සුබපල උදා කරන ග්‍රහ පිහිටීම් ඔබේ ජන්ම පත්‍රයේත් තිබෙනවාද?
අනාදිමත් කාලයක සිට පැවත එන මෙම ජේ‍යාතිෂ නම් වූ වටිනා ශාස්ත්‍රයේ සඳහන්ව ඇති ශුභයෝග අතරින් විපරීත රාජ යෝගය කෙනෙකුට තමන්ටවත් අදහා ගන්නට නොහැකි අන්දමෙන් විශ්මිත ශුභපල උදාකරදෙන බවත්, මෙම යෝගය ජන්ම පත්‍රයක 6වැන්න, 8වැන්න සහ 12වැන්න අධිපති ග්‍රහයන් යෝගවීමෙන් සෑදෙන බවත් සඳහන් වේ. සාමාන්‍යයෙන් දුෂ්ට ස්ථාන ලෙස සැලකෙන ස්ථානවල අධිපති ග්‍රහයෝ 6 අධිපති 6, 8, 12 යන තුනෙන් එක් ස්ථානයක පැවතීමෙන් හර්ෂ යෝගයද 8 අධිපති 6, 8. 12 යන ස්ථානවලදී සරල යෝගයද 12 අධිපති ඉහත ස්ථානයක නම් විමල යෝගයද උදාවේ.
එම යෝග 3ම පිහිටන්නේ නම් එනම් 6 අධිපති 8 අධිපති හා 12 අධිපති ඉහත ස්ථාන එකක හෝ ග්‍රහයන් තිදෙනා ස්ථාන තුනේ වෙන් වෙන්ව වුවත් යෙදීමෙන් විපරීත රාජ යෝගය උදා වේ. මෙම විපරීත රාජයෝග සහිත ජන්ම පත්‍ර හිමියන් බලාපොරොත්තු නොවන ආකාරයේ තනතුරු නිලතල ලැබීම, ධනය ලැබීම, උසස් ලොතරැයි දිනුම් ඇදීම වැනි ශුභ පල උදාකර ගැනීමට වාසනාව ඇති අය වේ. මෙම යෝගය නිසා එම ස්ථානවල අශුභ පලයන් ද දෝෂ භංග වේ. තවද මෙම ග්‍රහයන් බලවත් වූ තරමට යෝගයේ ශුභපලද වැඩි විය හැකිය.
තවද කුජ ග්‍රහයා බලවත්ව කේන්ද්‍රස්ථානයක එනම් 1, 4, 7, 10 යන ස්ථානයක උච්චව ස්වක්‍ෂේත්‍ර ආදී බලයෙන් යුක්ත නම් රුචක නම් යෝගය පිහිටයි. එඩිතර කඩිසර ගති ලක්ෂණ, නොපසුබස්නා උත්සාහය, තම ඉලක්කයන් සපුරා ගැනීම, ආපසු හැරීමක් නොමැතිව උදේ‍යාගයෙන් කටයුතු කරගෙන යෑම, ඕනෑම භාරධුර කාර්යයකට ඉදිරිපත් වී සාර්ථක කර ගැනීම මෙවැන්නන්ගේ විශේෂ ලක්ෂණය වේ. මේ කුජ ග්‍රහයාගේ බලවත්කම හා සමානව අනෙකුත් ග්‍රහයෝ බලවත් නම් ශුභපලය තවදුරටත් දෙගුණ වීමට හැකියාව ඇත.
සෙනසුරු ග්‍රහයා ඉහත ස්ථානවල බලවත් වීමෙන් සෑදෙන සස යෝගයද එලෙසම ශුභපල ගෙන දෙන තවත් ශුභයෝගයක් වන අතර, පිරිස් බලය, ආයුෂ බලය සහිත සමාජයේ කැපී පෙනෙන ගති ලක්ෂණ ඇති අය මෙම යෝගයේ උපන් අය වෙති. දේශපාලනයේ ඉතා ඉහළට ගිය බොහෝ දෙනාගේ ජන්ම පත්‍රවල මෙම සස යෝගය සටහන්ව ඇති බව දක්නට ලැබේ. එසේම බුධ ග්‍රහයා බලවත්ව කේන්දරගතව සෑදෙන "භද්‍ර යෝගය" නම් වූ බලවත් ශුභ යෝගයෙන් උපන් අය කථිකත්වයෙහි, ලේඛන කලාවේ හා නිර්මාණාත්මක දක්ෂතාවන් ඇති ඉගෙනීම් කටයුතුවල අති දක්ෂ වූ බුද්ධිමතුන් අතර විශේෂ කැපී පෙනීමෙන් යුතු අය වේ. මෙම යෝගය සහිත අය ඉගෙනීමෙන් ඉතා ඉහළට නොයන්නේ නම් ඒ වෙනත් අශුභපල දෙන යෝග ඵල නිසාම විය හැකිය.
සිකුරු ග්‍රහයා ඉහත ස්ථානයක බලවත් වීමෙන් සෑදෙන ' මාලවී යෝගය' නම් වූ ශුභ යෝගය විනෝදයට නැඹුරු වූ සෞන්දර්යාත්මක හැකියාවන් ඇති සැහැල්ලු ජීවිත ගතකරන අය වන අතර මෙවැනි අය රූප සොභාව ඇතිවීම, අන් අය අතර ප්‍රියමනාප හැසිරීම හා නිතරම සතුටින් ජීවත් වීමට වාසනාව ලද්දෝ වෙති. තවද 1,4, 7, 10 යන ස්ථානයක ගුරු ග්‍රහයා බලවත්ව සිටීමෙන් යෙදෙන 'ගුරු හංස යෝගයද' තවත් ශුභපල ලබාදෙන විශේෂ යෝගයක් වන අතරම මෙම යෝගයෙන් උපදින අය ධනය ලබන, පිරිවර ඇතිව ජීවත් වන වාසනාවන්ත ගුණවත්. යහපත් මිනිසුන් වේ. බොහෝ විට වාසනාවන්ත දරුවන් ලැබීමටද, දරුවන්ගෙන් උදවු උපකාර ලැබීමට මොවුන්ට හිමිකම ලැබේ.
ජේ‍යාතිෂයේ පවතින අනෙක් ප්‍රබල ශුභ යෝගය වන්නේ "ගජකේෂරී යෝගයයි". මෙහි තේරුම ඇතුන් මැද වන් සිංහයා යන්නයි. මෙම බලවත් යෝගය සහිත අය තම තමන්ගේ සමාජ මට්ටමේ තත්ත්වය අනුව කිසියම් වැදගත්කමක් ඇති කැපී පෙනීමක් සමාජ තත්ත්වයක් ලබන්නෝ වෙති. යෝගයේ යෙදී ඇති ප්‍රබලත්වය අනුව ශුභපලය අඩු වැඩි වේ. උසස් තනතුරු නිලතල ආර්ථික දියුණුව හා සමාජ පිළිගැනීම මෙම යෝගය නිසා අත් විඳින්නට හැකියාව ඇත. අපේ රටේ බිහිවුණු අගමැතිවරු, ජනාධිපතිවරු අතරද මෙම යෝගය සහිත අය සිටි බවද සඳහන් කළ හැකිය.
ජේ‍යාතිෂයේ සඳහන්ව ඇති ප්‍රබල යෝගයන් අතරින් 'චන්ද්‍රාධියෝගය'ද ශුභපල උදාකරන තවත් ශුභ යෝගයක් වන අතරම මෙම යෝගය සෑදෙන්නේ චන්ද්‍රයාගෙන් 6, 7, 8 යන ස්ථානවල හෝ එම ස්ථාන තුනෙන් එකක චන්ද්‍ර, බුධ, ගුරු යන සෞම්‍ය ග්‍රහයන් තිදෙනා තැන්පත් වීමයි. මෙය ඉතාම වටිනා විශේෂ යෝගයක් වන අතරම සමාජ ගෞරවය ලබා ජීවත් වීම ඉහළ තනතුරු ලැබීම, ආර්ථික වශයෙන් දියුණු වීම යනාදී ශුභපල උදා කරයි. එසේම ලග්නයෙන් 6,7. 8 යන ස්ථානයක හෝ එක් ස්ථානයක චන්ද්‍ර, බුධ, ගුරු යනාදී වශයෙන් වූ සුබ ග්‍රහයන් තැන්පත්වීමෙන් යෙදෙන ' ලග්නාධියෝගය'ද ජන්මියාට ශුභපල උදාකරන තවත් යෝගයක් වේ.
මෙවැනිම ශුභ යෝග බොහොමයක් ජේ‍යාතිෂයේ සඳහන්ව ඇති අතර, මෙම ශුභ යෝගයන් ඵලදීමේදී ජන්ම පත්‍රයේ පවතින වෙනත් යෝග මෙන්ම එම යෝගවල බල දුබලතාවන් අනුව ශුභපලය උස් පහත් විය හැකි අතරම, අශුභපල යෙදී ඇත්නම් ශුභඵල අවම වීමත් සිදුවිය හැක. එසේම අන් අයට උපකාර වීම, සාධාරණ ලෙස ජීවත් වීම තුළින් තමන්ගේ උපන් ජන්ම පත්‍රයේ පවතින ශුභ යෝගවලින් යහපත් ප්‍රතිඵල භුක්ති විඳීමට වාසනාව ලැබෙන බව වැඩිදුරටත් සඳහන් කරනු කැමැත්තෙමි.
උපුටා ගැනීම මව්බිම
