ආදරය ඉදිරියේ දැපනේ වැටෙන වෘෂභයෝ
මෙලොව උපදින ඕනෑම කෙනකුට පළමුවෙන් හිමිවන්නේ ලග්නයයි. ඔහුට හෝ ඇයට නමක් පවා හිමි වන්නේ ලග්නය ලැබීමෙන් පසුවයි. කෙනකු උපදින මොහොතේ නැඟෙනහිර ක්ෂිතිජයෙන් උදාවෙමින් පැවැති ලග්නය ඔහුගේ හෝ ඇයගේ ලග්නය වන බව ජේ‍යාතිෂයේ සඳහන්ය. ජන්මියකුගේ හැඩරුව, ගතිගුණ, චරිතය, දක්ෂතා, ලෙඩදුක් ආදී ජීවිතයේ සියලු දේවල් සිදුවන්නේ ලග්නය අනුවය. ඔබ උපන් ලග්නය අනුව ඔබේ ජීවිත තොරතුරු ඉදිරිපත් කරන ලිපි පෙළේ දෙවැන්න වන මෙයින් වෘෂභ ලග්න හිමියන් ගැන විග්‍රහ කෙරේ.
ගතිගුණ :
වෘෂභ ලග්නයට සිකුරු හෙවත් ශුක්‍ර (කිවි) ග්‍රහයා අධිපති වන නිසා මෙම ලග්න හිමියන් සැපවත් දිවියක් ගෙවන්නට කැමැතිය. මොවුන්ගේ සිත තරමක් දරදඬු ස්වභාවයක් ගනී. විවිධ විලාසිතාවන්ගෙන් යුත් ඇඳුම්, පැලඳුම්, ආභරණ වැනි දේවලට වැඩි කැමැත්තක් දක්වන වෘෂභ ලග්න හිමියන් මල් වගා කිරීම් වැනි අංගයන් කෙරෙහිද යොමුවන බවක් පෙනෙන්නට තිබේ.
අන් අය වෙනුවෙන් විය හියදම් කිරීමට තරමක් අකැමැති නිසා මුදල් පරිහරණයේදී වඩා සුපරීක්ෂාකාරී වෙයි. ගම්බද දිවිපෙවෙතකට වඩා ඇලුම් කරයි. කතාවෙහි දක්ෂ වෘෂභ ලග්න හිමියෝ තම කතාවෙන් අන්‍යයන්ව වශීකර ගැනීමට සමත් වේ. ලෞකික ආශාවන්ට දැඩි රුචිකත්වයක් දක්වයි. පුතුන්ට වඩා ගැහැනු දරුවන්ට ආදරයක් දැක්වීම වෘෂභ ලග්න හිමියන්ගේ ස්වභාවයයි. මුදල් ලැබෙනවා නම් සාධාරණ හෝ අසාධාරණ ඕනෑම දෙයක් කිරීමට වෘෂභ ලග්න හිමියෝ සූදානම්ය. තම භාර්යාවට තදින් ආදරය කිරීම වෘෂභ ලග්න හිමි
පුරුෂයාගේ සිරිතය.
ආදරය සහ ලිංගිකත්වය :
වෘෂභ ලග්න හිමියන් ඉඳුරන් පිනවීමට දැඩි රුචිකත්වයක් දරන අතර ආදරය සම්බන්ධයෙන් ඔවුන් හොඳ ආදරවන්තයෝ වෙති. වෘෂභ ලග්න හිමියෝ කාමාධිකය. මේ නිසාම නොයෙක් කරදර ඇති කර ගනී. තම අභිමතය මත මෙම ජන්මීන් බොහෝ විට විවාහය සිදුකර ගනී. සුදුසු වයසේ ප්‍රමාදයක් නැතිව විවාහ වීමට මොවුන්ට අවස්ථාව ලැබේ. යුගදිවියේ කායික සැපත උපරිමව පතන මෙම ලග්න හිමියන් නිතරම බලාපොරොත්තු වන්නේ දුකින් තොර සැපෙන් බර දිවියක් ගත කිරීමය.
විවාහය :
මෙම ලග්නයෙන් උපන් අයට අගෝස්තු 22 සිට සැප්තැම්බර් 22 අතර හෝ දෙසැම්බර් 21 සිට ජනවාරි 16 දක්වා දින අතර උපන් අය විවාහය සඳහා වඩා යෝග්‍ය වේ.
රැකියාව :
වෘෂභ ලග්න හිමියන්ට රෙදිපිළි, රසකැවිලි, ස්වර්ණාභරණ, ස්ත්‍රී ඇඳුම්, පාවහන්, අත්බෑග් ආදිය නිෂ්පාදනය, විකිණීම ආදී කටයුතු හොඳින් පලදරයි. ගොවිතැන්ද මොවුන්ට සුදුසුය. කලාත්මක අංශයේ වෘත්තීන් මෙන්ම රූපලාවණ්‍යාගාර පැවැත්වීම සහ බැංකු කටයුතු, ව්‍යාපාර පරිපාලනය, මුදල් අයකැමි වැනි රැකියාවන්ද වෘෂභ ලග්න හිමියන්ට ලැබිය හැකි රැකියා අතර වේ.
ධනය හා වස්තුව :
මෙම ජන්මීන්ට ඉතා පහසුවෙන් ධනවතකු විය හැකිය. ගණිකා නිවාස, සම්බාහන ආයතන, සුරා සූදු වැනි අයථා ක්‍රියා මඟින් වුවද ධනය උපයා ධනවත් වීමට මැළි නොවේ. එසේම දේශපාලනයද මොවුන්ට හිමිය. දේශපාලනයට බැසීමෙන් පසු විශාල ධනස්කන්ධයකට හිමිකම් කීමේ භාග්‍ය උදාවේ. ලැබෙන මිල මුදල් රැක ගැනීමේ හැකියාවක් ඇත.
සෑදෙන රෝග :
මෙම ලග්නයෙන් උපන් අයට උගුරේ, බෙල්ලේ ආබාධ, තුවාල, මලබද්ධය, ස්නායු රෝග, ලේ නහරගත රෝග පහසුවෙන් සෑදේ. නමුත් මෙම ජන්මීන්ට ලෙඩ රෝග සෑදීම අඩුවන අතර රෝගයක් සෑදුන විට එය සුවවීමට කල්ගත වනු ඇත.
මරණය : ආයුධ, සතුන්ගෙන් පීඩා, දියේ ගිලීම්, බන්ධනාගාරගත වීම යන හේතුවකින් මරණයට පත්විය හැකිය.
ජය අංකය හා සුබ දවස් :
5, 6, 8 යන අංක මෙම ජන්මීන්ගේ ජය අංක වන අතර බදාදා, සිකුරාදා සුබ දිනයන් වේ.
දුර්වලතා :
බොහෝ විට මෙම ජන්මීන් අන් අය සමඟ අදහස් ප්‍රකාශ කිරීමේදී තම රහස් හෙළිවීම දුර්වලකමකි. ප්‍රමාණය ඉක්මවා ආහාර ගැනීම, මුරණ්ඩුකම, මත්පැන්වලට ඇති ලෝලීත්වය, කාමයට ඇති දැඩි ගිජුකම, සුඛෝපභෝගී ජීවිතයකට ඇලුම් කිරීම ආදිය ජීවිතයේ සාර්ථකත්වයට හානියකි. තීරණ ගැනීමේදී ප්‍රවේශම් විය යුතුය.
වෘෂභ ලග්න හිමියන්ගේ කේන්දරේ :
වෘෂභ ලග්න හිමියන් පිළිබඳ අප මෙතෙක් ඉදිරිපත් කළ තොරතුරු කොතෙක් දුරට නිවැරැදිද යන බව වෘෂභ ලග්න හිමියකුගේ කේන්ද්‍රයක් පරීක්ෂා කර බැලීමෙන් වටහා ගත හැකිය. මේ සමඟ පළවන්නේ 1896.08.24 වැනි සඳුදා උපන් ජන්මියකුගේ කේන්දර සටහනකි. බ්‍රිතාන්‍ය අධිරාජ්‍ය සමයේ විදානේ තනතුරක් ලබා දොම්පේ ප්‍රදේශයේ රාජකාරි කළ මෙම තැනැත්තා වලව් පෙළැන්තියකට අයත් පුද්ගලයෙකි. දොම්පේ ප්‍රදේශයේ දැනට ජීවත්වන වයස අවුරුදු 90කට පමණ ආසන්න වයසක මහලු ගැමියකුගෙන් විදානේ මහතාගේ ගතිගුණ චරිතය ගැන කරුණු රැසක් දැන ගැනීමට ලැබුණි.
මොහු විදානේ යන තනතුරු නාමයට සුදුසු ලෙස ගැමියන්ට විධාන දීමේ ශූරයෙක්ව සිට ඇත. දරදඬු ගති තිබුණු මෙම විදානේ යම් තීරණයක් නියෝගයක් දුන්නොත් එය කොතරම් දරුණු තීරණයක් නියෝගයක් වුවත් නැවත වෙනස් නොකරයි. එදා පැවැති බ්‍රිතාන්‍ය රජයෙන් මුහන්දිරම් පට්ටමක් ලබා ඇති විදානේ තම ඇඳුම් පැලඳුම් ගැන දැඩි අවධානයක් දක්වා ඇත.
තමන් රාජකාරිය දෙවියන්ගේ කාර්ය ලෙස ඉටු කරන බව පෙන්නුවත් මොහු ක්‍රියාවෙන් එසේ කර නැත. ගමේ මළ ගෙයක බූරුවා ගැසුවොත් එය අල්ලා නඩු පැවරීම විදානේගේ සිරිතය. එහෙත් මොහු ප්‍රසිද්ධියේ බූරු පිටියක් පැවැත්වූ අයෙකි. ගැමියා කිතුල් ගසක් මැද රා ටිකක් බීම මහා අපරාධයක් ලෙස හුවා දැක්වීම විදානේගේ සිරිත වුවද ඔහු හොර සුරා තිප්පොළක් පැවැත්වූ අයකු බව ගම්වැසියන්ට රහසක් නොවේ. මුදල් හරි හම්බ කිරීමේදී විදානේ නිතරම බරවී ඇත්තේ අසාධාරණ පැත්තටය. අල්ලස් ලැබෙතොත් අවනම්බුවක් වුවද නඩුවක් ලෙස ඉදිරිපත් කරන්නකු නිදහස් කිරීම විදානේගේ රාජකාරියේ ලොකුම හපන්කම විය.
විදානේ නිතරම සැපවත් ජීවිතයකට ඇලුම් කළ කෙනෙකි. බක්කි කරත්ත තුනක් මොහු සතුව තිබී ඇත. තිරික්කලය පාවිච්චි කළේ විනෝදයට රේස් යෑමටය. මොහුගේ වලව්වේ මෙහෙකරුවන්, මෙහෙකාරියන් දොළොස් දෙනකු සේවය කර ඇත. මොහුට රූමත් භාර්යාවක් සිටියත් ගමේ තරුණ ස්ත්‍රීන් දෙතුන් දෙනකු සමඟම සමීප අනියම් සබඳතා පැවැත්වූ බව පැවැසේ.
මොහු බ්‍රිතාන්‍ය අධිරාජ්‍යයට ඉතා ගැති ලෙස හා පක්ෂපාතී වී තිබේ. කතාවේ ශූර මොහු එංගලන්තයේ සිටින ඉංගී්‍රසි රජතුමාව වර්ණනා කර ඇත්තේ තමා සමඟ එකට ඉගෙන ගත් මිතුරකු ගැන කරන වර්ණනාවක් ලෙසය. වෘෂභ ලග්න හිමියා සතු කතාවෙන් අනුන් වසඟ කර ගැනීමේ හැකියාවද විදානේ සතුව නොමඳව පැවැති බව විදානේගේ තොරතුරු පැවැසූ මහලු ගැමියාගෙන් දැනගැනීමට ලැබිණි.
වෘෂභ ලග්න හිමියන් පිළිබඳව ඉදිරිපත් කරන ලද විග්‍රහයේදී වෘෂභ ලග්නයෙන් විදානේගේ චරිතයේ පැවැති දුර්වලකම් සෑම වෘෂභ ලග්න හිමියකු කෙරෙහිම බලපාන බවට පාඨකයාගේ මතයක් ඇතිකර ගත යුතු නොවේ.
අප මෙහිදී විදානේගේ චරිතයෙන් උත්සාහ කළේ වෘෂභ ලග්නයට හිමි පොදු ලක්ෂණ ඔහුගේ චරිතය කෙරෙහි බලපෑ අන්දම පෙන්වා දීමටය. වෘෂභ ලග්න හිමියකුගේ කේන්දරයේ පිහිටන ග්‍රහ පිහිටීම් මඟින් වෘෂභ ලග්නයට හිමි මෙම පොදු ලක්ෂණ වෙනස් වීමටද වෘෂභ ලග්නයට හිමි දුර්වලකම් මඟ හැරීමටද හේතු විය හැකි බව පාඨකයන් සැලකිය යුතුය.
ජේ‍යාතිර්වේදී
එම්. උපුල් ජය ශ්‍රී ද සිල්වා
කොස්ගොඩ
0777 108 343
උපුටා ගැනීම මව්බිම පුවත්පත
