තරුණ බව සුරකින ස්වාභාවික Face Masks
වියපත් වීමත් සමඟ සමේ ඇති තද බව සහ තරුණ බව කෙමෙන් වියැකී ගොස් සම රැලි වැටීම් ආදිය සිදුවන්නේ සොබාදහමේ නියමයට අනුවයි. නමුත් සම වියපත් වී තරමක් ප්‍රමාද කිරීමට අපට හැකියාව තිබෙනවා. ඒ සඳහා සමට සිදුකරන සත්කාර, ලබාගන්නා පෝෂණීය ආහාරපාන, ව්‍යායාම වැනි දේ බලපානු ලබනවා. සමට කරන සත්කාර පිළිබඳව කතා කිරීමේදී සෑම විටම ස්වාභාවික සත්කාරවලට යොමු වීම වඩාත් සෞඛ්‍යාරක්ෂිතයි. තරුණ බව රැකදෙන ස්වාභාවික ෆේස් මාස්ක් දහයක් නිවසේදීම සාදාගැනීමට මෙම ලිපිය ඔබට අත්වැලක් වේවි.
රස නොයෙදූ කොකෝවා පවුඩර්, මුල්තානි මිට්ටී, ප්ලේන් යෝගට්, ලෙමන් යුෂ, සුපිරිසුදු පොල්තෙල් එකට මිශ්‍ර කර මුහුණේ ආලේප කරන්න. විනාඩි 20ක් පමණ තබා සෝදා හරින්න. මෙම සත්කාරය සතියකට දෙවරක් සිදුකරන්න.
උළුහාල් රැයක් පෙඟෙන්නට දමා පසුදා බ්ලෙන්ඩර් කරගන්න. එයට රෝස වතුර ස්වල්පයක්ද මිශ්‍ර කර මුහුණේ ආලේප කරන්න. විනාඩි 20ක් තබා සෝදාහරින්න. මෙම සත්කාරය සතියකට දෙවරක් සිදුකරන්න.
කැරට් යුෂ, අර්තාපල් අල යුෂ සහ රෝස වතුර සම ප්‍රමාණවලින් ගෙන මුහුණේ ආලේප කර විනාඩි 20ක් තබා සෝදාහරින්න. මෙම සත්කාරය දිනපතා සිදුකරන්න.
රස නොයෙදූ කොකෝවා පවුඩර් කුරුඳු කුඩු සහ මී පැණි මිශ්‍ර කර මුහුණේ ආලේප කරන්න. විනාඩි 15ක් පමණ තබා සෝදා හරින්න. සතියට වරක් මෙම සත්කාරය කළ යුතුයි.
සුපිරිසුදු පොල්තෙල් දෙළුම් යුෂ සමඟ මිශ්‍ර කර ආලේප කර විනාඩි 15ක් තබා සෝදාහරින්න. සතියට දින දෙකක් පමණ මෙම සත්කාරය සිදුකළ යුතුයි.
මුල්තානි මිට්ටි රෝස වතුර සමඟ මිශ්‍ර කර ආලේප කරන්න. විනාඩි 20ක් පමණ තබා සෝදාහරින්න. මෙම සත්කාරය සතියට දෙවරක් සිදුකළ යුතුයි.
අලිගැටපේර ගෙඩියක් සූරාගෙන එය හොඳින් පොඩි කරගන්න. එයට රැයක් පොඟවා බ්ලෙන්ඩර් කරගත් ඕට්ස් එක්කර මිශ්‍ර කරන්න. මුහුණේ ආලේප කර විනාඩි 20ක් තබා සෝදාහරින්න. සතියට දෙවරක් මෙම සත්කාරය සිදුකරන්න.
කෙසෙල් ගෙඩියකට රෝස වතුර සහ විටමින් ඡ් කරලක් මිශ්‍ර කර ෆේස් පැක් එකක් සාදාගන්න. එය මුහුණේ ආලේප කර විනාඩි 15ක් තබා සෝදාහරින්න. මෙම සත්කාරය සතියකට තුන්වරක් සිදුකළ යුතුයි.
කස්තුරි කහවලට රෝස වතුර මිශ්‍ර කර මිශ්‍රණයක් සාදා ගන්න. එය විනාඩි 20ක් තබා සෝදාහරින්න. මෙය දිනපතා ආලේප කරන්න.
රතු සහල් සෝදා තම්බා ගන්න. සහල් තැම්බූ ජලය පසෙකින් තබන්න. තැම්බූ බත්වලට නැවුම් කිරි, මී කිරි සහ මී පැණි මිශ්‍ර කර මිශ්‍රණයක් සාදා මුහුණේ ආලේප කරන්න. විනාඩි 20ක් තබා පසෙකින් තැබූ සහල් වතුරින් සෝදාහරින්න.
සෙව්වන්දි හෙට්ටිආරච්චි
උපුටා ගැනීම මව්බිම
