පුංචි ඉඩකට ගැළපෙන අලුත් තාලේ ගෙයක්
නිවෙසක් ඉදිකරන්න බලාපොරොත්තුවක් හිතේ තියෙන හැම කෙනකුටම ඒ සඳහා තමන්ටම අනන්‍ය කාරණා බොහොමයක් තිබෙනවා. ඒ අතරේ නිස්කලංක, ඉඩම හැකි තරම් ඉතිරි කරගත් කාමර ගණන සහ ඒවායේ ප්‍රමාණ වැඩි, පරිසරයට වඩාත් විවර වන කුඩා වුණත් ඉඩකඩ විශාලව පෙනෙන නිවෙසක් වීම වැනි හීන බොහෝ දෙනකුට තිබෙන බව පෙනෙනවා.
මේ සියල්ල හරියටම ඉටු වෙන්න නම් ඒ ඒ ඉඩමට ගැළපෙන්න වගේම තමන්ට වැය කළ හැකි සීමාවේ නිවෙසක් වීම පිළිබඳව සැලකිය යුතුයි. අද අපි කතා කරන නිවෙස අවම වියදමකින් ඉදිකළ හැකි ඉඩකඩ ඇති නවීන පෙනුමේ සුන්දර කැදැල්ලක්.
පර්චස් 10කටත් අඩු ඉඩක් හිමි මේ ඉඩමේ නිවෙස එක් බිත්තියක් පමණක් අන්ධ බිත්තියක් ‰ (Blind Wall) ලෙස යොදාගෙන නිවෙස ස්ථාන ගත කර තිබෙනවා. ඒ ඉඩමේ ඉඩකඩ සැලකිය යුතු තරම් ඉඩක් ඉතිරි කරගැනීමේ අභිප්‍රායෙන් අන්ධ බිත්තිය දෙසින්ම වාහන නැවතුම ස්ථානගත කර තිබෙන අතර ඒ සඳහා සාමාන්‍ය වහලයකට වඩා වෙනස් ආවරණයක් යොදා තිබෙනවා. එම ඉඩ ඉහළ මහලේදී විවර වන නිසා ඉහළ මහල වෙත ස්වාභාවික ආලෝකය ඒ දෙසින් ලබාගැනීමටත් හැකිවෙනවා.
එසේම නිවෙසේ මුළුතැන්ගෙය තරමක් ඉදිරිපසට වන්නට ස්ථානගත වීමත්, වාහන නැවතුමට ජනේලයකින් විවර වීමත් නිසා නිවෙසට නවීන පෙනුමක් එක් කරනවා වගේම නිවැසියන්ගේ අන්තර් සම්බන්ධතා කෙරෙහි ධනාත්මක පෙලඹවීමක් සිදුවෙනවා. වාහන නැවතුමේ සිට ප්‍රධාන ද්වාරය වෙත වැරැන්ඩාවක් සැලසුම් කර තිබෙන අතර නිවෙසේ ආලින්දය හා කෑම සාලය (Living & Dining) එකම අවකාශයක සැලසුම් කර තිබෙනවා. ඉන් ඉඩකඩ අවම ලෙස යොදා ගැනීමට හැකි වී තිබෙනවා. මේ අවකාශය මුළුතැන්ගෙයට සමීප වන නිසාත් පහළ මහලේ පොදු අවකාශයන් සමීප නිසාත් සැලසෙන පහසුව විශාලයි.
පහළ මහලේ නිදන කාමර දෙකම සැලකිය යුතු ඉඩක් සහිතව පොදු නාන කාමරය මැදි කරගෙන සැලසුම් කර තිබෙනවා. ඉන් කාමර දෙකේම නිවැසියන්ට පහසුවෙන් මෙන්ම පොදු අවකාශයන්ට විවර නොවී පහසුකම් භාවිත කළ හැකි වීම විශාල වාසියක්. මෙම පහසුව මහල් දෙකෙහිම දැකිය හැකි මේ නිවෙසේ නාන කාමර දෙකම එක එල්ලේ පවතින නිසා සැලකිය යුතු මුදලක් ඉන් ඉතිරි වනු ඇති.
ඉහළ මහලේ නිදන කාමර හා පොදු නාන කාමරයට අමතරව ද්විත්ව අවකාශ (Double Height Spaces) දෙකකට මැදි වූ රූපවාහිනි නැරැඹුම් ස්ථානය පිහිටුවා තිබෙනවා. නිවෙස පුරා ස්වාභාවික ආලෝකය සහ වාතාශ්‍රය පවත්වා ගැනීමට මෙම අවකාශයන් ගෙන් ලැබෙන පිටිවහල ඉතා විශාලයි.
වහලයේ කොටසක් සාමාන්‍ය ලෙසත් ඉතිරි කොටස ස්ලැබ් එකක් ලෙසත් යොදාගෙන අහස උද්‍යානයක් (Roof Terrace) සහිතව සැලසුම් කර ඇති නිවෙස නාගරික හෝ අර්ධ නාගරිකව ලබාදෙන පෙනුම විශාලයි. වඩාත් පරිසරයට විවර වන ලෙස සැලසුම් කර ඇති මේ නිවෙස බොහෝ දෙනකුගේ සිහින ඉටුකරන නිවෙසක් බව කිව හැකියි. පර්චස් 9-10ක් වැනි ඉඩකට සැලසුම් කෙරුණු වර්ග අඩි 2300ක් පමණ වන මේ නිවෙස ඉදිකරන්න වැය වන මුදල රු. මි. 7.9ක් පමණ වේවි, නිවෙසක් ගැන දකින පොදු සිහිනවලින් පුරවාගෙන ඒ වෙනුවෙන් පියවර තබන්න දෙගිඩියාවෙන් ඉන්න අයට මේ නිවෙස ආලෝකයක් වේවි.
උපුටා ගැනීම මවුබිම.
