පරිගණකයට අබ්බැහිවුණු දරුවන්ගෙන් මානුෂීය බැඳීම් ගිලිහෙනවා
අධ්‍යාපනය අත්‍යවශ්‍යයි
දරුවාගේ පාසල් අධ්‍යාපනයට අවශ්‍ය පොතපතකින් ඉක්මනින් සොයා ගත නොහැකි ඕනෑම තොරතුරක් පරිගණකය ඔස්සේ ඉතා ඉක්මනින් ලබාගත හැකිය එහිදී දරුවන්ට පාසලේ උගන්වන පාඩම් නැවත නිවෙසේදී හැදෑරීමට පරිගණකය යොදාගත හැකිය. මේ නිසා පරිගණකය යනු දරුවන්ගේ අධ්‍යාපනයට උදවු කරන කෞතුකාගාරයක් පුස්තකාලයක් හා විද්‍යාගාරයක් වැනි තවත් ඉගෙනුම් ආධාරකයකි. නමුත් මෙම ඉගෙනුම් ආධාරකය නිසි ලෙස භාවිත කරන්නේ දරුවන්ගෙන් කීයෙන් කීදෙනෙක්ද යන්න ගැටලුවකි.
හැමදේම කරන්න බැහැ
පරිගණකය මෙහෙයවන්නේ යතුරු පුවරුවක් හා ‘මවුසය’ තුළින්ය.. මෙය හසුරුවන දරුවාට ලැබෙන්නේ ඉතා කුඩා හසුරු කුසලතාවකි. පරිගණකය ඔස්සේ ගණන් හැදීමට හෝ තොරතුරු ලබා ගැනීමට පෙර දරුවා බුද්ධිය මෙහෙයවා ගණන් විසඳීම පුහුණු කළ යුතුය. කියැවීම තුළින් ලබාගන්නා දැනුම, බුද්ධිකලම්බනය, ධාරණ ශක්තිය පරිගණකයෙන් තොරතුරු ලබා ගැනීමෙන් දරුවාට ලබාගත නොහැකිය.
දරුවකුගේ දියුණු කළ යුතු මූලික කුසලතා 04ක් ඇත. සවන්දීම, කියැවීම, ලිවීම හා භාෂණය මෙම චතුර්විධ භාෂා කුසලතායි. මෙම කුසලතා සමබර ලෙස වර්ධනය කළ හැක්කේ සජීවී අත්දැකීම් හා ක්‍රියාකාරකම් තුළින් බව අවබෝධ කරගත යුතුයි. එමෙන්ම සම වයස් කණ්ඩායම් ඇසුරින් ලබන අත්දැකීම්, ක්‍රීඩා කිරීමෙන් ලැබෙන පෞරුෂ සංවර්ධනය පරිගණකයක් මඟින් දරුවාට නොලැබේ. එම නිසා පෙරපාසල් අවධියේ සිටම දරුවන් සඳහා විවිධ පාඨමාලා ඇසුරින් පරිගණක අධ්‍යාපනය ලබා දීම සුදුසුද යන්න ඔබ දෙවරක් සිතන්න. කුඩා දරුවන්ගේ සිත් පරිගණකය වෙත බැඳ තබන්නේ පරිගණක ක්‍රීඩාවන්ය. මේ සඳහා වැඩිහිටියන්ද යොමු වී සිටිනු අප දැක ඇත. මෙම පරිගණක ක්‍රීඩාවලට දීර්ඝකාලීනව යොමුවීම නිසා ඇබ්බැහි වීම සිදුවෙයි. මෙය ඉගෙනුම් ක්‍රියාවලියක් අවසානයේ විරාමයක් සඳහා යොදා ගැනීම වරදක් නොවේ. නමුත් මේ තුළින් බුද්ධි වර්ධනයක් දරුවා තුළ ඇතිවන බව සිතිය නොහැකිය. දරුවන් පරිගණක ක්‍රීඩාවල ඇති විවිධ මන--කල්පිත චරිත, උපකරණ ඔස්සේ දැඩි තරගකාරිත්වයෙන් යුතු හැඟීම් ඇතිවිය හැකිය. අනෙකා පැරදවීම, කේ‍රා්ධය, වෛරය, නොඉවසීම වැනි හැඟීම් මෙම ඇබ්බැහි වීම තුළින් ඇතිවිය හැකි මනෝභාවයන්ය. එබැවින් පරිගණකයක් දරුවාට ලබාදිය යුතු වයස, වේලාව, හා අවශ්‍යතාව පිළිබඳ මවුපියන් තීරණය කළ යුතුයි. පරිගණකය ඔස්සේ ‘ඉන්ටර්නෙට්’ ‘ඊමේල්’ ‘ෆේස්බුක්’ සබඳතා ලබා ගැනීම මඟින් දරුවන්ට ලෝකයේ ඕනෑම තොරතුරක් ලබාගැනීමට හෝ මිතුරු මිතුරියන් ඇසුරු කිරීමට අවස්ථාව සැලසේ. මෙහිදී දරුවාට නොගැළපෙන විවිධ තොරතුරු මිතුරු ඇසුර ලැබිය හැකිය. ළමා දිවියට නොගැළපෙන නිදහසක් බුක්ති විඳීම නිසා විවිධ අතවර සිදුකරගත් අවස්ථා අපට වාර්තා වී ඇත. මෙය සිදුවන්නේ පරිගණකයේ වරදින්ද? නැතහොත් පරිගණකය භාවිත කරන අපේ දරුවන්ගේ වරදින්ද? එබැවින් පරිගණකය භාවිත කරන ආකාරය කුමක්ද යන්න නිවැරැදි අවබෝධයක් මවුපියන්ට තිබිය යුතුයි. පරිගණකය යනු නූතන ලෝකයට එක්වී ඇති තවත් එක් මෙවලමක් පමණි. එම නිසා එය නිවෙසට නැතිවම බැරි හෝ එය නොමැති වූ විට දරුවාට පාඩුවක් වන්නේ යැයි ඔබ සිතන්න.
පරිගණකයට වැය වන මුදලට වඩා අඩු මුදලකින් ඔබට ඔබේ දරුවාට පොතක් රැගෙන දිය හැකිය. නැත්නම් දුරේක්ෂයක්, අණ්වීක්ෂයක්, වැනි උපකරණ කිහිපයක් මිලදී ගත හැකිය. මෙමඟින් අධ්‍යාපන ක්‍රියාවලියට ඍජු සබඳතාවක් ඇතිකර ගැනීමට උපකාරී වන අතර පරිගණකයකට සිරවී ටයිප් කරන දරුවකුට වඩා දැනුමක් මෙම උපකරණය තුළින් දරුවාට ලබා ගත හැකිය.
එහා ගෙදර දරුවාට වඩා තමන්ගේ දරුවා ඉහළින් තැබීමේ අරමුණින් සියලු පහසුකම් සහිත පරිගණක, දුරකතන, දරුවාට මිලදීගෙන දීම සැබැවින්ම ඔබ දරුවාට කරන අනර්ථයකි. මවුපියන් නොදැනුම්වත්වම සිදුවන අනවශ්‍ය සබඳතා නිසා දරුවන්ගේ ආරක්ෂාවටද විශාල තර්ජනයක් වී ඇති බව කිව යුතුයි.
පරිගණකයට සුදුසු වයස
දරුවන්ට පරිගණකයක් අවශ්‍ය වන්නේ උසස් අධ්‍යාපනය හදාරන විටදීය. විශේෂයෙන් අ.පො.ස. සාමාන්‍ය පෙළ, උසස් පෙළ විභාගවලට පෙනී සිටීමෙන් පසු ලැබෙන නිදහස් කාල පරිච්ඡේදය මෙයට සුදුසු කාලයයි. මෙහිදී දරුවා සුදුසු පාඨමාලාවකට යොමු කළ හැකිය.
නිවෙසේ කාමරයක් තුළ සිරවී වෙලාවක් විවේකයක් නොමැතිව පරිගණකය ඇසුරේ සිටින දරුවා නිරායාසයෙන් මවුපියන් සහෝදර ඇසුරින් අෑත් විය හැකිය. දරුවා පරිගණකය භාවිත කරන අයුරු නිතර ඇය ගැටෙන ස්ථානයක සාලය, කෑම කාමරය වැනි ස්ථානයක පරිගණකය තබන්න. නිතර ඉගෙනුම් කාර්යය. උපකාර වන මෙවලමක් ලෙස මෙය භාවිත කිරීමට දරුවාට උපදෙස් ලබා දෙන්න.
ඕනෑම උපකරණයක් දරුවාට ලබා දීමේදී ඒ උපකරණයට දරුවා මෙහෙයවීමට ඉඩ නොතබා දරුවාට උපකරණය මෙහෙයවීමට ඉඩකඩ ලබා දෙන්න. එම නිසා මෙය විධිමත් සැලසුමකින් යුතුව බුද්ධිමත්ව ක්‍රියාකරන විට මෙය මවුපියන්ට එතරම් අපහසු කාර්යයක් නොවනු ඇත. මවුපියන් තුළ පවතින දැඩි කැපවීම් හා දැඩි අවධානය සහ සැලකිල්ල ඉතා වැදගත් බව මෙහිදී සඳහන් කළ හැකිය.
කථිකාචාර්ය
නයනා ගුණවර්ධන
ජාතික අධ්‍යාපන ආයතනය
උපුටා ගැනීම මව්බිම පුවත්පත
