"ඔබේ ඊර්ෂ්‍යාව මගේ දියුණුවයි" කියල සමහර වාහනවල ලියල තියෙනවා ඔබත් දැකල ඇති. වචන හතරක් වුණාට විශාල වටිනාකමක් තියන පණිවුඩයක් ඒ කියමනේ ගැබ්වෙලා තියනවා ඇත්තටම. පණිවුඩයක් විතරක් නෙමේ, ඒ වචන ඇතුළෙ මග පෙන්වීමක්,ආත්ම ශක්තිය ජනනය කිරීමේ බලයක් වගේම එක්තරා විදිහක අනතුරු ඇඟවීමක් සහ දෑස් පාදන අදහසකුත් හැංගිලා තියනවා කියල මට හිතෙනවා. ඇයි එහෙම කියන්නෙ? අපි ඔය කියමන ටිකක් ගැඹුරින් හිතල බලමු.
ඊර්ෂ්‍යාව කියන සංකල්පයයි. දියුණුව කියන සංකල්පයයි අතරෙ විශාල සම්බන්ධයක් තියනවා. හැබැයි ඒ දෙක අනයෝන්‍ය විදිහට කවමදාවත් එකට ක්‍රියා කරන්නෙ නෑ. උතුරින් දකුණ ඈතයි වගේ, සුදුයි කළුයි ඈතයි මගේ, එළියයි අඳුරයි ඈතයි වගේ. ඊර්ෂ්‍යාවයි දියුණුවයි පරස්පර විරෝධීයි. කවමදාකවත් ඒ දෙක එකට පිහිටන්නෙ නෑ. ඒ කියන්නෙ ඊර්ෂ්‍යාව ජනිත වන හිතක් තියන පුද්ගලයෙකුට කවමදාකවත් සැබෑ දියුණුවක් ලබන්න ලැඛෙන්නෙ නෑ වගේම සැබෑ ලෙස අවංක ලෙස තෘප්තිමත් ලෙස දියුණු වෙන කෙනෙක් ළඟ කවදාවත් ඊර්ෂ්‍යාව රැදෙන්නෙ නෑ....
සාමාන්‍යයෙන් ඊර්ෂ්‍යා කරන කෙනෙක් හිත යටින් ප්‍රාර්ථනා කරන්නෙ යහපත් ප්‍රතිඵලයක්ද? නැහැ. ඊර්ෂ්‍යා කරන කෙනෙක් හිත යටින් ප්‍රාර්ථනා කරන්නෙ කාගෙ හරි විනාශය. කාගෙ හරි දියුණුව අඩාල වීම හෝ කඩාවැටීම කොටින්ම ඊර්ෂ්‍යාව යහපත් කෙනෙක්ගෙ හිත අරක් ගත් දෙයක් නෙමේ. ඊර්ෂ්‍යාව කියන්නෙ අතිශයින්ම අයහපත් ච්තෙනාවක් විතරක් තියන දුර්ජනයින්ගෙ හිත්වල ඔඩුදුවන පිළිකාවක්.
ලස්සනම දේ මේකයි ඊර්ෂ්‍යාව කියන්නෙ තමන්ගෙ නිදි යහන වටේට ඇති කරන විෂකුරු සර්පයින් වගේ හැඟීමක්. ඒ කියන්නෙ තමන්ගෙම ඇඟ ඇතුළෙ ඉඳගන තමන්ටම දෂ්ඨ කරන අනතුරුදායක හැඟීමක්. ඊර්ෂ්‍යාවෙන් හානිවෙන්නෙ. ඊර්ෂ්‍යා කරනු ලබන කෙනාට නෙමේ. ඊර්ෂ්‍යා කරන කෙනාටයි. තවත් විදිහකට කියනව නම් ඊර්ෂ්‍යාව කියන්නෙ තමන් දෙසට හැරුණු තුවක්කු බටයක් වගේ දෙයක්. තමන්ම ඉලක්ක කරගන හානි පමුණුවා ගන්නෙ තමන්ටමයි. ඊර්ෂ්‍යාවෙන් විනාශ වෙන්නෙ තමන්වම මිසක් ඊර්ෂ්‍යා කරනු ලබන කෙනා නෙමේ.
ඔබ දන්නවද ඊර්ෂ්‍යාවෙන් හිත දුෂ්ඨ වුණාම ඒක හරියට රාජාලියෙකුගෙ තටුවලට විශාල බර ගල් දෙකක් එල්ලුව වගේ වෙනව. ඒ කියන්නෙ කොච්චර දක්ෂකම් තිබුණත් ඉතා ඉහළට දියුණු වෙන්න හැකියාව තිබුණත් අනුන්ට ඊර්ෂ්‍යා කිරීම නිසා ඒ හැකියාවෙන් සේරම වියැකිලා යනව. තවත් කෙනෙකුව හැඳි ගෑවිලා පලයං කියල ප්‍රාර්ථනා කරන අයට සිද්ධ වෙන්නෙ තමන්වම හැඳි ගෑවිලා දියවෙලා යන එක විතරයි.
ච්තෙනාව කර්මය වෙනව කියන එක හේතු ඵලවාදය වගේම ඇත්තක්නෙ. අපි කාට හරි යහපතක් ප්‍රාර්ථනා කළොත් ඒ ච්තෙනාව දෙගුණ වෙලා ආපහු අපිටම කැරකිලා එන්නෙ හිතන්න බැරි පුදුම විදියකට. සමහර විට අපි අසරණ වෙලා තනිවෙලා කරකියාගන්න දෙයක් නැතුව හිත් වේදනාවකින් ඉන්න වෙලාවට අපිට උදව් කරන්න අපිට හිතට සැනසීමක් දෙන්න කොහේ හරි ඉඳල කවුරුහරි එනව. නැත්නම් ප්‍රාතිහාර්යයක් වගේ දෙයක් සිද්ධ වෙනව. එහෙම වෙන්නෙ අතීතයේදී කවදා හරි අපි අනිත් අයට යහපතක්ම වේවා, දියුණවෙන් දියුණුවට පත්වේවා කියල හිත යටින් හරි ප්‍රාර්ථනා කළ හොඳ චේතනාවට ලැඛෙන තෑග්ගක් විදිහට.
ඒත් ඊර්ෂ්‍යා කරන මෝඩයො ඒ වටිනා ක්‍රියාවලිය ගැන දන්නෙ නෑ. අනෙකාගේ දියුණුව ඇනහිටලා බිමටම වැටෙන හැටි බලන්න කුරිරු චේතනාවෙන් ඊර්ෂ්‍යාවෙන් බලාගන ඉන්නව. ඒත් ඊර්ෂ්‍යාව කියන ගින්නෙන් පිච්චෙන්නෙ තමන්වමයි. දියුණු වෙන කිසිම කෙනෙකුට ඊර්ෂ්‍යා කිරීමෙන් කවදාවත් ඒ දියුණුව වළක්වන්න බෑ. හැබැයි තමන්ට කෙනෙක් ඊර්ෂ්‍යා කරන බව ප්‍රඥාවන්තයෙක් දැනගත්තොත් ඔහු කරන්නෙ ඒක අභියෝගයක් විදිහට අරගන තව තවත් දියුණුවෙන්න මාර්ග පාදාගන්න එකයි. සමහරු ඊර්ෂ්‍යා කරන හිතෙන් විතරක් නෙමේ. ප්‍රායෝගිකවත් පුළුවන් නම් අනිත් අයට කටු ගහන්න බාධා පමුණුවන්න උත්සාහ කරනව. සමහරු උඩින් හරිම හොඳ මූණක් පෙන්නනව. ඒත් හිත යට ඊර්ෂ්‍යාවේ ගිනි දැල් ඇවිලෙනව. සමහරු යටින් කටු ගහද්දි තව සමහරු කපන්න බැරි අත ඉඹිනවා වගේ බොරුවට මූනිච්චාවට සුබ පතනවා.
සමහරු හූනියම් කොඩිවින වගේ බහු බූත ගොං වැඩත් කරනව කෙනෙකුගෙ දියුණුව වළක්වන්න. ඒ ගැනත් කියන්න තියෙන්නෙ ඒ වගේ ගුප්ත යක්ෂ ක්‍රියා සාර්ථක වෙනව කියල කවුරුහරි හිතනවනං ඒක තමන්ගෙම අධික මෝඩකම තහවුරු කෙරෙන අවස්ථාවක් බවයි. කොඩිවින හූනියම් ගුරුකම් කරනව කිය කිය ලෝකෙ නැති බහු බූත අටවල දීලා කපටියො මෝඩයින්ව ගොනාට අන්දලා සල්ලි ගරාගන්නව. කෙනෙක් දියුණුවෙනව බලාගෙන ඉන්න බැරි තරමට මානසිකව රෝගාතුර වූ අඥානයො ඒ වගේ කපටින් පස්සෙ ගිහින් ඒ වගේ ‘යක්ෂ’ වැඩ කරගන්නවා. ඒත් ඒවලින් විනාශ වෙන්නෙ ඒ අයම මිසක් ඒවලින් ඉලක්ක කරන අය නෙමේ. තමන්ට කවුරුහරි ඊර්ෂ්‍යා කළත් කවුරුහරි හූනියම් කළත් ප්‍රඥාවන්තව දියුණුවෙන කෙනා ඒව තඹ සතේකට ගණන් ගන්නෙත් නෑ. ඒවලින් සැලෙන්නෙත් නෑ. ඔහෙ හිනාවෙලා තමන්ගෙ දියුණුව කරා දිනෙන් දින ගමන් කරනව මිසක් ඔය කාගෙවත් ඊර්ෂ්‍යාවන්තකම නිසා නතර වෙන්නෙ නෑ.
ඉතින් ඔබත් අවාසනාවන්ත ලෙස කෙනෙකුට ඊර්ෂ්‍යා කරනව නම් දියුණුවට අකුල් හෙලන්න මොන විදිහෙ හරි වැඩ කරනව නම් මේ ටික තේරුම් ගන්න. ඔබ අනුකම්පාව ලැබිය යුතු, සුළු මානසික රෝගයකට නෑකම් කියන සෘණ චේතෙනාවකින් ජීවිතයම අපරාදෙ පුච්චගන්න කෙනෙක්. එක්තරා විදිහකින් ඔබ ලොකු මෝඩයෙක්. දුර්වල පෘතජනයින් විදිහට අපි ඕනෑම කෙනෙක් තුළ සිහින්ව හරි ඊර්ෂ්‍යාව ජනිත වෙන්න බැරි කමක් නෑ. ඒත් ඒක හැඳිනගත් වහාම අපි එයින් මිදිය යුතුමයි. නැත්නම් ඊර්ෂ්‍යාවෙන් විනාශ වෙන්නෙ අපිවමයි.
ඊර්ෂ්‍යාවෙන් කාවවත් වට්ටන්න බෑ. හදි හූනියම් කොඩිවින කරල කවදාවත් ශක්තිමත් හිතක් තියන ප්‍රඥාවන්තයෙක්ව වට්ටවනව තියා හිතන්නවත් බෑ. සැබෑ ලෙසින් දහමට ලැදි අවංක ලෙස දියුණුවෙන්න හදන ඥානවන්ත කෙනෙකුව වට්ටන්න මොනම හූනියමකටවත් බෑ. ඒක ඒකාන්තයි.
අනිත් අතට ඔබ අවංකව ධර්මානුකූලව කාටවත් හිරිහැරයක් නැතුව දියුණුවෙන කෙනෙක් නම් ඔබට කවුරු ඊර්ෂ්‍යා කළත් අල්පෙනෙත්ති තුඩක් තරමවත් ගණන් ගන්න එපා. සමහර විට ඔබට ඊර්ෂ්‍යා කරන්නෙ ඔබ ළඟම ඉන්න ඔඛෙන් උදව් පදව් පවා ලබාගන්න අය වෙන්න පුළුවන්. ඒ අයව ප්‍රවේශමෙන් ඇසුරු කරන්න. ඒත් ඔබට ඊර්ෂ්‍යා කරන කාටවත් වෛර කරන්න එපා. එකටෙක කරන්න එපා. ඔබට විරුද්ධව හූනියම් යක්ෂ බන්ධන කළා කිව්වත් සත පහකට ගණන් ගන්න එපා. ඒ හැම දෙයක්ම දියුණුවෙන්න වාසනාවක් නැති කම්මැලි කුහක මෝඩයින්ගේ හිස් බව කියාපාන දේවල් විතරයි. ඒ හැමදේම ඒ අයගෙම ජීවිත නසන බෝම්බ ලෙස ඒ අයටම කැරකිලා යන නිසා ඔබ බිය විය යුතු නෑ. හිනාවෙලා ඉන්න.
ඔබට එන ඊර්ෂ්‍යාවන්ත ප්‍රතිචාර ඔබේම දියුණුව ලබන්න අභියෝගයක් විදිහට බාරගන තව තවත් ධෛර්යවන්ත වෙන්න. තව තවත් ශීඝ්‍රයෙන් දියුණුවෙන්න. කඩු ගත්තෝ කඩුවෙන්ම නසිනවා වගේම ධර්මයේ හැසිරෙන්නා ධර්මයෙන්ම ආරක්ෂා කරනු ලබනව. ඒ නිසා ඔබට ඊර්ෂ්‍යා කරන අය, හූනියම් කරන අය ඒවලින්ම විනාශ වෙලා දියවෙලා යාවි. ඒක ඉතින් ඒ අයම විනාශය ඉල්ලාගන කෑමක්. ඒත් ඔබ යහපත් චේතෙනාවෙන් දියුණුවෙන කෙනෙක් නම් බයවෙන්න එපා. ඔබව වට්ටන්න මොනම බලවේගයකටවත් බැහැ බැහැමයි.
මෝඩයින්ගේ ඊර්ෂ්‍යාව තඹේකට නොතකා ඔබ ඔබේ අභියෝගාත්මක දියුණුව වෙත සතුටින් ගමන් කරන්න ඔබට ජය නියතයි!.
මයිකල් ආන්ජලෝ
උපුටා ගැනීම ලක්බිම පුවත් පත
