්න තත්ත්වයෙන් අයුතු ප්‍රයෝජන අරගෙන අන්තිමේට තවත් ප්‍රශ්න ඔයාට ඉතිරි කරලා යයි. ඔයාගේ සුවඳට ආදරය කරන්න ගොඩක් අය ළං වෙයි. නමුත් ඔයාගේ දුක් සුසුම්වලට කවුරුවත් ඇත්තටම ආදරය කරයිද කියලා හිතන්න අමාරුයි. ඒක නිසා පරිස්සමින්.
ගීතය පුරාම අයියා නංගිට කියන්නේ පිරිමින්ගෙන් පරිස්සම් වෙන්න කියලා. සමහර විට අයියා පිරිමි ගැන අනියත බියකින් පසුවෙනවා කියලා කෙනෙක්ට හිතෙන්නත් පුළුවන්. අයියා පිරිමියෙක් නිසා අයියා, අයියා ගැන හොඳට දන්නවා. එම නිසා අයියා, අයියා නියෝජනය කරන පිරිමි කුලකයේ පොදු ලක්ෂණ ඉතාම වක්‍රාකාරව නංගිට ඉතාම ආදරයෙන් පවසනවා. එසේම මේ ගීතය තවත් පැත්තකින් පිරිමි තුළ තියෙන සංවේදී බවත් පෙන්වනවා. මන්ද යත් මේ දේවල් කියන අයියාත් පිරිමියෙක්. ආදරය කියන හැඟීම තරුණ වයසෙදි ක්‍රියාත්මක වෙන්නේ හුදු මානසික ක්‍රියාවලියක් ලෙස පමණක් නොවෙයි. තරුණ වයසේ ඇති වන හෝමෝන ක්‍රියාකාරිත්වයත් ඊට බලපානවා. එසේම ස්වභාවධර්මය තුළ ඒ වන විට ක්‍රියාත්මක න්‍යායපත්‍රයත් ඊට බලපානවා. ඒ කියන්නේ ස්වභාවධර්මය වර්ගයා බෝ කිරීමේ න්‍යාපත්‍රය සිටිනවා නම් විරුද්ධ ලිංගික යුවළ ඉක්මනින් එක් වනවාට සහ පිරිමින් බහු භාර්යා සේවනය කරනවාට කැමැත්තක් දක්වනවා. ඒක ගැන ඔයාලාම හොයලා බලන්න. ඉතාම වටිනා අදහසක් ඉතාම සරලව සපයන විශිෂ්ට ගීතයක් වශයෙන් අතුලගේ විසිරුණු මල් පෙති හඳුන්වන්න පුළුවන්. පුළුවන් නම් ආයෙත් සැරයක් නිදහසේ අහන්න.
උපුටා ගැනීම මව්බිම
