කේස් නැති ස්ටෙයාර් කේස් එකකට හොඳම දිශාව

ඉංග්‍රීසි ව්‍යවහාරයෙන් ‘ස්ටෙයා කේස්’ යනුවෙන් හඳුන්වනු ලබන්නේ පඩිපෙළ බව අපි දනිමු. අතීතයේ දී පිටගැටපෙළ ලෙස හඳුන්වනු ලැබුවේද එයම වේ. කෙසේ වුවද පඩිපෙළක් යනු අපට පහත් බිමක සිට ඉහළට නැඟීමටත් ඉහළක සිට පහළට බැසීමටත් අවශ්‍ය ගෘහ අංගයක් වේ. අතීතයේදී පිටගැටපෙළ වැඩි වශයෙන් යොදා ගනු ලැබුවේ භූමියේ විසම කොටස් අතර සම්බන්ධ ඇතිකර ගැනීම සහ ගෘහයේ හෝ ප්‍රාසාදයේ පවතින තේජාන්විතභාවය සහ සශ්‍රීකභාවය ඔප් නැංවීම උදෙසා වේ. එසේ වුවද වර්තමානයේ පඩිපෙළ යොදාගනු ලබන පරමාර්ථයන් වෙනස් වී තිඛෙනවා. විශේෂයෙන්ම ගෘහයන්ගේ භූමිය මත පැතිරීමේ ඉඩකඩ සීමිත බැවින් සිරස් හැඩතලවල ප්‍රයෝජනය සඳහා පඩිපෙළ නූතනයේ අත්‍යවශ්‍ය සාධකයක් වී තිඛෙන බව කිව යුතුයි. කෙසේ වුවද ඔබගේ ගෘහයට ඔබ යොදාගනු ලබන පඩිපෙළ වාස්තු සිද්ධාන්තවලට අනුකූලව යොදා ගැනීමට මුල සිටම කල්පනාකාරී විය යුතුයි. මක් නිසාද යත් පඩිපෙළ ගෘහයක විශේෂිත වූ ගෘහ අංගයන් බැවින් එය වැරැදෙන සෑම ගෘහයකටම වාස්තු දෝෂ ප්‍රබලව බලවත් වන බව මාගේ ප්‍රායෝගික අත්දැකීම්වලින් පසක් වී තිඛෙනවා. ඔබගේ ගෘහයේ ඉහළ මාලවලට ප්‍රවේශ වන පඩිපෙළ පිළිබඳ ඔබ නිසියාකාරයෙන් දැනුම්වත්ව කටයුතු කරන්නේ නම්, ඔබගේ ගෘහයේ වාසනාව, සතුට, සැනසීම ළඟා කර ගතහැකි අතර ඒ පිළිබද නොසලකා හැර කටයුතු කරන විට ඔබට සෑම විටම අවාසනාව, කඳුළු සහ පසුතැවීම පමණක් හිමිවනු ඇත.

ගෘහයට පඩිපෙළක් යෙදීමෙන් අප බලාපොරොත්තු වන ප්‍රධාන කරුණු කිහිපයක් තියෙනවා. ගෘහ අංග අතර සම්බන්ධය, ආරක්ෂාව / සුව පහසුව, අලංකාර බව ඉහත කරුණු අතරින් නූතනයේ දී වැඩි අවධානයක් යොමු කරනු ලබන්නේ අලංකාර බවට පමණක් බව පෙනී යනවා. මෙය නිවැරැදි දැක්මක් නොවන බව පෙන්වා දිය යුතුයි. ගෘහයක් පිළිබඳ සිටින දකින ඔබ කිසිම විටක ගෘහයක බාහිර අලංකාරය ගැන පමණක් සිතන්න එපා. සැම විටම ගෘහයේ ජීවී ගුණ සහ ප්‍රායෝගික භාවිතය ගැන සිතා ගෘහය සැලසුම් කිරීමට මුල සිටම සිහිතබා ගන්න. මම මෙසේ ඔබට පවසන්නේ එවැනි නිවාස ඔබට යහපතට වඩා අයහපත ළඟා කරන බව අත්දැකීමෙන්ම දන්නා බැවිනි. මෑත කාලයේ සිදුකරනු ලැබූ නිවෙස පරීක්ෂාවන්වලදී අවස්ථා කිහිපයකදීම මා ලද අත්දැකීම් තුළින්ම පාඨක ඔබට මෙම කාරණය පිළිබඳ දැනුම්වත් කිරීමට සිතුවේ ඔබගේ යහපත සඳහාම මිස කිසිම විටක ඔබව බිය වැද්දීමේ ජනප්‍රිය වාස්තු ක්‍රමවේදයන් පිණිස නොවේ. එසේ කීමට හේතුව නූතනයේ වාස්තු නොදන්නා වාස්තු ශිල්පීන් හා ශිල්පිනියන් උදාහරණ ගෙනහැර දක්වමින් වාස්තු දෝෂ නිසා මිනිසුන් මැරෙන බවට ජනතාව තුළ මතයක් ගොඩනැංවීමට උත්සාහ කරන බැවිනි. ඍෂි දහම තුළ කිසිම තැනක වාස්තු දෝෂ බලවත් වීමෙන් මිනිසුන් මැරෙන බව සඳහන් කර නැහැ. එසේ වුවද වාස්තු ශිල්පයට පටහැනි ලෙස කටයුතු කිරීමෙන් හටගන්නා අපහසුතාවලින් මිදීම කළ නොහැකි දෙයකි. මේ ආකාරයට ගෘහයන් තුළ වැරැදි ලෙස යොදා තිඛෙන පඩිපෙළ නිසා සදාකාලීන දුබලතාවන්ට පත්වූ මිනිසුන් සිටින බව ඔබට පෙන්වා දුන්නේ ඔබට එවැනි සිදුවීම් නොවීමට ඉඩ සැලැසීම පිණිසයි. එසේම පඩිපෙළ මත වැටී ජීවිත අහිමිවූවන්ද අපමණ සංඛ්‍යාවක් දැක තිඛෙනවා. මෙවැනි ස්ථාන පරීක්ෂා කිරීමේදී ඒ සෑම පඩිපෙළක්ම සොබා දහමට විරුද්ධව ඉදිකිරීමක් බව පැහැදිලිව පෙනී යනවා. මේ නිසා ඔබගේ ගෘහයේ ඔබ යොදන පඩිපෙළ පිළිබඳ මානව වාස්තු සිද්ධාන්තවලට අනුකූලව යොදා ගත හැකිනම් එය නිවෙසට යහපත උදා කරනු ඇත. ඒ සඳහා ඔබට ඇවැසි වාස්තු ශිල්පය සඳහා ලබාදීම අපේක්ෂාවයි.

පඩිපෙළක් නැඟීම සඳහා ඉතා සුදුසු දිශාවන් :
පඩිපෙළක් නැඟීමේදී ඉතාමත්ම සුදුසු දිශාවන් තිඛෙනවා. එම දිශාවන්,

පඩිපෙළ නඟින දිශාව ඉහත සඳහන් වන අතර පඩිපෙළ යොදන දිශාවද ඉතා වැදගත් වේ. එබැවින් ඔබගේ ගෘහයේ බ්‍රහ්ම පාදයේ සිට අට දිශා සොයාගෙන පහත සඳහන් දිශාවන්හි පඩිපෙළ යෙදීමට හැකි බව සිතන්න. උතුර, දකුණ, නැඟෙනහිර, බටහිර, ගිනිකොන, වයඹ පඩිපෙළක් නඟින දිශාව සහ පඩිපෙළක් යොදන දිශාව ඔබට කියා දුන්නා. එසේම පඩිපෙළක් කිසිම විටක නොයෙදිය යුතු දිශා දෙකක් තිඛෙනවා.

ඔබගේ ගෘහයේ බ්‍රහ්ම පාදයේ සිට ඊශාන කොටසේ හෝ නිරිත කොටසේ කිසිම විටක පඩිපෙළක් යොදන්න එපා. එවැනි නිවාසවලට වාස්තු දෝෂ නිතැතින් බලපානු ඇත. මෙය විද්‍යාත්මක සත්‍යයකි. විශ්ව ශක්තිය ගෘහයට කාන්දුවන ඊශාන දිශාව පඩිපෙළක් යොදා අවහිර කළ විට විශ්ව ශක්තිය නිවෙසට එන්නේ නැහැ. එසේම පඩිපෙළක් සඳහා යකඩ භාවිත කරන අතර ඊශාන දිශාවේ චුම්බක ශක්තියට නිරාවරණය වන ආකාරය අනුව ගෘහ පද්ධතියේ අසමතුලිතතාවක් හට ගැනීම බලවත් වෙනවා. එසේම නිරිත දිශාව යනු ගෘහ හිමියාගේ බලවත් කොටසයි. එම දිශාව අවහිර වීම යනු විශ්ව ශක්තිය දුර්වල කිරීමක් ලෙස සඳහන් වෙනවා. මේ ආකාරයට කිසිම විටක නිරිත ඊශාන දිශාවන් තුළ පඩිපෙළ නොදැමීමට වග බලාගන්න. ඔබට දැනටමත් පඩිපෙළ එම දිශාවේ යොදා ඇත්නම් ඔබ කළ යුතු දේ පිළිබඳවත් ඔබට කියා දෙන්නම්. එසේ නැතිව පඩිපෙළ කඩාබිඳ දැමීමට කලබල වෙන්න එපා. ඒ සැමටම කලින් ඔබගේ පඩිපෙළ තිඛෙන්නේ කුමන දිශාවේද කියා නිශ්චිතව සැකහැර දැනගන්න. ඒ සඳහා ඔබගේ නිවෙසේ මධ්‍ය ලක්ෂයට ගොස් මාලිමාවක් තබා දිශාව සොයා ගන්න. (මාලිමාව සමඟ ජංගම දුරකතන භාවිත නොකරන්න) එවිට ඔබගේ පඩිපෙළ තිඛෙන්නේ, ඊශාන හෝ නිරිත නම් ඔබගේ පඩිපෙළ නිවැරැදි නොවන බව හඳුනා ගන්න. ඉන්පසුව වාස්තු කෙම් ක්‍රම භාවිත කොට පඩිපෙළ සක්‍රිය කිරීමට ඔබට සිදුවනු ඇත. එය ඉතාමත් සාර්ථක ශිල්පීය ක්‍රමයක් වන අතර පඩිපෙළේ සියලු දෝෂ ඉවත් කළ හැක.

ඔබගේ ගෘහයේ පඩිපෙළ තුළ ඉහත දක්වා ඇති සියලුම වැරැදි අඩුපාඩු තිඛෙන්න පුළුවන්. එසේ වුවත් එය ප්‍රායෝගිකව වෙනස් කළ නොහැකි නම් ඔබට එම දෝෂ මඟහරවා ගැනීමේ හැකියාව ද පවතින බව පෙන්වා දෙන්නේ වාස්තු ශිල්පයේ පිහිට පිළිසරණ සෑම විටම පවතින බව ප්‍රායෝගික සත්‍යයක් ලෙස වටහා දීමටයි. ‘සෑම වාස්තු දෝෂයකටම පිළියමක් තිඛෙනවා’ කියන එක කිසිම විටක අමතක කරන්න එපා. ඔබගේ පඩිපෙළ තුළ දෝෂ බලවත් නොවීමට අවශ්‍ය වාස්තු ක්‍රමවේද ඔබට කියාදෙන්නම්. ඔබගේ පඩිපෙළ වාමාවෘත්ත නම්, එම පඩිපෙළ මත ඔබගේ නිවෙස අය කී වතාවක් ඇද වැටී ඇද්දැයි ඔබම සිතන්න. ඔබගේ පඩිපෙළේ පඩි සංඛ්‍යාව ඉරට්ටේ නම්, ඔබගේ පය පැටලුණු වාර ගණන සිතන්න. ඔබගේ පඩිපෙළ ඊශාන, නිරිත නම් ඔබ පඩිපෙළ බසින නඟින විට ඔබගේ සිතිවිලි සහ වැටහීම් විරහිත වූ තත්ත්වයන්ට පත්වූ අවස්ථා සහ පඩිපෙළ මත සිටියදී ඔබට දැනෙන හැඟෙන අයහපත්දෑ පිළිබඳ මොහොතක් මෙනෙහි කරන්න. ඒ සෑම දෙයක්ම සිදුවී ඇත්තේ සොබාදහමට විරුද්ධව ඔබ විසින් යොදාගත් පඩිපෙළ තුළ මතු වී තිඛෙන වාස්තු දෝෂ බලවත් වී නිසා වේ. එබැවින් ඔබ සෑම විටම පඩිපෙළ සඳහා දැව භාවිත කිරීමට මතක තබා ගන්න. කිසිම විටක පඩිපෙළකට ටයිල් අල්ලන්න එපා. දැනට ඔබගේ ඉහත දෝෂ ඇත්නම් පඩිපෙළ මතට දැව එකතු කොට ඔබගේ ජන්ම නැකැතට ගැළපෙන දැවය තෝරා ගෙන පඩිපෙළ සක්‍රිය කරගන්න. ඔබගේ පඩිපෙළේ තිඛෙන සියලු දෝෂ මඟහැරී යනු ඇත.

මේ නිසා ඔබගේ ගෘහයට අයහපත් අවාසනාව බලවත් නොවන නිසා පඩිපෙළ යොදා ගැනීමට මුල සිටම මතක තබා ගත යුතු අතර දැනට ගෘහයේ යොදා ඇති පඩිපෙළ නිසියාකාරයෙන් අධ්‍යයනය කොට දෝෂ ඇත්නම් ඉහත උපදෙස් පරිදි පඩිපෙළ සක්‍රිය කොට අනාගත අවදානම්වලින් කල්ඇතිව ආරක්ෂා වීමට ඇවැසි කුසල් ශක්තිය වර්ධනය වේවා.

වාස්තු විද්‍යා විශාරද, ශාස්ත්‍රවේදී පේරාදෙණියේ ඩී.යූ. සෙනරත්
උපුටා ගැනීම මව්බිම පුවත්පත