නාථ දෙවිඳුන්ගේ පිහිට ලබාගන්නා අයුරු
මේ මහා භද්‍ර කල්පයේදී මෙලොව පහළවන අවසන් බුදුරජාණන් වහන්සේ මෛත්‍රි බුදුරජාණන් වහන්සේය. සාරාසංක්‍ය කල්ප ලක්ෂයක් පාරමී දම් පුරා ශ්‍රී සම්බුද්ධත්වයට පත්වන මෛත්‍රි බෝසතාණන් වහන්සේ බුද්ධත්වයට පෙර ආත්මය මහා තෙද බලැති දිව්‍යරාජයකු ලෙස දෙව්ලොව වැඩ වාසය කරති.
නාථ දිව්‍යරාජයා වශයෙන් හැඳින්වෙන මේ මෛත්‍රි බෝසතුන් යහපත් ගුණවත් ප්‍රතිපත්තිගරුක මිනිසුන්ට පිහිට වන්නට කටයුතු කරන මහානුභාව සම්පන්න දිව්‍ය රාජයෙකි. අද දින ගරු ස්වාමීන් වහන්සේ මව්බිම තරුපති පාඨක පින්වත් ඔබට ලබා දෙන්නේ ඒ මහානුභාව සම්පන්න නාථ දිව්‍යරාජයා වෙනුවෙන් පුද පූජා පවත්වා පිහිට ලබා ගන්නා ආකාරයයි.
මතු බුදුවන මෛත්‍රි බෝසතුන් හෙවත් නාථ දිව්‍යරාජයා වෙනුවෙන් පුද පූජා පැවැත්වීම, පින් අනුමෝදන් කිරීම අපේ බොදුනුවන් බොහෝ කලක සිට සිදු කරනවා. බොහෝ විහාරස්ථානවල, බුද්ධ මන්දිරවල බුදු පියාණන් වහන්සේගේ පිළිම වහන්සේලා ආශ්‍රිතව මෛත්‍රි බෝසත් පිළිමය සහ ශ්‍රී මහා විෂ්ණු දේව පිළිරුව ස්ථාන ගත කරලා තියෙනවා. මෛත්‍රි බුද්ධ ශාසනයේදී නිර්වානය සාක්‍ෂාත් කර ගන්නටයි බොහෝ අය පින්කම් පවත්වා ප්‍රාර්ථනා කරන්නේ.
වීර්යවන්ත බුද්ධ ශ්‍රාවකයා ගෞතම සම්බුදු සසුන තුළම චතුරාර්ය සත්‍යය ධර්මය අවබෝධ කරගෙන සංසාර ගනුදෙනු නිමා කර ගැනීමට උත්සුක විය යුතුයි. එම උතුම් පාරමිතා පූර්ණයට මෙත් බෝසතුන් එහෙම නැත්නම් නාථ දිව්‍යරාජයා අපමණ කරුණාවෙන් පිහිට වෙනවා. ලෝවැසියන් සසර දුකින් මුදා ගන්න පිහිට වෙනවා. මේ උතුම් මෛත්‍රි බෝසතුන් මහා බලවත් දේවාත්මයක්. බෝසතුන් වහන්සේ මේ ගෙවමින් සිටින්නේ බුද්ධත්වයට පෙර අවසන් ආත්ම භාවයයි. මේ නිසා නාථ දිව්‍යරාජයා නිති පන්සිල් සුරකින ප්‍රතිපත්ති ගරුකව කටයුතු කරන අයගේ පුද පූජා ලබන්න, පින් ලබන්න, පිහිට වෙන්න මහත් ප්‍රියතාවක් දක්වනවා.
අද දින මා පින්වත් පාඨක ඔබට ලබා දෙන්නේ දිනපතා ඔබට හුරුපුරුදු බුද්ධ වන්දනා පවත්වන අතර එම බුද්ධ වන්දනාවටම සම්බන්ධ කරන භාවිත කරලා අපමණ පිහිට ලබාගත හැකි මහා බලසම්පන්න ගාථා රත්නයක්. මා නිතර අවධාරණය කරනවා වාගේම අදත් මතක් කර සිටිනවා දෙවි දේවතාවුන් වහන්සේලා උතුම් වූ ශ්‍රී සද්ධර්මය අඩංගු පිරිත් සූත්‍ර ශ්‍රවණයට මහත් ප්‍රියතාවක් ඇති බව. ඒ නිසා පිරිත් පොතක් නිවෙසේ තබාගෙන බුද්ධ වන්දනාව සමඟ සජ්ඣායනා කරන්න. ඒ වාගේම එම වන්දනාවන් අවසානයේ දෙවියන්ට පින්දෙන අවස්ථාවේ මෙහි පහත සඳහන් ගාථා සඡ්ඣායනා කරමින් නාථ දිව්‍යරාජයා ගෞරවයෙන් සිහිපත් කරලා පින් අනුමෝදන් කරන්න. පංච බලය ප්‍රාර්ථනා කරන්න. මේ ගාථා හත සතියේ දවස් හතට දවසකට එක් ගාථාව බැගින් සජ්ඣායනා කරන්න. සතියේ සදුදා දවසක මෙම ගාථා සඡ්ඣායනා කිරීම ආරම්භ කරන්න. එතැන් සිට සතියේ දින හතේ දවසකට එක ගාථාව බැගින් සඡ්ඣායනා කරමින් නාථ දිව්‍යරාජයා වෙනුවෙන් පින් අනුමෝදන් කරන්න. සතියේ ඉරිදා දිනයට මේ ගාථා හතම සඡ්ඣායනා කරන්න.
සදුදාට :
කුමනි කුමුද නාසා ධම්මචාරී විරාගී
දශ කුසල සුපුර්ණා කාය චිත්තාන වාස:
ප්‍රනක සුභ යශස්වී දේශ දේශාන්තර රේෂූ
සුරපති සුර නාථං මංගලාවෝ දදාතූ
අඟහරුවාදාට :
භවති කමල දේහං පුෂ්ප මාලා සුධාරම්
ධරනි කමල හස්තං ස්වේත වර්ණාශ්වයානම්
විවිධ කිරණ හර්ණං ශාටකා යුක්ත සෞම්‍යං
සුරපති සුර නාථං නාථ දේවං නමාමි
බදාදාට :
ධවල මකුටධාරී ස්නිග්ධ ස්වේතාම්බරාය
නව මිණි කිරණතී ශෝභන දේහ ධාරී
ගුණමණි නිධියන්ති ප්‍රාප්තනෝ මෝක්ෂ ශාන්තී
ධන මති සුඛදානං රක්ෂිතුං ආතුරානං
බ්‍රහස්පතින්දාට :
ශුභ ජයමති ශ්‍රේෂ්ඨං ධර්ම කාමාර්ථ මෝක්ෂං
අභය සත්‍යත්කෘෂ්ටං ලද්ධ චිත්තානි බද්ධං
උභය ලෝක අර්ථං සිද්ධි බුද්ධාංකුරාණෝ
අභය සුඛ මහත්තං කෘත්ව තේ ආතුරානං
සිකුරාදාට :
අමිල ගුණ නිධානං ධර්ම රාජස්ස ධර්මං
ශ්‍රවණ අමිල ශ්‍රද්ධානං අශේසා ගුණාන්තං
ධිති සුඛ මමෘතානං ශාන්ති මෝක්ෂ ප්‍රදානං
ප්‍රබල සුඛ ප්‍රදානං නාථ දේවෝ ප්‍රදානං
සෙනසුරාදාට :
ප්‍රබල ගුණ නිදානං ධර්ම රාජස්ස ධර්මං
පරහිත නිරතාන්තං දක්ෂිණෙයේ‍යා ජනානං
අචල ශ්‍රද්ධා බුද්ධිං තාවතිංසේ විහාරං
අභය සුඛ ප්‍රධානං බෝධි සත්වං නමාමි
ඉරිදාට :
රවි ශනි කුජ බුධා දී ග්‍රහ දෝෂ නාසං
අජගම මිථුනා දී රාශි දෝෂා විනාසං
දෘඪ බල යග ඝෝෂා නං විශේෂාන බුද්ධෝ
ජය සුබ අමෘතානං බෝධි සත්වෝ ප්‍රදාන
ඉරිදාට පළමුව ඉරිදාට නියමිත ගාථාව සඡ්ඣායනා කොට අනතුරුව දින හතේ ගාථා හතම සඡ්ඣායනා කර නාථ, විෂ්ණු, කතරගම, ගණපති, ගම්බාර දෙවියන් ප්‍රධාන කොටගත් සමස්ත දේව සමූහයාට ආකාසට්ඨාච .... ගාථාවෙන් පින් අනුමෝදන් කරන්න.
උපුටා ගැනීම මවුබිම
