ලග්නයට හිමි රැකියාව - ධනු ලග්නය
ධනු ලග්න හිමි අයගේ ලග්න අධිපති ගුරු වන අතර රැකියාව පිළිබඳ කියැවෙන දහවැන්න කන්‍යා රාශියයි. එයට අධිපති ග්‍රහයා බුධයි. බුධ ග්‍රහයා දහවැන්න තුළම සිටී නම් භද්‍ර නමැති පංච මහා පුරුෂ යෝගය උදාවීම තුළින් හොඳ රැකියාවකට හිමිකම් දරයි. පොත්පත්, ලිපි ලේඛන ආශ්‍රිතව රැකියාවකට භාග්‍ය හිමි කරයි. බොහෝ දුරට පාසල්, රජයේ කාර්යාලවල රැකියාවක නිරත විය හැකියි. කුඩා කාලය තුළ අධ්‍යාපනය අසාර්ථක වුණොත් කැටයම් ශිල්පය හා කුඩා ව්‍යාපාර ආශ්‍රිතව රැකියාවලට යොමු කරයි.
ගුරු දහවැන්න තුළ නම් ලග්න අධිපති කේන්ද්‍රගත වීම පිහිටීමකි. රජයේ රැකියාවක් ලැබීමට භාග්‍ය ඇත. එහි මූලිකත්වය ගෙන කටයුතු කරයි. ඉඩකඩම් දේපළ වෙළෙදාම් පිහිටයි. රැකියාවට අමතරව වෙනත් ආදායම් උපයන මාර්ග ඇති අයෙකි. අවංකව වගකීමෙන් යුතුව තමන්ගේ රාජකාරිය කරයි. මාධ්‍ය වැනි වෘත්තියක් පිහිටීමට භාග්‍ය ඇත.
සිකුරු දහවැන්න තුළ නම් අයස්ථාන අධිපතියා කර්මස්ථාන ගතවීම හොඳ පිහිටීමකි. නමුත් සිකුරුට මෙය නීච රාශියකි. රැකියා, ව්‍යාපාරවලට සතුරු කරදර තරමක් ඇතිවීමට ඉඩ පවතින අතර වරින්වර වැටුප් පිළිබඳ ගැටලු සහගත තත්ත්ව ඉස්මතු වෙයි. සිකුරු සමඟ බුධ සිටියොත් නීච භංගකර රාජ යෝග උපදවයි. රැකියා, ව්‍යාපාර කටයුතු ඉතාමත් ඉහළ මට්ටමකට ගෙනයන පිහිටීමකි.
සෙනසුරු දහවැන්න තුළ නම් ධනස්ථාන අධිපති රැකියා ස්ථානගත වීම් ප්‍රබල පිහිටීමකි. හොඳ රැකියාවකට භාග්‍ය ඇත. තමන් අපේක්ෂා කළාට වඩා වැඩි වැටුපක් ලබයි. රැකියාව තුළින් සියලු ප්‍රතිලාභ ලබයි. උත්සාහයෙන් හා උනන්දුවෙන් රැකියාව කරන අයෙකි. ඉහළ තනතුරු ලබයි. විශාල පිරිසක් අතර සහයෝගයෙන් යුතුව රැකියාව කරයි.
රාහු දහවැන්න තුළ නම් රැකියා කටයුතුවලට ඉතා හොඳයි. කුඩා කල සිට රාහුගේ මහදශාව හිමි අයකු නම් ස්ථිරවම ඉන්ජිනේරු මහතකු විය හැකිය. රැකියාවන් තුළ විශාල දියුණුවක් ලබයි. කාර්යබහුල වුවත් මහන්සියේ තරමට ප්‍රතිඵල අත්විඳිය හැකියි. ප්‍රවාහන පහසුකම් ලබයි.
කේතු දහවැන්න තුළ නම් කුමක් හෝ ගැටලුසහගත තත්ත්වයක් රැකියාව තුළ උද්ගත විය හැකිය. ඕනෑකමින් තොරව සේවය තුළ නිරතවන අතර ප්‍රසිද්ධිය නොලත් ස්ථානයක වැඩ කරයි.
රවි ග්‍රහයා දහවැන්න තුළ නම් පෙර ආත්ම භාවයේ කර ඇති රැකියාව ලබයි. හොඳ ස්ථිර රැකියාවකට භාග්‍ය ලබන අතර රජයේ ඉහළ තනතුරු දරන මැති ඇමැතිවරු ඇසුරට ලැබිය හැකියි. වරින්වර විදේශ ගමන්වලට හිමිකම් දරයි. බාධාවකින් තොරව රැකියාව කිරීමට වාසනාව තිබෙන බැවින් රවි සමඟ බුධ ග්‍රහයාත් සිටීනම් ධර්ම කර්මාධිපති රාජ යෝගය ලබයි.
සඳු ග්‍රහයා දහවැන්න තුළ නම් සඳු දහවැන්නට එතරම් නරක නොවූවත් චන්ද්‍රයා ඔබට අසුබ ප්‍රතිඵල අත්කරන ග්‍රහයෙකි. අෂ්ටම අධිපතියා බැවින් රැකියා කටයුතුවලට බාධක ඇති කරයි. සඳුගේ මහ දශාවක් හෝ අතුරු දශා කාලවලදී තනතුරුවලින් පහත වැටෙයි. රැකියා අහිමි විය හැකිය. නීතිමය ප්‍රශ්නවලට මුහුණදීමට සිදුවේ.
අඟහරු දහවැන්න තුළ නම් විදේශ ගමන්වලට භාග්‍ය ඇත. බන්ධනාගාර රෝහල් ආශ්‍රිතව රැකියාවකට හිමිකම් දරන පිහිටීමකි. ආරක්ෂක අංශවල හෝ වශයෙන් කාර්මික අංශයේ තාක්ෂණය පිළිබඳ පුහුණුවක් ලැබීමට වාසනා බලය ඇත්තෙකි. කාර්යශූර ලෙස රැකියාවේ නිරතවන අයෙකි. පොලිසිය, හමුදා වැනි අංශවල ඉහළ තනතුරු දැරීමටද භාගය උදා කරයි.
ප්‍රවීණ ජේ‍යාතිර්වේදී
සරත්චන්ද්‍ර බෝතලාගේ
උපුටා ගැනීම මව්බිම පුවත්පත
