This site has features that require javascript. Follow these simple instructions to enable JavaScript in your web browser.
Sithmal Yaya
විවාහය සිදුවන දිනය නිවැරැදිව කියන්න පුළුවන්ද?

කෙනකුගේ විවාහය නිසි කලටම සිදු වන්නත් තව කෙනකුට ප්‍රමාද වෙන්නත් තවත් කෙනකුට ජීවිත කාලයටම විවාහ වාසනා නොලැබෙන්නත් හේතුව කුමක්ද?

ජේ‍යාතිෂයේදී අපට එය මෙසේ විග්‍රහ කළ හැකියි. කෙනකුගේ විවාහය නිසි කලට නිසි ලෙසට නිසි වයසටම සිදු වෙනවා. විවාහ ජීවිතය අතිශය සාර්ථකයි. සියලු දේ ලැබෙනවා. ඔවුන් සතුටින් සමඟියෙන් ජීවත් වෙනවා. ඒ වගේම විවාහයෙන් පසු ටිකෙන් ටික දියුණුව සැලසෙනවා. වාසනාවන්ත දරු සම්පත් ලබනවා. ඒත් තවත් කෙනකුට මේ කිසිවක් නෑ. නිසි වයසත් ටිකෙන් ටික ගෙවිලා යනවා. රූපයෙන් අඩුවකුත් නෑ. දේපළ රැකියාව වැනි දේත් සම්පූර්ණයි. නමුත් විවාහ වාසනාව තවම ලැබී නැහැ. නමුත් අර සියල්ල නැති අයත් ඉක්මනින් විවාහ වෙලා. ඒකට හේතුව වන්නේ තම තමන් පූර්ව ආත්ම භාවවල කළ කී දේ. යහපත් ලෙස පින් කළ අයට නිසි ලෙසම විවාහය ලැබෙනවා. තව කෙනකුට කළ පව් ප්‍රමාණය මත විවාහයේ ලැබීම නොලැබීම හෝ ප්‍රමාදය තීරණය වෙනවා.

කෙනකුගේ විවාහය පිළිබඳ ජේ‍යාතිෂයෙන් නිවැරැදිවම කියන්න පුළුවන්ද?

ඔව් ඉතාම පැහැදිලිව නිවැරැදිව පවසන්න පුළුවන්. මිනිස් ජීවිතයේ බොහෝ රහස් කේන්දරයේ කොටු 12 තුළ සැඟවී තිබෙනවා. ඒක හරිම පුදුම සහගතයි. මේ ගැඹුරු ශාස්ත්‍රය දෙවියන් විසින් ඉසිවරු අතට පත් කරන්න ඇත්තේද යහපත් මිනිස් සමාජක් ගොඩනැඟීමේදී අපට අවශ්‍ය තොරතුරු කල් වේලා ඇතිව දැන ගැනීමේ පරමාර්ථය ඇතිවයි. එම නිසා ජීවිතයේ දෙවැනි උපත ලෙස සැලකෙන විවාහය තුළටද අපට මේ ජේ‍යාතිෂයෙන් බොහෝ දේ උකහාගත හැකියි. අප විසින් පෙර භවයේ සිදු කරන ලද කිසියම් අකුසල කර්මයක පලවිපාක ලෙස මේ භවයේ විවාහ ජීවිතය අවුල් වීමට, බිඳ වැටීමට හෝ ප්‍රමාදයකට මුහුණදීමට උරුම නම් එකී කාරණා කල් වේලා ඇතිව දැන ගැනීමටත් එයට නිසි පිළියම් යෙදීමටත් හැකි සාධනීය හා විද්‍යාත්මක එකම ක්‍රමය තමාගේ ජන්ම පත්‍රයයි. ඒ කියන්නේ මෙයට පිළියම් සෙවිය යුත්තේ ජේ‍යාතිෂය තුළින්මයි.

වර්තමානයේ සමාජය දෙස අවධානය යොමු කිරීමේදී විවාහය පිළිබඳ ගැටලු රාශියක් පැනනැඟී තිබෙනවා. ඇයි මෙහෙම වෙන්නේ?

වර්තමාන සමාජයේ විවාහය කියන කාරණය යම් පිරිසකට ඉතාම ගැටලුකාරී තත්ත්වයක් බවට පත් වී තිබෙනවා. ඒ වගේම තවත් පිරිසක් ඉතා සාර්ථක විවාහ ජීවිත ගත කරනවා. ඉතින් ජේ‍යාතිෂයේදී අප මේ කාරණය දකින්නේ පූර්ව ආත්ම භාවයේ කළ පව් නැත්නම් බෞද්ධ දර්ශනයට අනුව නම් අකුසල කර්ම ලෙසයි.

එසේ නම් සාර්ථක විවාහ ජීවිතයක් ගත කිරීමට ජේ‍යාතිෂානුකූලව කළ යුත්තේ කුමක්ද?

විවාහයක් සඳහා දෙදෙනකු එක්වීමේදී අනිවාර්යයෙන්ම දෙදෙනාගේම ජන්ම පත්‍ර උගත් දැනුම්වත්, අවංක ජේ‍යාතිෂවේදියකුට ඉදිරිපත් කර නිසි ලෙස පරීක්ෂාවකට ලක් කර නිසි ගැළපීමක් තිබේද යන්න පරීක්ෂා කර බැලිය යුතුයි.

එතකොට මොනවාද පොරොන්දම් බලනවා කියන්නේ?

විවාහයේදී ජේ‍යාතිෂයානුකූලව පොරොන්දම් බැලීම සිදු කරනවා. දෙදෙනාගේ උපන් නැකැත් මුල් කරගනිමින් කාරණා 20ක් සම්බන්ධව ගැළපීම හා නොගැළපීම මෙමඟින් පරීක්ෂා කර බලනවා.

විවාහය සඳහා පොරොන්දම් පමණක් බැලීම ප්‍රමාණවත්ද?

කිසිසේත්ම නැහැ. අනිවාර්යයෙන්ම විවාහයට යෝජිත දෙදෙනාගේ ජන්ම පත්‍රවල ග්‍රහ ගැළපීම ඉතාම සුපරීක්ෂාකාරීව බැලිය යුතුයි.

විවාහ ගැටලු සඳහා බලපාන විවාහ දෝෂ මොනවාද?

විවාහ දෝෂ රාශියක් බලපානවා. • භෞම දෝෂය - ලග්නයෙන් හා චන්ද්‍රයාගෙන් හා සිකුරුගෙන් 1, 2, 4, 7, 8, 12 යන ස්ථානවල කුජ ග්‍රහයා සිටීම. • කේමදෘම දෝෂය • විෂ කන්‍යා යෝගය • කඩහන්දි යෝගය • වෛවධ්‍ය දෝෂය • ස්ත්‍රීකේන්දරයේ පුරුෂ මාර යෝග • පුරුෂ කේන්දරයේ ස්ත්‍රී මාර යෝග • නාශාංශක දෝෂය • අති ධාවන කාම යෝග • 7 අධිපති හෝ සිකුරු 22 වන දෙර්කාණාධිපති වීම • බහු විවාහ දෝෂ • සිකුරු 7 අධිපති පාපකර්තරී වීම • සිකුරු 7 අධිපති 64 වන නවාංශකාධිපති වීම • 07-08 පරිවර්තන යෝගය • 07 අධිපති 8 වැන්නේ සිටීම • විවාහ කාරක සිකුරු/7 අධිපති 6, 8, 12 රාශිගත වීම • ශනි මංගල යෝගය (සෙනසුරු හා කුජ එකට යෝග වීම හෝ සප්තම දෘෂ්ටියෙන් සිටීම) • චන්ද්‍ර මංගල යෝගය (සඳු හා කුජ එකට යෝග වීම හෝ සප්තම දෘෂ්ටියෙන් සිටීම • වඳ දෝෂ

විවාහය සිදුවන කාලය නිවැරැදිවම ජේ‍යාතිෂයෙන් දැන ගන්න පුළුවන්ද?

ඔව්. නිවැරැදිවම දැනගන්න පුළුවන්. ඒ පහත ජේ‍යාතිෂ සිද්ධාන්ත අනුව විවාහය සිදුවන කාලය නිසි පරිදි දැනගත හැකියි. 1. බ්‍රහස්පති (ගුරු) ග්‍රහයා ගෝචර ගමනින් 3, 7, 11 ස්ථානවල ගමන් කරන කාලයේ විවාහය සිදුවීමට තරම් බලවත් මංගල යෝග උදාවේ. 2. රාහුගේ මහ දශා අතුරු කාලවල විවාහය යෙදීමට වැඩි නැඹුරුතාවක් ඇත. 3. හත අධිපතියාගේ මහ දශා අතුරු දශා කාලවලදීද මංගල යෝග උදාව බලවත් වේ. 4. හත අධිපති ග්‍රහයා හතේම ගෝචර කාලයේදීද යෝග උදාව බලවත් වේ. 5. ලග්නාධිපති ග්‍රහයා හතේත් හත අධිපති ලග්නයේත් ගමන් කරන කාලය.

විවාහය සඳහා 22 වන දෙර්කාණාධිපතිගේ බලපෑමක් තිබෙනවාද?

අනිවාර්යයෙන්ම. මෙම අසුබ ග්‍රහයාගේ බලපෑම එල්ල වෙනවා. විසිදෙවැනි දෙර්කාණාධිපති යනු කේන්දරයක අසුබම ග්‍රහයා. එම ග්‍රහයා විවාහ ස්ථාන සමඟ කුමන ආකාරයකට සම්බන්ධ වුවද එය විවාහයට බලපානවා.

එතකොට බාධක ග්‍රහයාගේ බලපෑමත් එල්ල වනවාද?

ඔව්. බාධක ග්‍රහයාත් විවාහ ස්ථාන සමඟ කුමන ආකාරයකට සම්බන්ධ වුවද එයත් විවාහයට බලපානවා.

විවාහය සඳහා ඇතිවන ග්‍රහ බාධා ඉවත් කළ හැකිද?

ඔව්. නිවැරැදිව අදාළ ග්‍රහ ශාන්තිකර්ම තුළින් ඉවත් කළ හැකියි.

විවාහය සඳහා ඇතිවන ග්‍රහ බාධා ඉවත් කිරීමට කළ යුතු ග්‍රහ ශාන්තිකර්ම මොනවාද?

නිවැරැදිව කේන්දර පරීක්ෂාවක් තුළින් අපට විවාහ සඳහා ඇතිවන බාධා මොනවාද කියා හඳුනාගත හැකියි. ඒ අනුව එයට අදාළ ග්‍රහ ශාන්තිකර්ම කළ යුතු වෙනවා. මේ සඳහා බෝධිපූජා, සෙත්කවි ගායනා, නවග්‍රහ පූජා යන්ත්‍ර පැලඳීම, මන්ත්‍ර භාවිතය, දේව පූජා වගේ ග්‍රහ ශාන්තිකර්ම ඉටු කළ යුතු වෙනවා. එවිට ග්‍රහ අපල දුරු කරගත හැකියි. උපුටා ගැනීම මව්බිම