බර කිලෝ 30ක් වසරකින් අඩුකර ගැනීමේ ජයග්‍රාහී කතාවක්
නව යොවුන් වියේ පසුවන ජානකී තරබාරු වුණත් කාලය ගත කළේ හරිම සැහැල්ලුවෙන්. 15 වැනි විය ඉක්මවා ඇය වැඩිවියට පත්වූ පසු තමයි ඇගේ බාහිර පෙනුම ගැන වැඩියෙන් හිතුවේ. ඒ ශරීරයේ ශක්තිමත් බව ක්‍රමයෙන් අඩුවෙන බව ඇයටම දැනුණ නිසයි. ඇයගේ ජීවිතය වෙනස් කර ගනිමින් ඉතා ඉක්මනින් කිලෝ 28ක් අඩුකර ගන්න ඇයට හැකි වුණා. ඇගේ ජීවිතයේ සිදුවූ මේ වෙනස ගැන ඇය අදහස් පැවැසුවේ මෙලෙසයි.
ඇය - ජානකී ගිර්දාරිලාල්
වයස - අවුරුදු 21
රැකියාව - පෞද්ගලික ආයතනයක ලේකම්වරියක් ලෙස සේවය කරයි.
බර අඩු වීමට පෙර - කිලෝ 80යි.
බර අඩුවූ පසු - කිලෝ 52යි.
ඔබේ සිරුරේ තරබාරුකම ගැන ඔබට දැනුණේකොහොමද? ඔබ එයට ගත් පියවර?
මට අවුරුදු 15ක් විතර වෙනකොට තමයි මගේ තරබාරුකම ගැන දැනෙන්න ගත්තේ. මම කෑමට වැඩි ප්‍රියතාවක් දැක්වුව නිසාම පැයෙන් පැයට ආහාර ගැනීම පුරුද්දක් වුණා. මේ නිසාම අවුරුදු 3ක් ඇතුළත මගේ බර කිලෝ 10කින් වර්ධනය වුණා. මං හදිසියේම මහත් වීම ගැන මගේ මවුපියන් හිටියේ හරිම බයෙන්. මගේ වයසට වඩා මුහුකුරා ගිය පෙනුමක් පේන බව මටම තේරුණා. ප්‍රබෝධවත් ක්‍රියාශීලී ගති ටිකෙන් ටික මගෙන් අෑත් වුණා. මේ නිසාම මගේ තාත්තා තරබාරුකම පාලනය ගැන උපදෙස් ගන්න විශේෂඥ වෛද්‍යවරයෙක් වෙත මාව යොමු කළා.
ඔබේ තරබාරුකම පාලනය කරන්න ආරම්භයක් ලබාගත්තේ කොහොමද?
මම උපදෙස් ගත්තේ බර පාලනය කිරීමේ උපදෙස් දෙන විශේෂඥයෙක්ගෙන්. ඔහු මට කෑම පාලනය කරගෙන බර අඩු කරන්න කාලසටහනක් හදලා දුන්නා. ඒත් සමඟම ක්‍ෂණික ආහාර, සීනි සහිත ආහාර, තෙල් සහිත ආහාර වගේම අල වර්ගත් ආහාරයට ගැනීම පාලනය වුණා. ඒ වෙනුවට ඔහු මට උපදෙස් දුන්නේ පෝෂණීය එළවළු, පලතුරු, සලාද හා පලාවර්ග ආහාරයට ගැනීමටයි. හැමදාම උදේට ඇවිදීමේ ව්‍යායාම කිරීමත් මගේ දින චර්යාවේම කොටසක්. මේ විදියට සැලැසුමක් අනුව ක්‍රියාශීලී රටාවකට හුරුවුණු මට මාස 2කින් කිලෝ 7ක්ම අඩු කරගන්න හැකි වුණා. තවත් මාස 3ක්ම මම අනුගමනය කළේ කලින් සඳහන් කළ දින චර්යාවමයි. ඒත් කලින් තරමටම මගේ බර ඒ මාස කිහිපයේ අඩු වුණේ නැති නිසා මම තරමක් කම්මැළි වුණා. මේ නිසා තමයි මම මේ හැමදේම නතර කරන්න තීරණය කළේ. නැවැත වසරක් ගතවූ පසු මගේ අසල්වැසි හිතවතිය මාව ජිම් එකට යොමු කරන්න උනන්දු වුණා. මට කලින් වගේම ව්‍යායාම කරන්න කියලා මාව උනන්දු කළේ මගේ හිතවතිය. මාත් ඒ ව්‍යායාමවල දිගටම නිරත වුණා වගේම සාර්ථකව මගේ බර පාලනය කරගන්නත් මට හැකි වුණා.
ඔබ ව්‍යායාම් කරන්න පටන්ගත්තේ කොහොමද? එය ඔබට අපහසුවක් වුණාද?
මට අවුරුදු 17 වෙනකොට තමයි මම ව්‍යායාම් කරන්න පටන් ගත්තේ. මුලින් නම් මට ඒ වෙනුවෙන් කාලය වෙන්කර ගන්න තරමක් අපහසු වුණා. ඒත් මගේ පෝෂණීය ආහාර වේලට මම මුල්තැනක් දුන්නා. පාසල් වෙලාවෙදි වගේම පාසල් කාලයෙන් පසුවත් මම විවිධ ක්‍රීඩාවල යෙදුණා. ඒත් මට පසුව වැටහුණා ජිම් එක තමයි මගේ බර පහසුවෙන්ම පාලනය කරගන්න පුළුවන් තැන කියලා. මුලින් නම් ඒ ව්‍යායාම්වල යෙදෙන විට ඇඟට තරමක අපහසුවක් ඇති වුණා. අත්වල මස්පිඬු පෙරළීම වගේම විටින් විට වේදනාවත් මතු වුණා. ඒත් මම ඒ දේවල් දිගටම කරගෙන ගියා.
එතකොට ඔබේ ආහාර වේල වෙනස් වුණේ කොහොමද? ඔයාගේ පවුලේ අයගෙන් එයට ලැබෙන සහයෝගය මොන වගේද?
මම ක්‍ෂණික හා අධික පැණි රස ආහාර අෑත් කළා. ඒ වෙනුවට ගත්තේ රසවත් පලතුරු, සලාද හා මුං ආහාර වර්ගයි. උත්සව අවස්ථාවල තියෙන තෙල් කෑම ජාති මම තදින්ම ප්‍රතික්‍ෂේප කළා. ඒ වෙලාවට තාත්තා තමයි මට සලාද, කිරි, පලතුරු යුෂ වගේ ආහාර වර්ග ගන්න උනන්දු කරන්නේ.
ඔබේ ආහාර වේල සකස් වෙන්නේ කොහොමද?
• ව්‍යායාම්වලට පෙර - තේ කෝප්පයක් හා මාරි බිස්කට් එකක්.
• ව්‍යායාම් - පැයක් ඇතුළත කිලෝමීටර් 9ක් විතර දිගටම ඇවිදීමේ ව්‍යායාම කරනවා.
• විනාඩි 15ක් 20ක් පමණ වේලාවක් දිගදුම් ව්‍යායාම කිරීම.
• උදෑසන ආහාරය - (ගස්ලබු, අන්නාසි, ඇපල්, දොඩම්, රටඉඳි, කොමඩු) ආදී පලතුරු දමා සාදාගත් සලාද පීරිසි 2ක්.
• දිවා ආහාරය - චපාති 2ක්.
• හවස කෙටි ආහාරය - මාරි බිස්කට් 2ක් හෝ පලතුරු පානයක් හෝ ආටා පිටිවලින් සාදාගත් කෙටි ආහාරයක්.
• රාත්‍රි ආහාරය - පිපිඤ්ඤා, තක්කාලි, කැරට්, ගෝවා යන ඒවා යොදා පිළියෙල කරගත් ලොකු සලාද බඳුනක්.
ඔබේ සිරුරේ වෙනස දැන් ඔබට දැනෙන්නේ කොහොමද?
ඇත්තටම ඒක ලොකු වෙනසක්. කිලෝ 80කින් කිලෝ 52කට බර අඩුකර ගැනීම මම ලබපු ලොකුම ජයග්‍රහණයක්. දැන් මට තියෙන්නේ අවුරුදු 20ක යුවතියකගේ පෙනුමක්. ඒ බව මගේ හිතවතියන් පවා මට කිව්වෙ හරිම සතුටින්. දැන් මගේ ජීවිතය හරිම ප්‍රබෝධවත් කියලා මට දැනෙනවා.
ශාලිකා රංගනී සමරදිවාකර
උපුටා ගැනීම මව්බිම
