ඉරමුසු-බෙලි මුල්-කූර මුල් අඩංගු මඳ සරු බව දුරු කරන වටිනාම බෙහෙතක්
තම වර්ගයා බෝකිරීමට අසමත් බවක් දැක්වීම “මඳ සරු බව“ හෙවත් “නිසරු බව“ යනුවෙන් හඳුන්වනවා. මෙම තත්ත්වයට පත්වන සංඛ්‍යාව දල වශයෙන් 12% තරම් ප්‍රතිශතයක් වන අතර එය කාන්තාවන් හා පුරුෂයන් අතර සමව බෙදී යනවා. මෙම සංඛ්‍යාවෙන් 90%ක් පමණ ප්‍රමාණයකට ප්‍රතිකාර ක්‍රම නිවැරැදිව සිදුකර ගැනීම මඟින් වාසනාවන්ත දරුඵල ලබාගත හැකියි. කිසිදු ආරක්ෂක උපක්‍රමයක් නොමැතිව වසරක හමාරක පමණ කාලයක් ලිංගිකව එකතු වුවත් දරු පිළිසිඳ ගැනීමක් සිදු නොවූයේ නම් මෙතෙක් ඔබ තුළ ඇති පරාජිත සිතිවිල්ලෙන් මිදී සියල්ල සතුටින් විසදාගත හැකියි යන මානසික ශක්තිය ඇතිකර ගන්න මේ ලිපිය කියවන්න.
කාන්තාවකගේ ඩිම්බවල හොඳම ගුණාත්මක බව ඇත්තේ වයස අවුරුදු 25-32 අතර කාලයේදී වන අතර අවුරුදු 40ට ආසන්න වනවිට එය ක්‍රමයෙන් අඩුවෙමින් යනවා. නමුත් සැමවිටම මෙම සංඛ්‍යා වැදගත් වන්නේ නැහැ. දරුවකු ලබාගැනීම සඳහා ස්ත්‍රී – පුරුෂ දෙදෙනා අතර යහපත් කායික මෙන්ම මානසික සබැඳියාවක්ද තිබිය යුතුමයි. තදබල මානසික ආතති අවස්ථාවලදී ලිංගිකව එක්වීමට ඇති කැමැත්ත අඩුවන අතර ඩිම්බහරණය සිදු නොවීමටද ඉඩ තිබෙනවා.
අධික ස්ථුලතාවත් අධික කෘශ බවත් ඩිම්බහරණය අක්‍රමවත් වීමට හේතු විය හැකියි. අමතර ලිංගික චර්යාවන්ට යොමුවීම නිසාද මේ තත්ත්වය ඇතිවිය හැකියි. මෙහිදී සුද බින්දුව සහ ක්ලැමීඩියා රෝග තත්ත්ව හේතුවෙන් ලිංගික පද්ධතීන්ට හානි වන අතර නළ ගර්භ පිළිසිඳ ගැනීම් ඇතිවීමේ සම්භාවිතාවද වැඩි වනු ඇත. අධික දුම් පානයත්. අධික මත්පැන් පානයත් මඳ සරු බවට හේතුවන කාරණයක්.
කාන්තාවන්ගේ මඳ සරු බවට හේතුවන ශාරීරික ගැටලු අතර මාස් ශුද්ධිය සිදු නොවීම, අල්පව සහ අක්‍රමවත්ව සිදුවීම, ගර්භාශයේ ගෙඩි පිහිටීම, ගර්භාෂයේ විකෘතිතා ආදියද දැක්විය හැකියි. මාස් ශුද්ධිය හා සම්බන්ධ රෝග 8ක් පිළිබඳව සහ යෝනිය සම්බන්ධ රෝග 20ක් පිළිබඳව ආයුර්වේදයේ සඳහන් වෙනවා. සාර්ථක දරු පිළිසිඳ ගැනීමකදී මූලිකවම ගර්භාෂය සාමාන්‍ය තත්ත්වයෙන් තිබිය යුතු අතර පැලෝපීය නාළවල ගැටලු, අවහිරතා නොතිබිය යුතුයි. ලිංගික ක්‍රියාවලියේ ගැටලුවක්ද නොතිබිය යුතුයි.
ගර්භාශයේ ගෙඩි පිළිබඳව විශේෂයෙන් කතා කළ යුතුයි. මේ සඳහා සැත්කම් සිදුකිරීම මඟින් ඉතා අවාසනාවන්ත ප්‍රතිඵල අත්විය හැකියි. සැත්කම් මඟින් ගර්භාෂ ගෙඩි ඉවත් කරගත හැකි වූවත් මවක වීමේ බලාපොරොත්තුව ඉටුකරගත නොහැකි විය හැකියි. සැත්කමෙන් ඇතිවන රසායනික හා වෙනස් තත්ත්ව හේතුවෙන් ඩිම්බය හා ශුක්‍රාණුව සංසේචනයෙන් ඇතිවන කලළය තැන්පත් කර ගැනීමටත්, ඊට අවශ්‍ය පෝෂණය සැපයීමටත් අවශ්‍ය තත්ත්ව වෙනස්වී තිබිය හැකියි. එය අවාසනාවන්ත තත්ත්වයක්. ගර්භාෂයේ ගෙඩි සඳහා අප විසින් ලබාදෙන ඔෟෂධ ප්‍රතිකාර මඟින් ක්‍රමයෙන් ප්‍රමාණය කුඩාවී පසුව නැතිවී යනවා. වෛද්‍ය වාර්තා නිරීක්ෂණය කරමින් අප ඔෟෂධ ලබා දෙනවා. මාස් ශුද්ධිය ක්‍රමවත්ව ඇතිවීම වෙනුවෙන්ද අවශ්‍ය ඔෟෂධ ප්‍රතිකාර ලබා දෙනවා.
නිරෝගී දරු සම්පත් බලාපොරොත්තුවෙන් අප වෙත පැමිණෙන රෝගීන්ගේ ශරීරය ප්‍රතිකාර සඳහා සූදානම් කර ගැනීම වෙනුවෙන් අවශ්‍ය වන කසායක් පහත සඳහන් කරන අතර සති 2ක් හෝ ඊට වැඩි කාලයක් නියමිත පරිදි බොන්න. මූලික ප්‍රතිකාර අවසානයේදී ලබාගන්නා පරීක්ෂණ වාර්තා අනුව ඒ ඒ දුබලතාව වෙනුවෙන් විශේෂයෙන් සකස් කරන ලද ඔෟෂධ ලබාදීම සිදුකරනවා. මඳ සරු බවට සිදුකරන ආයුර්වේද ප්‍රතිකාරයේදී ඒ සඳහා කාන්තාව සහ පුරුෂයා දෙදෙනාම සහභාගි විය යුතුයි. ඉරමුසු, බෙලි මුල්, කූර මුල්, මානෙල් අල, වැල්මදට, මුද්දරප්පලම් පත අට එකට සිඳුවා උදේ සවස මී පැණි දමා බොන්න.
වෛද්‍ය සජානි වාසනා ප්‍රනාන්දු ( BAMS (Hons) University of Kelaniya )
ධන්වන්තරි ආයුර්වේදය - පිළියන්දල (0718659179 )
උපුටා ගැනීම මව්බිම
