දරු පල ලැබ ගන්න මහානර්ඝ ඖෂධයක්‌ මෙන්න
දරු සම්පත් අහිමිවීම පිළිබඳව කාන්තාවනට පමණක්‌ වරද පැටවීම සාධාරණ නැත. ස්‌ත්‍රී -පුරුෂ දෙදෙනාගේම කායික හා මානසික දුබලතාද දරුඵල අහිමිවීමට හේතුයි. දරු සම්පත් නොමැති පවුල් තුළ සාමය-සමගිය බිඳ වැටෙයි. අනාගත පැතුම් බිඳීයැම මත විවාහය බිඳ වැටීමද බොහෝ දුරට සිදුවෙයි. සමාජය විසින් දරුඵල අහිමි කාන්තාවන් වඳ ගැහැනියක ලෙස හෑල්ලුවට ලක්‌කිරීම සාධාරණ නොවෙයි. ඇතැම් විට පුරුෂයාගේ දුබලතාවක්‌ මත නිදොස්‌ කාන්තාවක වරදකාරියක ලෙස පෙනෙන්නට හැකියාව ඇත. කේන්ද්‍ර සටහනක ග්‍රහයන් දක්‌වන සුබ-අසුබ බව යනු පෙර කුසල්-අකුසල්ය. පෙර අකුසල ආනන්තරීය පාප කර්ම නොවන්නේ නම් ඒවා සමනයට පිළියම් ඇත. ඇතැම් කාන්තාවන් ගැබ්ගෙන කෙටි කලක්‌ තුළ ගබ්සාවීමද - මළ දරුඋපත් බිහිවීමද සිදුවෙයි. පොරොන්දම් නොගැලපීම මත දරුඵල ඇතිවීමද පොරොන්දම් ගැලපීම මත දරුඵල අහිමිවීමද විමසා බැලිය යුතුවෙයි. පහ අධිපතියා නීච - සතුරු ගතව හෝ ශනි-රාහු වැනි ග්‍රහයෙකුට පස්‌ වැන්න පෙනීමද දරුඵල අහිමි වීමට හේතුය. පහ අධිපතියා 22 දෙර්කාණාධිපති වීමද දරුඵල අහිමිවීමට තවත් ප්‍රබල හේතුවකි. සඳුගේ සිකුරු දුර්වලව ලග්නයේ සිටීමද තමනට වඩා සහකරුගේ ලිංගික ශක්‌තිය දුර්වල බව ප්‍රකට කිරීමකි. රවි හෝ කුජ 22 දෙර්කාණාධිපතිව ලග්නයේ සිටීමත් සහකරුගේ ලිංගාශ්‍රිත උෂ්ණ කාරක බව පෙන්වීමකි. හත්වැන්නේ කුජ සිටියදී ලග්නයේ සඳු සිටීම ඔහු හෝ ඇයට වඩා තමා ලිංගික පෞරුෂයකින් හෙබි අයෙකු බව පෙන්වයි. දෙදෙනාගේ යුග දිවිය පරීක්‍ෂා කිරීමට ලග්නය සහ හත්වැන්න මැනවින් පරීක්‍ෂා කළ යුතුවෙයි. සුවනොවන රෝග පීඩා, ලිංගික නොගැළපීම් මත විවාහය අර්බුදකාරී වන්නේ නම් අවැසි ප්‍රතිකර්ම වටහාගත යුතු වෙයි. දරුඵල අහිමි කාන්තාවකගේ ඇස්‌යට කලුවීම ඇයට කළුකුමාර යක්‍ෂයාගේ බැල්ම යොමුවීමකි. එම බාධක මැඬපැවැත්වීමෙන් දරුඵල උදාකරගත හැකිය.
පුරුෂයාගේ ලිංගික ශක්‌තිය දුබලවීම, දෙදෙනාගේම උෂ්ණාධික සිරුරුවල සොභාවයද, මන්දපෝෂණය, ශරීරය අධිකව වෙහෙසීමද, අධික තරුබාරු බවද දරුඵල අහිමිවීමට හේතුකාරකයන්ය. යමෙකුගේ කේන්ද්‍ර සටහනක හත්වැන්නේ ප්‍රබල ග්‍රහයකු සිටීමත් ලග්නයේ කේතු සිටීමත් සහකරුගේ ලිංගික හැකුළුම් කාරක බව පෙන්වයි. කාන්තාවකගේ කේන්ද්‍රයේ පස්‌වැන්නේ කේතු සිටීම ඇගේ ගර්භාෂ ගත හැකුළුම්කාරක බව පෙන්වයි. නහරගත දුබල වීම් පෙන්වයි. විවාහක කාන්තාවන් සියයකගෙන් පළමු වසර තුළ දරුඵල අහිමි කාන්තාවන් දහයක්‌ පමණ සිටිති. කිසිදු ශාරීරික දුබලතාවක්‌ නොමැතිව ඔවුන් ගැබ්බර නොවූවා විය හැකිය. එම දරුඵල අහිමිවීම පිළිබඳව කාන්තාවකට පමණක්‌ දබරැගිලි යොමුකළ යුතු නොවේ. දුර්වල පුරුෂයෝද සිටිති. එහෙයින් නිවැරැදි වෛද්‍ය පරීක්‍ෂණයකින් සරු නිසරුභාවය පිළිබඳ සනාථ කරගත හැකිවෙයි. මේ සියල්ල නිවැරැදිනම් දරුඵල අහිමිවීම පෙර කළ අකුසල කර්මයක්‌ විය හැකිය. මද සරුභාවය ද දරුඵල සඳහා ගැටලුවකි. දරුඵල අහිමිවීම මත විවාහය ගැටලුසහගත කරගැනීමට වඩා එයට විසදුම් සෙවිය යුතුය. මේ සඳහා කෙම් පිළිවෙත් හි පිහිට අවැසි වෙයි. අපේ පැරණියන් දරුඵල අහිමිවීමේ ගැටලුවෙන් යුවති පතීන් මුදා ගත්තේ කෙම් පිළිවෙත් තුළින්ය. සරළ බව සහ රහසිගත බව මෙයට මූලික වෙයි. කෙම් පිළිවෙත් බලවත් වන්නේ එය වචන භාවිතයෙන් තොරව ක්‍රියාත්මක කරන තරමටය. පැරණි පත්ඉරුවකින් සොයාගත් ඖෂධීය පානයක්‌ උඩරට ජයනිත්‍ය පරපුරේ රහසිගතව භාවිත විය. එම ඖෂධීය පානය තුළින් නිසැකව දරුඵල උදාකර ගත හැකිවෙයි. එහෙත් එයට පෙර අකුසල කර්මයක්‌ සහ උත්පත්තිගත ආබාධයක්‌ සමනය කළ හැකි නොවේ.
මදසරුභාවය, නහරගත දුබලතා සහ ගර්භාෂගත ඇකුළුම් කාරකයන්, වියළිබව දුරුකිරීමේ විශ්මිත බලයක්‌ මෙම ඖෂධීය පානයේ ඇත. විවාහක යුවළක්‌ දිනක්‌ හැර දිනක්‌ දින පහළොවක්‌ සම්පූර්ණ වන ලෙස පුරා මාසයක්‌ මෙය පානය කළ යුතුවෙයි. එය සරළය, මෘදුය, සිසිල්ය. මාසයක්‌ පානය කිරීමෙන් ශාරීරික දුබලතා දුරුවෙයි. මෙම පානයෙන් ශරීරය සිසිල් කරයි. ප්‍රබෝධය වඩවයි. ලිංගික ශක්‌තිය ප්‍රබල කරවයි. මේ සඳහා කළ යුතුවන්නේ හොඳින් ඉදුනු බේත් නොගැසූ ඇම්බුන් කෙසෙල් තෝරා ගැනීමයි. ඇම්බුන් කෙසෙල් ගෙඩි තුනක්‌ පමණ පොල් කිරි, සීනි, ලුණු දමා පොඩිකර පානයක්‌ සේ සකසා උදැසන හිස්‌බඩ දෙදෙනාම නියමිත ආකාරයට දින පහළොවක්‌ පානය කිරීමෙන් දුබලතා දුරුවී ප්‍රබල ශක්‌තියක්‌ ඇති වෙයි. ඔබ දෙදෙනාට දරුපල අහිමි නම් මෙම අගනා ඖෂධය පානය කරන්න. යහපත් ප්‍රතිඵල උදාවනු නිසැකයි.
මතුගම ජනනෙත්ති
උපුටා ගැනීම දිවයින පුවත්පත
