ඔබේ බුධ මණ්ඩලය එසේනම් සුබ අසුබ මෙහෙමයි!
අතේ සුලඟිල්ල හෙවත් බුධ ඇඟිල්ලට පහතින් පිහිටි කොටස බුධ මණ්ඩලයයි. මෙම බුධ මණ්ඩලය මගින් පුද්ගලයෙකුගේ ව්‍යාපාර කිරීමේ හැකියාව, සහජ දක්‍ෂතාව, පරිසරයට ඇති ලැදියාව, කථිකත්වය, බුද්ධිය, අදහස් ප්‍රකාශ කිරීමේ හැකියාව හා යමක් සැලසුම් කිරීමේ හැකියාව පෙන්නුම් කරයි. බුධ මණ්ඩලයෙන් පැවසෙන මෙම කරුණු අඩු වැඩිවීම මණ්ඩලයේ ස්වභාවය, පිහිටීම හා එහි පිහිටන සුබ අසුබ ලකුණු අනුව වෙනස් වේ.- ප්‍රබල බුධ මණ්ඩලය හෙවත් උත්තල බුධ මණ්ඩලය.
- අති ප්‍රබල බුධ මණ්ඩලය හෙවත් අධි උත්තල බුධ මණ්ඩලය
- දුබල බුධ මණ්ඩලය හෙවත් අවතල බුධ මණ්ඩලය
- අති දුබල බුධ මණ්ඩලය හෙවත් අධි අවතල බුධ මණ්ඩලය
- තලීය බුධ මණ්ඩලය
ප්‍රබල බුධ මණ්ඩලයක් හෙවත් උත්තලාකාර බුධ මණ්ඩලයක් පිහිටි පුද්ගලයා දැකීමට ඉතා ප්‍රිය වූවෙකි. මොවුන්ගේ කටහඬ ඉතා මිහිරිය. ක්‍රියාශීලීය. විචක්‍ෂණ බුද්ධියෙන් හා තීක්‍ෂණ බුද්ධියෙන් හෙබි මොවුන් යමක් වටහා ගැනීමේ ශක්තියෙන් ද ප්‍රබල පුද්ගලයන් ය. ගණිතයට වැඩි දක්‍ෂතාවක් පෙන්වන මොවුන් අනෙක් විෂයන්වලට ද දක්‍ෂය. ආශ්‍රයට ලැබෙන ඕනෑම අයෙකු පහසුවෙන් තේරුම් ගන්නා මොවුන්ගේ සිතුවිලි නම් වෙනස්වන සුළුය. ඒ නිසාම මොවුන්ව කිසිවෙකුට තේරුම් ගත නොහැකි චරිත වේ. ව්‍යාපාර අංශයෙන් දියුණු වන මොවුන් කාලය නාස්ති නොකරයි. කථාවෙන් අනුන් නම්මා ගැනීමට මොවුන් අතිදක්‍ෂයන් ය.
ප්‍රබල බුධ මණ්ඩලයෙන් කියැවෙන පලාපල මෙසේ වෙද්දී අති ප්‍රබල බුධ මණ්ඩලයක් පිහිටි පුද්ගලයා ගැන ද කිව හැකි පලාපල බොහෝ ය. මොවුන් බුද්ධියෙන් අඩු, කපටි, කටින් බතලකොළ සිටුවන අය වේ. මොවුන් කථා කිරීමේදී කිසිවෙකුගේ මුහුණ දෙස බලා කතා නොකරයි. කතාවද සුහද නොවේ. අනුන්ගේ යහපතට ඊර්ෂ්‍යා කරන මොවුන් අනුන්ට කරදර ද කරයි. අනුන්ගේ දුක, කරදර බලා මොවුන් අසීමිතව සතුටු වේ. මැරවරකම්, සොරකම් ආදිය සිදුකර ජීවිතයේ බොහෝ කාලයක් සිරගෙවල්වල කාලය ගත කරයි. මොවුන්ගේ ශරීරය උෂ්ණාධික ශරීරයක් වන අතර මොවුන්ට නිතර තිබහ ඇති වේ. නොයෙකුත් අපරාධවලට මූලික වන මොවුන්ට සමාජයේ ඇත්තේ අප්‍රසාදයකි. මෙවන් මණ්ඩලයක් පිහිටි පුද්ගලයා නිතර බොරු කියයි.
දුබල බුධ මණ්ඩලයක් හෙවත් අවතල බුධ මණ්ඩලයක් පිහිටි පුද්ගලයා ඉතා කම්මැලි, පුරාජේරු දොඩවන, මුඛරිකම අනුන් රැවටීමට යොදා ගන්නා පුද්ගලයෙකි. පැහැදිලිව අදහස් ප්‍රකාශ නොකරන මොවුන් සිතින් එකක් සිතා කටින් එකක් කියන වංචා සහගත පුද්ගලයන් ය. මොවුන් තුළ ඇති හැකියාවන් ද යොදා ගන්නේ වංචනික වැඩ සඳහා ය.
අති ප්‍රබල හෙවත් අධි අවතල බුධ මණ්ඩලයක් පිහිටි පුද්ගලයා බොහෝ විට ගොත හෝ ගොළුය. එසේ නොවූවද පැහැදිලිව කිසිවක් කියා ගත නොහැක. කතාවක්, බහක් නැති තරම් ය. ප්‍රබල බුධ මණ්ඩලය හෙවත් උත්තල බුධ මණ්ඩලය ගැන පැවසූ සුබ පලාපලවල අශුභ පැත්ත අධි අවතල බුධ මණ්ඩලයක් පිහිටි පුද්ගලයාට ලැබේ.
තලීය බුධ මණ්ඩලය ද හොඳ පිහිටීමකි. මොවුන්ගේ කථාව සමබර වේ. එමෙන්ම දක්‍ෂතා ද සමබරය. මොවුන් සමස්තයක් වශයෙන් ගත් කල සමබර ජීවිතයකට උරුමකම් කියයි.
මණ්ඩලවල පිහිටීමෙන් ලැබෙන සුභ හෝ අශුභ ඵල අඩු වැඩි කරන හස්ත ලකුණු ගණනාවක් ද වේ. සුබ මණ්ඩලයක සුබ ලකුණක් පිහිටීමෙන් අදාළ මණ්ඩලයේ සුබපල තිව්‍ර කරයි. නමුත් සුබ මණ්ඩලයක වුවද අශුභ ලකුණක් පිහිටිය හොත් මණ්ඩලයට අදාළ සුබපල අවම කරයි. එමෙන්ම අශුභ මණ්ඩලයක අශුභ ලකුණක් පිහිටීමෙන් අශුභ පල තීව්‍ර කරන අතර සුබ ලකුණක් පිහිටීමෙන් අශුභ පල අවම කරයි.
බුධ මණ්ඩලයේ පිහිටන සුබ අසුබ ලකුණු සලකා බලමු. බුධ මණ්ඩලයේ පිහිට සුබ ලකුණු මෙසේය.
චතුරස්‍රය :
මෙවැනි ලකුණක් බුධ මණ්ඩලය තුළ වේ නම් ඔහු හෝ ඇය තම රැකියාවෙන් දියුණුව ලබන කෙනෙකි. තවද මොවුන්ට අනතුරු, කරදරවලින් ආරක්‍ෂාව ලැබේ.
තනි ඉර :
මෙවැනි ලකුණක් බුධ මණ්ඩලය තුළ ඇති තැනැත්තා හෝ තැනැත්තිය ව්‍යාපාරවලින් බොහෝ ධනවත් වේ. සමාජ තත්ත්වය ද උසස් මට්ටමකට යන පිහිටීමකි.
ඉරි කිහිපයක් :
බුධ මණ්ඩලය තුළ මෙවැනි ලකුණක් පිහිටි පුද්ගලයන් උසස් වෘත්තීන්වල නියැලෙන, එයින් ගෞරවය, කීර්තිය අත්පත් කර ගන්නා අය වේ.
ත්‍රිකෝණය :
මොවුන් කතාවට ඉතා දක්‍ෂය. ව්‍යාපාරවලින් දියුණුවන පිහිටීමකි. ධනවත් වන බලවත් වන අයෙකි.
කතිරය :
මෙම ලකුණ සුබ අශුභ ඵල මිශ්‍ර එකකි. බුධ මණ්ඩලය තුළ මෙවැනි පිහිටීමක් ඇති කෙනා ඉතා බුද්ධිමත් ය. එමෙන්ම ඉතා කපටිය. තමන්ගේ වැඩවලට විරුද්ධකාරයින් ඇතිවන පිහිටීමකි.
තරුව :
මෙයද සුබ අශුභ මිශ්‍ර හස්ත ලකුණකි. මොවුන් දක්‍ෂ කථිකයන් වේ. ව්‍යාපාරවලින් මෙන්ම ජනමාධ්‍ය අංශයේ ඉහළට යෑමට ලැබෙයි. නමුත් මොවුන්ට අස්ථාන චෝදනා නිතතින් හිමිවේ. මානසික බිඳවැටීම් සිදුවේ.
සිරස් රේඛා රාශියක් :
බුධ මණ්ඩලයේ මෙවැනි පිහිටීමක් ඇත්නම් මොවුන් ඉගෙනීමට ඉතා දක්‍ෂය. සෑම දෙයක්ම තර්කානුකූලව සොයා බලා පිළිගනී. නමුත් මොවුන් වංචනිකයන්ට පහසුවෙන් හසු වේ. දියුණුව අඩු පිහිටීමකි.
බුධ මණ්ඩලයේ පිහිටන අශුභ ලකුණු ගැන දැන ගනිමු.
දූපත :
මෙවැනි ලකුණක් බුධ මණ්ඩලය තුළ වේ නම් මොවුන් භයානක සිදුවීම්වලට ගොදුරු වේ. එනිසාම මානසික බිඳවැටීම්, මානසික ආබාධ ඇතිවිය හැකි මෝඩ පුද්ගලයන් ය.
කවය :
මෙවැනි පිහිටීමක් බුධ මණ්ඩලය තුළ වේ නම් ඔහු හෝ ඇය හදිසි අනතුරකට ගොදුරුවීමට සිදුවේ. එම අනතුරින් මරණය හෝ සදා අකර්මන්‍යවීම සිදු වේ. මොවුන්ගේ ධනය පිරිහී යෑම සිදුවේ.
කරුව :
නිකරුනේ කාලය කා දමන්නන්ට මෙන්ම ජීවිතේ දිළිඳුව ගත කරන අයට මෙවැනි ලකුණක් බුධ මණ්ඩලය තුළ පිහිටයි.
දැල :
මොවුන් අපරාධකරුවන් සේ හැසිරේ. රිය අනතුරුවලට ලක්වී මියයන පිහිටීමකි. මෙසේ පිහිටි බොහෝ දෙනෙක් සියදිවි හානිකර ගනී.
කඩඉරි :
මෙවැනි පිහිටීමක් බුධ මණ්ඩලය තුළ පිහිටි පුද්ගලයා මානසික අසහනයෙන් සිටින්නෙක් වේ. තමා කරන රැකියාවේ හෝ ව්‍යාපාරයේ නොයෙකුත් බාධා පැමිණේ. ඒ ගැන සිතා නිතර පසුතැවේ.
කළු තිත :
තම ධනය සොරුන් පැහැර ගන්නා අයට මෙවැනි කළු තිතක් බුධ මණ්ඩලය තුළ පිහිටයි. කොටින්ම කියතොත් මොවුන් සොරුන් නිසා විනාශයට පත්වේ.
කෙඳි රේඛා :
මෙවැනි පිහිටීමක් ඇති තැනැත්තා හෝ තැනැත්තිය නිතර කටමැතකම් දොඩවයි. මහා වාචාලයෙකි.
කතිර කිහිපයක් :
මෙවන් පිහිටීමක් ඇත්තාට බොහෝ දුක්බර මරණයක් හිමිවේ. ලෙඩක් සෑදී විඳවීම හෝ යම් අයකුගේ ඝාතනයකට ලක්වීම දැකිය හැකිය.
උපුටා ගැනීම දිවයින
