නිවෙස් හැඩ කරන අලුත් ක්‍රම
සාමාන්‍යයෙන් නිවෙසක් නිර්මාණය කිරීමේදී නිවෙසේ එක් එක් බිත්තිවලින් බෙදා දැක්වීමක් සිදුකරනවා. මෙයාකාර ගඩොල් බිත්ති සම්ප්‍රදායෙන් ඈත් වී මෑතකාලීනව තාවකාලික බෙදීම්වලට සහ කිසිදු බෙදීමකින් තොරව නිවෙස නිර්මාණය කර ගැනීමට උනන්දුවක් දක්වනවා. මෙය නිවෙස් අලංකරණය සම්බන්ධයෙන් මෑතකාලීන නව ප්‍රවණතාවක් ලෙස හඳුන්වන්න පුළුවන්. මෙයාකාර කිසිදු බෙදීමකින් තොරව නිර්මාණය කිරීම අඩු වියදම් සහිතයි. මෙමඟින් නිවෙසට වෙනස්ම පෙනුමක් ලබා ගත හැකියි. නිද: මීටර් 25×25 ප්‍රමාණයේ කොටසක් ඔබ සතු නම් මුලින්ම ජීවත්වීමට සුදුසු පරිසරයක් ගොඩනඟා ගත යුතුයි. මෙහිදී ඔබේ නිවෙසට අවශ්‍ය අංග වන සාලය, නිදන කාමරය, මුළුතැන්ගෙයි, කෑමකාමරය, නාන කාමරය ආදිය එම ඉඩකඩ තුළ භාවිතයට ගත හැකියි. නිවෙසේ අංග බෙදා වෙන් කිරීම ක්‍රම දෙකකට කළ හැකියි.
තාවකාලික බෙදා වෙන් කිරීම :
නිවෙසේ අවශ්‍යම අංග බෙදා වෙන් කිරීමට මේ ක්‍රමය භාවිත කළ හැකි අතරම ඒවායේ විවිධ වෙනස්කම් කිරීමටද මෙමඟින් හැකියාව තිබෙනවා.
කිසිදු බෙදා වෙන්කිරීමක් නොකර වෙනත් උපක්‍රම භාවිත කිරීම :
මෙහිදී බිත්ති හෝ තාවකාලික වෙන් කිරීමට යොදා ගන්නා උපක්‍රම භාවිත කිරීමට අවශ්‍ය වන්නේ නැහැ. බිත්ති වැනි දෑ භාවිත නොකරන නිසා වියදම් අඩු ක්‍රමයක් ලෙස හඳුන්වන්න පුළුවන්. බිත්තිවලින් බෙදා වෙන් කිරීමකින් තොරව නිර්මාණය කරන නිවෙසේ ඒ ඒ අංග වෙනත් පහසු ක්‍රම මඟින් වෙන් කළ හැකියි.
ඒ ඒ අදාළ කොටස වෙන් කිරීම සඳහා වර්ණ භාවිත කිරීම :
නිද: සාලය, කෑම කාමරය, නිදන කාමරය ආදී නිවෙසේ අංග සියල්ල එක එල්ලේම පිහිටා තිබෙන නිසා මේවා වෙන්කර හඳුනා ගැනීමට එකම ප්‍රභේදයන් භාවිත කළ හැකියි. මෙහිදී වර්ණ ගැළපීම කෙරෙහි මූලික අවධානය යොමු කරන්න.
නිවෙසේ
එක් එක් අංග බෙදා දැක්වීමට පොළොවේ විවිධ මට්ටම් නිර්මාණය කිරීම තවත්
උපක්‍රමයකි.
මෙහිදී එක් එක් අංගවල දිශාව වෙනස් කිරීම මඟින්ද වෙනස්ම පෙනුමක් ලබාගැනීමට හැකියාව තිබෙනවා. නිද: සාලය සඳහා පඩි දෙකක් හෝ තුනක් උස්ව පිහිටන ලෙස නිර්මාණය කළ හැකියි. මුළුතැන්ගෙය සඳහා පඩි දෙකක් හෝ තුනක් පහතින් නිර්මාණය කිරීමට පුළුවන්. නිදන කාමරය, කෑම කාමරය, නාන කාමරය ආදිය ඔබේ සිතැඟි පරිදි උස් හෝ පහත් හෝ සම මට්ටම් අනුව නිර්මාණය කර ගත හැකියි. මෙවැනි ආකාරයේ නිවෙසක් එක එල්ලේම පිහිටා ඇති නිසා ගෘහ භාණ්ඩ ස්ථාන ගත කිරීමේදී එකිනෙකට සංයෝජනය වන පරිදි ඒවා තෝරා ගැනීමත්, ස්ථානගත කිරීමත් වැදගත් වෙනවා. ඒවායේ වර්ණ ගැළපීම, ප්‍රමාණය, හැඩය මනාව හැසිරවීමෙන් නිවෙසට වඩාත් අලංකාර පෙනුමක් ලබාගත හැකියි.
ලයනි රසිකා නිරෝෂනී
උපුටා ගැනීම මව්බිම
