ආකර්ෂණීය කාන්තාවක් වීමට නම් මෙන්න ඔබ අනුගමනය කළ යුතු දෑ
ඕනෑම රටක සංස්කෘතිය, ජාතිකත්වය සහ දේශීයත්වය කැපි පෙනෙන්නේ ඒ රටෙහි කාන්තාවන්ගෙනි. නමුත් සමාජ දියුණුවත් සමඟ ම පුරුෂ පාර්ශ්වයේ වගේම කාන්තා පාර්ශ්වයේද බොහෝ වෙනස්කම් සිදුවීම අපට දකින්නට ලැබෙයි. ඉතින් කාන්තාවන් තමන්ගේ පෞරුෂය නිසිලෙස නඩත්තු කරන්නෙ කෙසේද යන්න මේ ලිපිය මඟින් ඔබව දැනුම්වත් කරන්න අප සුදානම්. කාන්තා ඔබ, ඔබේ රූපයත් රැකගෙන තමන්ගෙ පෞරුෂය වර්ධනය කර ගන්න ආකාරය ගැන අද රූ රහස් ඔස්සේ ඔබව දැනුම්වත් කරන්නේ ඩුබායි, නෙදර්ලන්තය, සිංගප්පුරුව හා මාලදිවයිනෙහි මෙන්ම ශ්රී ලංකාවෙහිද ටෙක්නික් ඉන්ටර්නැෂනල් හි පුහුණුව ලැබූ ප්‍රවීණ රූපලාවණ්‍ය ශිල්පිනී ආරෝෂි කෞෂල්‍යා හේරත් ය.
පරිපූර්ණ චරිතයක් බවට පත්වීම ගැහැනු අප සියලු දෙනාගේම සිහිනයක්. එය යථාර්ථයක් බවට පත්කර ගැනීමට අප කැපවීමෙන් වැඩකටයුතු සිදුකළ යුතුයි. අපව නිර්වචනය කරනු ලබන්නෙ අප කරන ක්‍රියාවෙනි. අපගේ පෞරුෂය ඉස්මතු කිරීමේදී අපගේ පළමු කාර්යභාරය විය යුත්තේ උදෑසන පිබිදීමයි. සාර්ථකව වැඩ කටයුතු ආරම්භ කිරීම මඟින් ඔබේ ගතට අනිවාර්යයෙන් ජවයක් ලැබෙනවා සේම ශරීරයේ නිරෝගී බව වෙනුවෙන් ව්‍යායාම්, යෝගා වැනි දේවල්වලට යොමු වන්න. අපි ඇඳුමක් ඇඳගෙන කණ්ණාඩිය ඉදිරියට ගොස් අපව දුටු විට අප ගැනම ආඩම්බරයක් අහංකාරකමක් ඇතිවිය යුතුයි. හැම මොහොතකම අප අපේ ලස්සන අපිම විඳින්න ඕන. සමහර අය ලස්සනට ඇඳුමක් ඇඳගෙන යනවිට අපට සිතෙන්නට පුළුවන් අනේ මටත් එහෙම අඳින්නට හැකිනම් යනුවෙන්. අප බොහෝ විට කළ යුතු වන්නේ අපගේ අවලස්සනක් තිබෙනවා නම් එය ඉස්මතු නොවන ආකාරයට ඇඳුම්, මේකප් ආදිය යොදා ගැනීමයි. ගැහැනියක් සෑම මොහොතකම තම ශරීරය පිළිබඳව සිතිය යුතුමයි.
මානසික සුවතාව වෙනුවෙන් හැකිනම් උදෑසන අවදි වී විනාඩි 5ක් භාවනාවක් කරන්න. උදෑසන අවදි වූ පසුව අප පුරුද්දක් ලෙස කරන්නෙ දුරකතනය අතට ගැනීමයි. නමුත් කුඩා කාලයේ පටන් අපට පවසන්නේ උදෑසන පාඩම් කිරීම සුදුසුයි යනුවෙන්. උදෑසන මනස නිදහස්. ඉතින් එවැනි වේලාවක් ඔබට භාවනාවකට බොහොමත් සුදුසුයි. එයින් ඔබේ සිත පිරිසිදු වෙනවා.
ඒ වගේම සමහර කාන්තාවන් උදෑසන අවදි වන්නෙත් රාත්‍රියේදි නින්දට යන්නෙත් කුමක් හෝ ලෙඩ රෝගයක් පවසාගෙනයි. නමුත් ගැහැනියක් නිතරම සිටිය යුත්තේ පිරිසිදු සිතුවිලිවලින්. සමහර ගැහැනු අය ඉන්නවා උදෑසන අවදි වන්නේ දහවල් දහයට එකොළහට පමණ. පසුව දරුවන්ගේ වැඩකටයුතු නිවසේ වැඩකටයුතු සිදු කර සවසට සැමියා එනතුරුත් රාත්‍රී ඇඳුම පිටින් සිටින ගැහැනු අපමණ අපිට දකින්නට පුළුවන්. එවිට සැමියාට ජීවිතේ ම එපා වෙන්නටත් පුළුවන්. විශේෂයෙන්ම ගැහැනු කෙනෙක්ගෙ පිරිසිදුකම මනින්නෙ කකුල් දෙකෙන් කියලා මතයක් තිබෙනවා. එය සත්‍ය කතාවක්. බොහෝවිට ඔබේ කකුල් ආදිය පැළී තිබෙනවා නම් එය ඔබට අප්‍රසන්න පෙනුමක් ගෙනෙන්නට පුළුවන්. එය පිරිසිදු කර ගන්නට රූපලාවණ්‍යාගාරවලට යෑමට අවශ්‍ය නැහැ. එයට නිවසේදීම කළ හැකි පිළියම් පසුගිය ලිපි මඟින් ඔබව දැනුම්වත් කළා. ඕනෑම කාන්තාවකට තමන්ටම ආවේණික ලස්සනක් තියෙනවා.
කොතැනක ගියත් කැපී පෙනෙන්ට ඇඳුම් පැලඳුම් ආදිය භාවිත කරන්න. එය මම ඔබට පවසන්නෙ අත්දැකීමෙන්. ඔබ අලංකාරවත් වස්ත්‍රාභරණවලින් සැරදී පිළි‍ෙවළකට තැනකට යන්න. එවිට ඔබට ලැබෙන ගෞරවය ඔබට තේරෙවි. ඔබට තියෙන්නෙ එකම ඇඳුම වුවත් එකම සෙරෙප්පු දෙක වුවත් කමක් නැහැ; එය පිරිසිදුව පාවිච්චි කරන්න.
ඔබ උසින් අඩු පුද්ගලයකු නම් ඔබට හීල්ස් දෙකක් භාවිත කරන්නට පුළුවන්. ඔබේ කකුල් තරමක් අවලස්සනම් කකුල් වැහෙන්නට දිගට අඳින්නට පුළුවන්. එවිට ඔබ සමාජය ඇතුළෙ විහිළුවකට ලක් වෙන්නෙ නැහැ වෙ‍ෙළඳපළෙහි අපගේ අඩුපාඩු සාදා ගැනීමට අවශ්‍ය සෑම දෙයක්ම තිබෙනවා. බොහෝවිට අප කොටට ඇඳුමක් ඇඳගෙන ගියහම ඔබේ ලස්සනට නෙමෙයි අවධානය යොමු වෙන්නේ. රාගය වැනි හැඟීමකට. ඉතින් අපේ පෞරුෂය ගැනයි, අලංකාරය ගැනයි හැමදේම හිතලා තමයි අප වැඩකටයුතු කරගන්න ඕන. ඒනිසා තමන්ගෙ ශරීරයේ අඩුපාඩු වැසෙන්නට ඇඳුම් පැලඳුම් තෝරා ගන්න. සිම්පල් මේකප් එකක් භාවිත කරන්න. සෑමවිටම කෙනකුට හැරී බැලීමට හැකි ලෙස චාම් වෙන්න.
සමහර ගැහැනු පිරිස් තව කෙනකු තමන්ගෙ අඩුපාඩුවක් පෙන්වූ පසු පිළිගැනීමට අකමැතියි. සමහර කාන්තාවන්ගේ මුහුණෙ සිනහ රැල්ලක් නැහැ. සැමවිටම සිටින්නෙ ඔරවගෙන වගෙයි. බොහෝවිට මෙයට හේතුව නිවසේ ගැටලු කාර්යාලයට රැගෙන යාම සහ කාර්යාලයේ ප්‍රශ්න නිවසට රැගෙන ඒමයි. අපි නිතරම සිනහවෙන් ප්‍රසන්න ව සිටිය යුතුයි. එයත් කාන්තාවගේ ඉදිරි සාර්ථකත්වයට පිටිවහලක්. කිසිම විටෙක නොගැළපෙන මිනිසුන් ආශ්‍රය කරන්න එපා. අප නොගැළපෙන මිනිසුන් ආශ්‍රය කිරීමම ගැටලුවලට අතවැනීමක්. ඔබ හැමවිටම නිහතමානී වන්න. කෙනෙකුට ප්‍රසන්න සිනහවකින් සංග්‍රහ කරන්න.
ඔබට ලැබෙන සුළු වෙලාවකදි පොතක් කියවීමට හුරු වන්න. පොත්පත් කියවන විට අලුත් දේවල් අලුත් අත්දැකීම් නිරන්තරයෙන්ම එකතු වෙනවා. එය කාන්තාවකට මහත් ආභරණයක්. අප ආශ්‍රය කළ යුත්තේ ද අපට හොඳ දෙයක් ගතහැකි පුද්ගලයෙක් පමණයි. සාර්ථක කාන්තාවක් යනු රූපයෙන් අග තැන්පත්වීමත්, අධ්‍යාපන සුදුසුකම්වල ඉහළ ස්ථාවරයකට යෑමත්, සමාජයේ අතිශය කැපි පෙනීමත්, සමාජ ආකර්ෂණය හිමිවීමත් වගේ සියලුදේම එකතු වීමෙන් සෑදෙන කාන්තාවක්. මේ සියලු දේකින්ම පරිපූර්ණ වී සෑදෙන පෞරුෂයත්වය තමයි කාන්තාවකට අත්‍යවශ්‍ය ම. සමහර කාන්තාවන් රූපයෙන් අග තැන්පත් වුවත් තැනකට ගොස් කතා කරන්න දන්නෙ නැහැ සහ හැසිරෙන්න දන්නෙ නැහැ. රූපයට ආකර්ෂණය ලැබුණත් සැම දෙයක්ම එකතු වූ විටයි ගැහැනියගෙ පෞරුෂය ගොඩ නැඟෙන්නෙ. තමන් තමන්ගේ තත්ත්වය පවත්වාගෙන ඉදිරියට යන්න. තත්ත්වය නඩත්තු කරන්න. ගැහැනිය ආඩම්බරකම ආභරණයක් කර ගන්න නම් මේ කතා කළ සියලුම කරුණු ඇතුළත් විය යුතුමයි. ඒ වගේම මේ සියල්ල ම එකතු වුණු පසුව අනවශ්‍ය ලෙස ආඩම්බර වීමත් කළ යුතු නෑ. නිහතමානීකම කාන්තාවකට ආභරණයක්.
