දරු පිළිසිඳ ගැනීමකදී පත්තිනි මෑණියන්ට බාරයක් වෙන හැටි...
පත්තිනි මෑණියන් කුඩා දරුවන්ට මහත් සේ ආදරය කරන දෙවඟනකි. අම්මා කෙනකු තම දරුවන්ට කොතෙක් ආදරේ කරන්නා සේ පත්තිනි මෑණියන්ද දරුවන් කෙරෙහි විශේෂ වූ ආදරයක් දක්වන්නීය. ඔවුන් ආරක්ෂා කරන්නීය. මේ නිසා අෑත අතීතයේ පටන් අපේ මුතුන් මිත්තන් තම දරුවන් වෙනුවෙන් පිහිට පැතුවේ පත්තිනි මාතාවගෙන්ය. දරුවන් නොමැති කාන්තාවන් දරු සම්පතක් බලාපොරොත්තුවෙන්ද දරුවන් ලැබෙන්නට සිටිනා මවුවරුන් දරු සම්පත ආරක්ෂා කරගැනීම වෙනුවෙන්ද දරුවන්ට සිදුවන රෝග පීඩා ආදියෙන් ආරක්ෂා කර ගැනීම ඇතුළු කරුණු කාරණා වෙනුවෙන් පත්තිනි මෑණියන්ට බාරහාර වෙති. පත්තිනි මාතාව කෙරෙහි විශ්වාසය පදනම් කරගෙන පවත්වාගෙන යනු ලබන පුද පූජා මෙන්ම චාරිත්‍ර විධි, සිරිත් විරිත් පළාතෙන් පළාතටද ඇතැම් ප්‍රදේශයෙන් ප්‍රදේශයට වෙනස් වන අවස්ථාද දකින්නට ඇත. තරුපති පාඨක ඔබ වෙනුවෙන් අද ඉදිරිපත් කරනුයේ පිළිසිඳගත් දරු සම්පතක් වෙනුවෙන් නිවැරදිව පත්තිනි මෑණියන්ට බාරයක් වෙන ආකාරය පිළිබඳවයි.
විශේෂයෙන්ම දරුවකු කුස තුළ සිටින මවක් නොකළ යුතු අකැප දේවල් බොහෝමයකි. පොල් ගැසීම, පොල් බිඳීම, බිත්තර කැඩීම සහ තැම්බීමද නොකළ යුතු බව අතීතයේ සිට එන පිළිගැනීමකි. එමෙන්ම එම වකවානුව තුළ ගැබිනිය ජීවත්වන නිවෙසේ ඇණ ගැසීම, වහලය වෙනස් කිරීම, බිත්ති බැඳීමද සිදු නොකරයි. එසේම එම තැනැත්තියට දෙහි කැපීමද හොඳ නැත. ඇතැම් ප්‍රදේශවල නූල් ගැට ගැසීම පවා සිදු නොකරයි. මෙයින් අදහස් කරනුයේ හිරකිරීම්, බිඳීම් හොඳ නැති බවයි. ඒ තුළින් මවට දරු ප්‍රසූතියේදී යම් බාධක අවහිරවලට ලක්වීමට ඉඩ ඇති බවත් දරුවාටද ඉන් අනිටු ප්‍රතිඵල අත්වීමට හැකියාව ඇති බව අතීතයේ සිට එන පිළිගැනීමයි. අපේ උතුම් ප්‍රාර්ථනාව නිරෝගී දරු සම්පතක් මෙලොවට බිහිකර ගැනීමයි. එහිදී මවද අතහැර සැලකිය නොහැකිය. මේ දෙදෙනාම නිරෝගීව කරදරයකින් බාධකයකින් තොරව සිටීම වැදගත්ය. එසේ හෙයින් අද අප ඔබට කියා දෙන්නේ ගෙදරදීම නිවැරදිව මෙවැනි බාරයක් වන ආකාරය පිළිබදවයි.
නිදන කාමරයක හෝ වැසිකිළි අසල වැනි අපිරිසුදු ස්ථාන නොමැතිව නිවෙසේ පිරිසුදු ස්ථානයක් තෝරා ගන්න. මේසයක් මත සුදු හෝ කහ පාට පිරිසුදු රෙදි කැබැල්ලක් එළන්න. තිබේ නම් පත්තිනි මාතාවගේ පින්තූරයක් හෝ පිළිමයක් ඒ මත තබන්න. ඒ ඉදිරිපසින් එළඟිතෙල් පහනක් සකස් කර ගන්න. පර නොවූ කහ මල් කිහිපයක්ද හඳුන්කූරුද තබන්න. ඊශාන දිසාව බලාගෙන මේ පහන දැල්වීමට සකස් කර ගන්න. පිරිසුදු කැකුළු හාල් කැට දෙකක පමණ ප්‍රමාණයක් පිරිසුදු මැටි භාජනයකට දමාගන්න. දැන් පඬුරක් ගැට ගැසිය හැකි ප්‍රමාණයේ සහ අඩියක් දිග අඩි භාගයක් පළල ප්‍රමාණයේ තවත් පිරිසුදු රෙදි කැබැලි දෙකක්ද කහ වතුරෙන් සේදූ පඬුරක්ද (තඹ කාසියක් සුදුසු නැත.) සූදානම් කරගන්න.
සෙනසුරාදා හෝ බදාදා යන කෙම්මුර දිනයක පත්තිනි මෑණියන්ගේ දේව බැල්ම වැටන පෙ.ව. 11.36ත් 12.00ත් අතර කාලයක මෙම බාර වීම කරන්න. ප්‍රථමයෙන්ම ගෙදර සියලුදෙනා බුදුන් වැඳ ආශීර්වාදය ලබා ගන්න. විහාරස්ථානයකට ගොස් මේ ආගමික කටයුතු කර අදාළ කාලයට පෙර නිවෙසට පැමිණීමට හැකි නම් වඩා හොඳයි.
මුලින්ම ගැබිනි මාතාව සහ සිය ස්වාමිපුරුෂයා විසින් පත්තිනි මෑණියන් වෙනුවෙන් තබා ඇති පහන සහ හඳුන්කූරු දල්වන්න. සාම්බ්‍රානි දුම් ටිකක්ද අල්ලන්න. පඬුර ගැට ගැසීමට සූදානම් කළ රෙදි කැබැල්ල මත පඬුර තබා පූජාසනය උඩින් තබන්න. ගැට ගසන්න එපා. මීළඟට දෙදෙනාගේම දකුණතින් හාල් මිටක් බැගින් ගෙන අනෙක් රෙදි කැබැල්ල මත තබන්න. දැන් සියලුදෙනාම වැඳ නමස්කාර කරගෙන පහත ගාථාව හොඳින් ඇසෙන සේ කියවන්න.
සබ්බ පාපස්ස අකරණං - කුසලස්ස උපසම්පදා
සචිත්ත පරියෝ දපනං - ඒතං බුද්ධාන ශාසනං
අනතුරුව මෙම කන්නලව්ව කරන්න.
ආයු බෝ වේවා! ආයු බෝ වේවා! ශ්‍රී සිද්ධ පත්තිනි දේවීන් වහන්ස. බුද්ධත්වය ප්‍රාර්ථනා කරන උතුම් පත්තිනි අම්මේ... මා අත හෝ, මාගේ ස්වාමියා අත හෝ, අප පවුලේ කෙනකු අත හෝ අත්වැරැද්දක්, කට වැරැද්දක් සිදු වී ඇත්නම් ප්‍රථමයෙන් සමාවන්න... ඔබ වහන්සේ මේ ලොව සියලු සත්ත්වයන්ට එක සේ පිහිට වෙනවා... ඔබ කෙරෙහි අප්‍රමාණ වූ භක්තියකින්, විශ්වාසයකින් මා විසින් ඔබ ඉදිරියේ කියා සිටින්නා වූ මේ කාරණාව දිව් කනින් අසා දිව් නෙතින් බලා ඉෂ්ටකර දෙන සේක්වා... මා කුස තුළ සිටින්නා වූ මාගේ උතුම් සම්පත වූ දරු සම්පත ආරක්ෂා කර දී මෙලොවට බිහි කරන විටත් කරදරයක්, බාධකයක්, විපතක් දරුවාටත්, මටත් සිද්ධ නොවන්නට අප ආරක්ෂා කරන්න අම්මේ... දරුවා බිහිකර මාස තුනක් ගිය තැනේදී ඔබ වහන්සේ වෙනුවෙන් කිරි අම්මාවරුන්ට දානයක් පුද කරන්නට අද දින පොරොන්දු වෙනවා... ඒ වෙනුවෙන් බාර කරන පඬුරු බාරයද, පිරිසුදුව වෙන්කළ හාල් දෙමිටද භාරගන්න උතුම් මැණියනේ....
මේ සමඟම පඬුර හිර නොකර නොවැටෙන සේ පටලවන්න. හිරකර ගැට ගැසීම හොඳ නැහැ. හාල් දැමූ රෙදි කැබැල්ලද හිර නොකර පටලවන්න. මෙදින වෙන්කළ කැකුළු හාල් දෙමිට කිරි අම්මා දානයේදී කිරිබත් හෝ කිරි කෑලි හැදීමේදී අනිවාර්යයෙන්ම ගත යුතුයි. කිරි මෑණිවරුන්ගේ දානය දී පත්තිනි දේවාලයකට ගොස් පූජා වට්ටියක් පුදකර පඬුර නිදහස් කරන්න. එතෙක් පඬුර සහ හාල් පොට්ටනිය පිරිසුදු උඩ ස්ථානයක තබන්න. බාරය වීමෙන් පසුව පත්තිනි මෑණියන් ඇතුළු සියලු දෙවි දේවතාවුන්ට ආකාසට්ටාච බුම්මට්ටා.. යන ගාථාව කියා පින් දෙන්න. පසුව, මට පිහිට වන මගේ ඉෂ්ට දේවතාවුන්ටද පින් අත් වේවා! යැයිද ප්‍රාර්ථනා කරන්න. මේ සියල්ල විශ්වාසයකින්, භක්තියකින් කරන්න.
උපුටා ගැනීම මවුබිම
