කීර්තිය ජනප්‍රියත්වය ප්‍රතාපවත් බව හෙළි කරන රවි මණ්‌ඩලය
ලෝකයේ අඛණ්‌ඩ පැවැත්මට සූර්යයා හෙවත් රවි මූලිකත්වය ගන්නා බව අපි කවුරුත් දන්නා දෙයක්‌. ඒ හා සමානව පුද්ගලයාගේ පැවැත්ම පිළිබඳව මූලික වශයෙන් රවි මණ්‌ඩලයේ පරීක්‍ෂාවෙන් දැන ගත හැකිය. මෙය සූර්ය මණ්‌ඩලය යනුවෙන්ද හඳුන්වයි. මේ සමග පළවන රූප සටහනේ වෙද ඇඟිල්ලට පහළින් කළු පාටින් සටහන්කර ඇත්තේ රවි මණ්‌ඩලයයි. රවි ග්‍රහයාගෙන් හෙවත් සූර්යයාගෙන් නිකුත් වෙන තරංග චලන ශක්‌තිය ගබඩා කරන්නේ රවි මණ්‌ඩලයයි කීවොත් නිවැරදිය. පුද්ගලයාගේ ප්‍රතාපවත් බව කීර්තිය ජනප්‍රියත්වය ජයග්‍රහණය හා කලාත්මක හැකියාවන් පිළිබඳව නියෝජනය වන්නේ රවි මණ්‌ඩලයෙනි. රවි මණ්‌ඩලය මනාව හොඳින් වැඩී තිබේ නම් එය ඉතා වාසනාවන්ත පිහිටීමක්‌ බව සාමුද්‍රික විද්‍යාවේ සඳහන් වේ.
එමගින් පුද්ගලයාට ප්‍රතාපවත් පෙනුමක්‌ ලබාදෙයි.කාන්තාවක්‌ නම් ඇයට ඉතා ශෝභා සම්පන්න සිත් ගන්නා සිරුරක්‌ හිමිකරදේ. හිරු වගේම තේජවන්ත වන මොවුන් අලුත් අලුත් දේවල් නිර්මාණය කිරීමටද ශූර බවක්‌ දක්‌වති. උත්පත්තියෙන්ම නිර්භීත පුද්ගලයන් වශයෙන් කැපී පෙනෙන මොවුන් ආදරය කරන්නත් වඩා දක්‍ෂයි. කරුණාව හා අනුකම්පාවද මොවුන් තුළින් කැපී පෙනෙයි. දේශපාලන නායකයන් රජයේ උසස්‌ නිලධාරීන් නළු නිළියන් කලාකරුවන්. ලේඛකයන් වැනි ප්‍රසිද්ධ ජීවිත ගත කරන අයගේ රවි මණ්‌ඩලය මනාව උස්‌ව පිහිටා ඇති අයුරු දැක ගත හැකිය. රවි මණ්‌ඩලය ස්‌ථිරව ශක්‌තිමත්ව වැඩී තිබේ නම් එම අයගේ ජීවිතයට හිරුගේ බලපෑම වැඩිය. එමෙන්ම එම මණ්‌ඩලය පහත්ව විසිරී ගිය ආකාරයෙන් යුක්‌ත නම් හිරුගේ බලපෑම් දුර්වලය.එවිට පුද්ගලයාට අසුභ තත්ත්වයක්‌ උදාකරයි. ඔවුන් ජීවිතය ගැන සැබෑ අවබෝධයක්‌ නොමැති දුර්ගුණ පුද්ගලයන් ලෙස සැලකේ. දුසිරිත් වැඩ කරන අයගේ රවි මණ්‌ඩලය දුර්වල බැවින් ඔවුන් හට ලෙඩ රෝග සෑදීමේ ප්‍රවණතාවයද වැඩිය. බොහෝ විට මේ අයට පපුව ආශ්‍රිත රෝග සිත් වේදනා. ලේ දුෂ්‍යවීමෙන් ඇතිවන රෝග ආදිය පහසුවෙන් වැළඳිය හැක.
රවි මණ්‌ඩලය බලවත් ලෙස පිහිටා ඇති තැනැත්තා අතිශයින්ම බුද්ධි මත් වෙයි. නීතිගරුක මෙන්ම යුක්‌ති ගරුකවේ. ඔවුන් සමාජයේ නිරායාසයෙන්ම කැපී පෙනෙන පුද්ගලයෝ වෙති. යන එන හැම ස්‌ථානයකදීම නිසැකවම ප්‍රධානත්වය හිමිවෙයි. කුමන කටයුත්තක්‌ ඇරඹුවද එය ඉතා සාර්ථක අයුරින් නිම කිරීමට දක්‍ෂයෝ වෙති.
රවි මණ්‌ඩලය දුර්වලවූ විට පුද්ගලයා උඩඟු බවක්‌ද පෙන්නුම් කරයි. අන්‍යයන් පාලනය කරන්නට යැමෙන් හා ඔවුන් තුළ ඇති අප්‍රියජනක කතා විලාසය නිසාද ඔවුන්ට සතුරන් බහුල වේ. තමා ලත් දක්‍ෂතා තුළින්ද ඔවුන් ප්‍රයෝජනයක්‌ නොගනී. දාමරික කම් හා නොමනා ක්‍රියාකාරකම් නිසා රාජ්‍ය දඬුවම් විඳීමටද සිදුවේ. හොඳින් වැඩුණ රවි මණ්‌ඩලයත් දුර්වලව වැඩුණ රවි මණ්‌ඩලයත් ස්‌වභාවිකව සිදුවන්නකි. කෙනෙකුගේ උත්සාහයන් මත රවි මණ්‌ඩලයට ලම්භාකාර රේඛාවක්‌ (ඉහළට යන) වැටිය හැක. එය රවිගෙන් ලැබෙන සුභඵල වැඩිවීමට හේතුවනු ඇත.
රවි මණ්‌ඩලය මත තාරකා ලකුණක්‌ වැටී තිබීමද සුභ ලකුණක්‌ වෙයි. එයද ඉතා වාසනාවන්තය. තමාගේම උත්සාහයෙන් දියුණුවී ප්‍රසිද්ධියට පත්වෙන එවන්නන්ගෙන් ලෝකයටම සිදුවන්නේ විශාල සේවයකි. යම් යම් නව නිර්මාණයන් තුළින් ප්‍රසිද්ධියට පත් අයගේ රවි මණ්‌ඩලය මත එවැනි සලකුණු දැකිය හැක. රවි මණ්‌ඩලය තුළ පිහිටි කෙටි රේඛාවද හදිසි වාසනාව ගෙන දෙයි. රවි මණ්‌ඩලයේ වැටෙන හතරැස්‌ කොටුව වෙළඳුන්හට සුභ ඵල දෙන පිහිටීමක්‌ වෙයි. රවි මණ්‌ඩලය මත වැටෙන ත්‍රිකෝණ ලකුණින් උසස්‌ බුද්ධියක්‌ ඇති අයෙක්‌ බව පෙන්නුම් කෙරේ. ඔවුන් හට පිය උරුමයෙන් ලබන දේපළ වලටද හිමිකම් ඇතිවේ.
රවි මණ්‌ඩලය අසීමිත ලෙස උස්‌ව පිsහිටා ඇති විට පුද්ගලයා වඩා උඩඟු බවක්‌ ප්‍රකට කරයි. අන් අය පහත් අය ලෙස සැලකීමට මෙම ලක්‌ෂණය ඉවහල් වෙයි. රවි මණ්‌ඩලය බලවත් අය බොහෝ විට කලාකරුවන් වේ. මෙවැනි අයට නව නිර්මාණ තුළින් ජනප්‍රිය භාවයට පත්වීමට හැකියාව ලැබෙයි. එමෙන්ම මෙවැනි අයට මිහිරි කටහඬක්‌ හිමිවන අතර ප්‍රියජනක පෙනුමක්‌ද ඇතිවේ.
යම් යම් අයගේ ධනය විනාශවීම, රැකියාවන් අහිමිවීම් රජයෙන් හා නීතියෙන් වන කරදර ඇතිවන කාලයන්හි රවි මණ්‌ඩලයෙහි අස්‌වාභාවික පිහිටීම් ඇති කරයි. දෛවය රේඛාව මගින් වැටෙන රේඛාවන් රවි මණ්‌ඩලයෙහි රවි රේඛාවට සම්බන්ධවීමෙන් අන් සතු වස්‌තුව ලැබීමටත් හදිසි ධනය ලැබීමටත් හේතුවේ. රවි මණ්‌ඩලය මත පිහිටන කළු තිත් ලකුණු නින්දා අපහාස විඳීමට සිදුවන බවට පූර්ව නිමිත්තක්‌ වේ. රවි මණ්‌ඩලය පහතට එබී වළගැසුන ආකාරයෙන් ඇති විට රවි ග්‍රහයාගේ ආකර්ෂණය අඩුවේ. එවිට පුද්ගලයා බොහෝ දුෂ්චරිතවලට පෙළඹෙයි. රක්‌තවාතය හෘදයාබාධ ආදී රෝගයන්ටද පහසුවෙන් ගොදුරුවේ. රවි මණ්‌ඩලය මත වැටුණ දූපත් සලකුණු සුභ පිහිටීමක්‌ වෙයි. හස්‌තය හිමි පුද්ගලයා ජනප්‍රසාදයට ලක්‌වන බව එමගින් ප්‍රකට වේ.
හිඹුටානේ පියතිලක ද අල්විස්‌
උපුටා ගැනීම දිවයින පුවත්පත
