පැරණි වලව්වල වාස්තු දෝෂ තිබේද?
අප
දැනට ජීවත්වන නිවාසවලට අමතරව විවිධ ආකාරයේ හැඩයෙන් සමන්විත පාරම්පරික
පැරණි වලව් නිවාස ශ‍්‍රී ලංකාවේ නොයෙකුත් ප‍්‍රදේශවල දක්නට ඇත. විශේෂයෙන්
පැරණි ඉතිහාසයේ සිංහල රාජ පරම්පරාවෙන් පැවත එන වලව් නිවාස, දේශපාලනමය
ප‍්‍රභූවරුන්ගෙන් පැවත එන වලව් නිවාස, වෙද පරම්පරාවෙන් පැවත එන වලව් නිවාස,
ප‍්‍රසිද්ධ ගත් කතුවර ප‍්‍රභූන්ගේ වලව් නිවාස ප‍්‍රසිද්ධ ගුප්ත හා
නක්‍ෂත‍්‍ර ආචාර්යවරුන් සිටි නිවාස මේ ආදී විවිධ හැඩ ගත් වලව් නිවාස ඒ ඒ
පරම්පරා සතු වී තිබී දැනට නටබුන් වෙමින් පවතී. සමහර ඒවා කඩා අස්කර ඇත.
සමහරක් අද වනවිට හොඳින් රැකවරණ යටතේ පවතී. කළුතර දිස්ත‍්‍රික්කයේ හොරණ
ප‍්‍රදේශයේ මෙවැනි වලව් නිවාස කීපයක් ඇති අතර ඉන් සමහරක් වල් බිහිවී නටබුන්
වී ඇත. විශේෂයෙන් මෙහිදී අප බැලිය යුතු වන්නේ මෙම වලව් නිවාස
අද වනවිට කිසිම හිමිකරුවකු පරම්පරාවෙන් හෝ නොමැතිව පාළුවට ගොස් විනාශ වන්නේ
කුමක් නිසාද? යන්නයි. අප දැනට ජීවත්වන නිවාස ගැන පරීක්‍ෂා කිරීමේදී බලවත්
වාස්තු දෝෂ මත එම නිවාස හිමියන් පවුල් අසමගි වී හෝ දරුණු රෝග තත්ත්වයන්ට
යොමු වී ජීවිත විනාශ වීම නිසා හෝ පාළු වී කැලෑවට ගොස් ඇති ආකාරයන් මුණගැසී
ඇත. එසේ නම් මෙම වලව් නිවාසවලත් තද බල වාස්තු දෝෂ තිබිය යුතු බව අපට හැගේ. විශේෂයෙන් පරම්පරාව පවා විනාශ වන අවසන් වන බලවත් වාස්තු දෝෂ නැතුවා
නොවේ. ඒ ගැන මෙතැන් සිට විස්තර කරමු.
බොහෝ
වලව් නිවාසවල ජීවත් වූ ගම්මුලාදෑනි, මුහන්දිරම්, ගම්පති, ආදී විශේෂ
නම්වලින් යුක්ත පැරණි ප‍්‍රභූවරුන් මිය ගියාට පසුව ඒවා භූමදාන කිරීම, හෝ
තැන්පත් කිරීම සොහොන් කිරීම එම වලව් ඉඩමේම සීමාවක සිදු වී ඇත. සිහිවටන
කුලූනු ඒ අද්දරම ඉදි කර ඇත. විශේෂයෙන් නිවස ඉදිරිපිටම කා හටත් පෙනෙන ලෙස
ඒවාට වැඩි ඉඩ කඩක් වෙන් කර ඇත. වාස්තු පොත පතේ පැරණි පඬිවරුන් පෙන්වා දෙන
පරිදි පදිංචි නිවාස අසල හෝ සුසාන භූමි අද්දර නිවාස හිමියන්ට නොයෙකුත් කරදර,
අසමගිය ඇතිවන බව සත්‍යතාවය අද බොහෝ අවස්ථාවල පැහැදිලි වේ. කෙසේ නමුත් තම
ඉඩමේ නිවස අසලම ඉතාම අසුබ වේ.
පැරණි වලව් නිවාස අවට විශාල ඉඩ ප‍්‍රමාණයක් ඇති අතර අක්කර සිය ගණන්
භූමියක් ඇත. ඒවා තුළ පොල්, අඹ, කොස්, නා ගස්, දෙල් ගස් සියඹලා වැනි
ගස්වලින් පිරී පැවතීම නිසා අඳුරු ස්වභාවය, නිශ්ශබ්ද පරිසරය පැතිරී ඇත.
වාස්තු විද්‍යාත්මකව ජන ශූන්‍ය පාළු ස්ථාන ජීවිතයට නොයෙක් කරදර ගෙන දෙන බැවින්
අසුබදායක බව සඳහන් වේ. එවැනි ස්ථාන ආගමික පරිසරයකට සුබදායක වේ.
විශාල වලව් නිවාසවල ඇතුළත බ‍්‍රහ්මපාදය හා ගිනිකතුර නිතර නිතර පෑගෙන එහා
මෙහා ගමන් කරන ස්ථානයකට යොමු වී තිබෙන අවස්ථා මා දැක ඇත්තෙමි. මෙය ඉතා
අසුබදායක වාස්තු දෝෂයකි. අසුබදායක පාදයක ගේ මැදට මධ්‍ය රේඛාවට අසුවන ලෙස
ඉදිරිපස ප‍්‍රධාන දොරට කෙලින්ම පිටුපස පිටවන දොර ද තබා පිටත පෙනෙන ආකාරයට
තබා තිබීම බලවත් වාස්තු දෝෂයකි. ඒ අනුව බ‍්‍රහ්මපාදය හා ගිනිකතුර හරහා නිතර
ගමන් කෙරේ. ප‍්‍රධාන දොර ඉදිරිපස පල දෙකේ පොටිකෝව මෙයද පැරණි
වලව් නිවාසවල බොහෝ විට දක්නට ඇත. මෙහි යට ලී 3 ක් වන අතර මැද ප‍්‍රධාන
යටලීය ප‍්‍රධාන දොරේ හරි මැදට එල්ල වී ඇත. ඉතාම තදබල වාස්තු දෝෂයක් වන අතර
පැරණි වලව් හිමියා හදිසියේ මිය යෑමෙන් පසු සහෝදර විරුද්ධකම් මධ්‍යයේ ආරවුල්
ඇතිවී ඉඩම් බෙදාගෙන පසුව ඒවා විකුණා දමා වලව් නිවාසය ද කඩා අස්කර ඇත.
එවැනි ස්ථාන මා දැක ඇත්තෙමි. තවත් එවැනිම ස්ථානයක වලව් හිමියා පමණක් ජීවත්ව
සිටියදී හදිසියේ රාත‍්‍රියේ නිවස තුළ රෝගාබාධයකින් මිය ගොස් සිටියේලූ. එම
වලව්ව ද දැනට අස්කර ඇත. එහි පාලනය කවුද කියා නොදනිමි.
වලව් නිවාසවල සිව් දිසාවෙන්ම නිවස මැද බ‍්‍රහ්මපාදය පෙනෙන ආකාරයට උළුඅහු
හා ජනේල පිහිටා ඇත. ප‍්‍රධාන දොරට එල්ලවන සේ පිටුපස දොර. ඒ සමග අනෙක් පැති
දෙකේ විශාල ජනෙල් දෙක. ඒ අනුව ගේ මැදට සිව් දිසාවෙන්ම ආලෝක ධාරාව වැටී ඇත.
විදුලි පන්දම් හතරක් සිව් දොරට තුළින් දැල්වුව හොත් එය නියම ආකාරයෙන් ගේ
මැද ආලෝක කුරුසය හට ගනී. මෙය ඉතාම දොස් සහිත වාස්තු දෝෂයකි. පරම්පරාව
ආරවුල් මධ්‍යයේ විනාශ වේ.
මෙය අලංකාර ලෙස ලීයෙන් පමණක් සාදා ඇත. වරදකට ඇත්තේ ගේ මැද බ‍්‍රහ්ම
පාදයෙන් ආරම්භවීමය. නිතර එම ස්ථානය පෑගේ. ඒ අතරම නිවසේ සිටින ආරක්‍ෂක
සුරතල් සුනඛයා නිදා සිටින්නේ එතැනයි. හිමිකරු මුහන්දිරම් තුමා හාන්සි
පුටුවක වැතිර සිටිමින් පඩික්කම තබා බුලත් කෙළ ගසන්නේ එතැනය. මෙවැනි හේතූන්
මත එම වලව් වාස්තු දෝෂ අනුව විනාශයට ගොස් ඇත.
වත්තේ ප‍්‍රධාන ගේට්ටුවට කෙලින් ප‍්‍රධාන දොර හා පිටුපස දොර එක එල්ලේ
තිබීම. මෙය සතුරු කරදරවලට හේතුවන අතර ඉතා අසුබදායක වේ. නිවසේ දරුවන් අතර
අසමගිය ඇතිවන අතර දේපළ ආරවුළ ඇති වේ.
ප‍්‍රධාන දොර උළුඅස්සේ සිට අඩි 25 ක් පමණ දුරින් දොරට එක එල්ලේ කෙලින්ම
විශාල නා ගසක් මුළු මිදුලම ආවරණය වන ලෙස එක්තරා වලව් නිවාසයක අලංකාර ලෙස
වවා තිබුණේය. ඉතා සිහිල් සෙවනක් තිබුණ නමුත් පළාතම අඳුරු වී තිබුණි.
රාත‍්‍රි කාලයේ එම ගසේ අතු අතරින් නොයෙකුත් අදෘශ්‍යමාන චායාවන් මතුවන බව
එහි සිටින අසල පදිංචිකරුවෙකුගෙන් දැනගන්ට ලැබුණේය. කෙසේ නමුත් එහි පරම්පරා
හිමිකරුවන් කිසිවෙක් නැත. මිය ගොස්ය. දැනට එය මිලදී ගත් ව්‍යාපාරිකයන්
සියල්ල අස්කර වලව් නිවසද කඩා ඉවත් කර භූමිය පමණක් ඇත. හිමිකරුවන් අතර සහෝදර
කොටස් බේද වී සිටින පළාතක්වත් නොදනී. මෙහි ප‍්‍රධාන වාස්තු දෝෂය වූයේ දොර
කෙලින් තිබූ විශාල නා ගසයි.
රත්නපුර ප‍්‍රදේශයේ වලව් නිවාසයක නාන කාමරය, වැසිකිළිය, හා වැසිකිළි වළ
මේ සියල්ල ඊසාන කෙළවර මුල්ලටම තිබූ අතර වැසිකිළි වළ ඉතා විශාල වන අතර එය
වලව් නිවසේ මුල්ලට කැපී ගොස් තිබුණි. කෙසේ නමුත් එහි පරම්පරාවම අවසන් වී
ඇති අතර වලව් හිමියා නිධන්ගත රෝගයකින් දුක්විඳ මිය ගොස් ඇත. දැනට එය ව්‍යාපාරිකයන් අලූත්වැඩියා කර සකස් කර ඇත. නමුත් මෙම ස්ථාන දියුණුව කරා යෑමේදී නොයෙකුත් බාධා ගෙන දෙනවා ඇත.
සමහර වලව් නිවාසවල ඇතුළත වහළයේ යටලී දක්වා හරස් බිත්ති උස්සා ඇත. ගේ මැද
සාලයේ දෙපස කැටයම් කළ කණු දමා තොරණක ආකාරයෙන් බිත්තිය උස්සා ඇත. මෙවැනි
ස්ථානයක මුදුන් යටලීය පිරිද්දුම් 3 කින් යුක්තව ගේ මැද ගිනිකතුරට එක් පිරිද්දුමක් ලම්බක වී තිබුණේය. කෙසේ නමුත් සොයා බැලූවිට එහි
හිමිකරුවන් දෙවැනි පරම්පරාව ද අවසන් වී ඇත. දැනට ඒ සියල්ල කඩා අස්කර
ව්‍යාපාරිකයන් සතු වී ඇත.
පල හතරට ගසා
තිබූ විශාල වලව් නිවාසයක වහළයේ යටලීය කෙළවරින් හතර දිසාවට මූල පරාල 4 ක්
මැද කූඩුව දක්වා විහිද ගිය අතර එතැන් සිට බිත්ති මුළු 4 දක්වා විහිදී අවසන්
වී ඇත. ඒ අතර උඩ යටලීයේ කෙළවර මූණතට තවත් පරාලයක් ගැසීමෙන්
සොහොන් පරාලය නිර්මාණය වේ. යටලීයේ දෙපස කොන් දෙකටම ඒ ආකාරයෙන් ඇණ ගසා පරාල
සවි කර ඇත. එවිට සොහොන් පරාල දෙකකි. එහි මුල් වලව් හිමියා තදබල රෝගයකින්
වලව්ව තුළම ගෙල වැලලාගෙන මිය ගොස් සිටියේලූ.
මෙය තනිකරම අපිරිසිදු භූත ගුහාවකි. තරප්පු පේලියේ නැග එයට ඇතුළු වූ වහාම
සිහි විකල් වේ. එතරම්ම අපිරිසිදු තත්ත්වයට ලක් වී ඇත. වසර 100 කටවත් සුද්ධ
කර නැත. එදා මුහන්දිරම් තුමාලා, ප‍්‍රයෝජනයට ගත් හැලි වළං දඬුකඳ, වංගෙඩි
මෝල්ගස් මේ සියලූ දේවල් මකුළු දැල්වලින් දුවිල්ලෙන් වැසී ඇත. පසුගිය කාලයේ
ටෙලි නාට්‍ය සඳහා මෙය ප‍්‍රයෝජනයට ගත්තේය. නමුත් කිසිම අයකුට මෙහි නතර වී
රාති‍්‍රයක් සිිටිය නොහැක. තදබල ගුප්ත දෝෂ වාස්තු දෝෂ පිරී තිබුණි. දැනට
මෙහි ඉතිරි වි ඇත්තේ ප‍්‍රධාන ගේට්ටුව හා අවට කණාටු ගැසුණ පොල් ගස් පමණි. වරින්වර මා යන වන්දනා ගමන්වලදී පැරණි වලව් නිවාසයක් නිරීක්‍ෂණය කිරීම
මාගේ කාර්යයක් නිසා ඒ අනුව රැුස්කර ගත් කරුණු පදනම් කරගෙන මෙම වාස්තු දෝෂ
ඉදිරිපත් කළෙමි. කෙසේ නමුත් ළගදී මෑතකදී ගිය විට ඒ සමහර වලව් නිවාස කඩා
දමා ඉතිරිව තිබුණේ නටබුන් හා ගස් කොළන් පමණි. සමහර ඒවා නව පන්නයට වාස්තු
දෝෂ ඉවත් කර වෙනස් කර ඇති නිසා පැරණි වලව් ස්වභාවය පෙන්නුම් නොකෙරේ. නමුත්
දැනට ඉතිරි වී ඇති රත්නපුර ඇඹිලිපිටිය ප‍්‍රදේශයේ ප‍්‍රසිද්ධ වලව්වක් ඇති
අතර එය කා හටත් සිත් ගන්නා සුළු පැරණි වලව් පරම්පරාවේ ශ‍්‍රී විභූතිය දැනගත
හැකිවේ.
ජ්‍යෝතීර්වේදී : ජේ. ගුණපාල
උපුටා ගැනීම දිවයින
