වාසනාවන්ත කේන්දර හිමියෝ
ලග්නාධිපති ග්‍රහයා මෙන්ම පුණ්‍යස්ථානය හෙවත් කෙන්දරයෙහි නව වැන්නෙහි තත්ත්වයද, එහි අධිපති ග්‍රහයාගේ පිහිටීම කෙරෙහිද (විශේෂයෙන් නවාංශක සටහනෙහි තත්ත්වය ඇසුරෙන්) අවධානය යොමු කිරීමෙන් මේ තත්ත්වය තවදුරටත් පැහැදිලි කර ගත හැකිය.
ජන්ම කේන්දරයක ග්‍රහයන් කිහිප දෙනකු බලවත්ව පිහිටීමත්, ඊට සුබපල දෙන යෝගයක් සම්බන්ධව තිබීමත් ජන්මියාගේ දියුණුව ගෙන දීමට හේතු වේ. හිටපු ජනාධිපති ඩී.බී. විජේතුංග මැතිතුමාගේ කේන්දරය එවැනි ග්‍රහ පිහිටීම් තුළින් කැපී පෙනේ.
එතුමාගේ කේන්දරයේ ත්‍රිකෝණස්ථාන අධිපති සිකුරු ග්‍රහයා හා කර්මස්ථානාධිපති ගුරු ග්‍රහයා සංයෝගව දහ වැන්නේ පිහිටීම, රටේ උත්තරීතර තනතුරු හිමිවීමට හේතු විය. එය ගුරු හංස යෝගය මෙන්ම මාලවී යෝග බලයද ගෙන දීම නිසා එම තනතුර හිමි වූයේ කිසිවකු නොසිතූ ආකාරයට හදිසි අවස්ථාවකදීය. (82° වැනි නවාංශක අධිපති සඳු ග්‍රහයා ස්වක්ෂේත්‍ර බලයෙනි) මෙය තවදුරටත් පැහැදිලි කරන්නේ නම් ස්වක්ෂේත්‍ර හා වර්ගෝත්තම බලයෙන් පිහිටි සඳු ග්‍රහයාගේ මහ දසාවේ, කේතු අතුරු දසාව හා සඳු ග්‍රහයාගේ විදසාවේදී අප රට ජනාධිපති තනතුරට පත් වූයේ ප්‍රේමද‌ාස ජනාධිපතිතුමාගේ හදිසි අභාවය නිසාය. කේතු-රහස් ගුප්ත ග්‍රහයකු වන නිසා නොසිතූ විරූ අවස්ථාවක ජනාධිපති පදවිය හිමිවිය. (තවද ජනාධිපති ප්‍රේමද‌ාස මහතා ජීවතුන් අතර සිටියදී පක්‍ෂයේ වෙනත් ජ්‍යෙෂ්ඨ සාමාජිකයන් සිටියදී පවා විජේතුංග මහතා අගමැති තනතුරට තෝරා පත්කර ගන්නා ලද්දේ ද ඉහත කී ග්‍රහ තත්ත්වයේ බලපෑම නිසා බව තවදුරටත් පැහැදිලි වේ)
ලග්නාධිපති බුද ග්‍රහයා හා අටවැන්නාධිපති මෙන්ම නවවැන්නාධිපති ශනි ග්‍රහයා සමග පරිවර්තනය යෝගයද, දීර්ඝායු වැලඳීමට උපකාරී විය. එතුමා ගුරු ග්‍රහයාගෙන් උපත ලැබීමත්, අනතුරුව ශනි- බුද- කේතු- සිකුරු- රවි- සඳු - කුජ හා රාහු යන ග්‍රහයන් නව දෙනාගේ දසාවන් තුළ ජීවන ගමන ගෙන යාමට තරම් වාසනාව උද‌ා වූයේ ද ජන්ම පත්‍රයේ බලවත් ග්‍රහ පිහිටීම නිසාය.
අයස්ථානාධිපති කුජ ග්‍රහයා දෙවැන්නේ (ධනස්ථානය) බලවත් සඳු ග්‍රහයා සමග නීච භංග රාජ යෝගයක් උද‌ා කරමින් පිහිටි ධන යෝගය, අන් සතු ධනය හිමිවීමට උපකාරි වූ බව පැහැදිලි වේ. මෙසේ වීමට හේතු වූ කරුණු තවදුරටත් ග්‍රහයින් බලවත් වීම සලකා බලමු. එනම් කීර්ති ස්ථානය අධිපති රවි ග්‍රහයා භාග්‍යස්ථානයේද, ධනස්ථාන අධිපති සඳු ග්‍රහයා ස්වක්ෂේත්‍ර හා වර්ගෝත්තම බලයෙන්ද පිහිටීම නිසා සමාජයේ කීර්තිමත් පුද්ගලයකු මෙන්ම ධනය පහසුවෙන් ලබා ගැනීමටද හැකියාවක් පෙන්නුම් කෙරේ.
ලග්නාධිපති මෙන්ම සිව්වැන්නාධිපති බුද ග්‍රහයා භාග්‍යස්ථානය හෙවත් නවවැන්න අධිපති ශනි ග්‍රහයා සමග පරිවර්තනය යෝගයද, 12 වැන්න අධිපති සිකුරු ග්‍රහයා ‘‘මාලවී යෝග’’ බලයෙන්ද, අයස්ථානය හෙවත් එකොළොස්වැන්න අධිපති කුජ ග්‍රහයා නීච භංග රාජ යෝගයක් වශයෙන්ද, සත්වැන්න හා දසවැන්න අධිපති ගුරු ග්‍රහයා ‘‘හංස යෝග’’ යෙන්ද ආදී වශයෙන් බලවත් ග්‍රහ පිහිටීම් රාශියකින් යුත් ජන්ම කේන්දරයක් හිමිවීම පෙර භවයෙහි කරන ලද ඉමහත් පුණ්‍යකර්මවල ප්‍රතිඵලයක් බව සඳහන් කරනු කැමැත්තෙමු.
පහත දැක්වෙන්නේ එවැනිම බලවත් ග්‍රහ පිහිටීම් සහිත ජන්ම පතකි. එය අප රට සිනමා ක්ෂේත්‍රයේ ප්‍රවීණ හා ජනප්‍රිය නිළියකට අයත් කේන්දරයකි.
ලග්න භාවයේ නවවැන්න හා දසවැන්න අධිපති ග්‍රහයන්ගේ සංයෝගය හෙවත් ‘‘ධර්මකර්මාධිපති යෝගය’’ නීච භංග රාජ යෝගයක් වශයෙන් වැඩි ගුණාත්මක ඵල ප්‍රද‌ානය කෙරේ. එසේම ‘‘ගුරු හංස යෝගය’’ ක් ලෙසද දක්නට ලැබේ.
බලවත් සෙනසුරු ග්‍රහයා සිව්වැන්නේ පිහිටීමෙන් යෙදෙන ‘‘සස යෝගය’’ අලංකාර නිවසක් මෙන්ම යාන වාහන හිමිකාරියක් වීමට වාසනාව ළඟා කර ඇත. සෙනසුරු ග්‍රහයා, සත්වැන්න නියෝජනය කරන බැවින්, උසස් ආර්ථික තත්ත්වයක් හිමි වූයේ විවාහයෙන් පසුව බව පැහැදිලි වේ. තවද, අැය උසස් තත්ත්වයේ චිත්‍රපට නිෂ්පාදනයෙන්ද ඉදිරියෙන් සිටින කෝටිපති ව්‍යාපාරික කාන්තාවක්ද වේ.
සෙනසුරු ග්‍රහයා තුලා රාශියෙහි බලවත් වීම නිසා. ‘‘සේනක යෝගය’’ ද පිහිටන බැවින්, දේශපාලන ක්ෂේත්‍රයේදී මුහුණ දීමට සිදුවන කරදර බාධක කිසිවක් ගණන් ගන්නේද නැත. එමෙන්ම ඉදිරියට යාමේ නොසැලෙන අධිෂ්ඨානය උපතින්ම පිහිටියේ මෙම ‘‘සස යෝග’’ යේ බලවත්කම නිසාය.
උපුටා ගැනීම ලංකාදීප
