අන්තර්ජාලයෙන් ලිංගික උත්තේජනයක් ලැබීමට උත්සාහ කරන අයගේ සැබෑ ලෝකයේ ලිංගික ජීවිතය අතෘප්තිමත්
මේ ලිපිය කියවන්නට මොහොතකට පෙරත් ඔබ අන්තර්ජාලයේ සැරිසැරුවා විය හැකියි. එසේත් නැත්නම් දුරකථන ඇමතුමක් ලබා ගත්තා හෝ එමඟින් ද අන්තර්ජාලයේ සැරිසැරුවා විය හැකියි. මේ හේතු නිසාම අන්තර්ජාලය ඒ වගේම දුරකථනය ඔබට නැතිවම බැරි මිතුරන් බවට පත් වී ඇතිවාට සැකයක් නැත. නමුත් කෙතරම් සමීප මිතුරෙකුගේ වුවද සතුරු ගති ලකුණු ද ඇති බව කියන්නට මෙන් ඔබගේ නව යොවුන් වියේ පසුවන දරුවන්ට මේවා මඟින් බලපෑම් ඇති කරන බව තවමත් ඔබ නොදන්නවා විය හැකියි. ඇතැම් විට ඔබත් එවැනි නරක ඇබ්බැහි වීම්වල ගොදුරක් බවට පත්වී ඇති. ඒ නිසා මෙවර මානසික රෝග පිළිබඳ කතාබහ, අන්තර්ජාලය හරහා ඇතිවන ඇබ්බැහි වීම් නිසා මුහුණ දෙන අයහපත් ප්‍රතිඵල පිළිබඳවයි. ඒ සම්බන්ධයෙන් අදහස් දැක්වූයේ මානසික රෝග පිළිබඳ විශේෂඥ වෛද්‍ය පුෂ්පා රණසිංහයි.
ඇබ්බැහිවීම් යනු යම්කිසි ක්‍රියාවක් නැවත නැවත කිරීම නිසා තමාගේ සමාජයීය කටයුතුවලට බාධා වේ නම් එය ඇබ්බැහි වීමක් ලෙසින් හැඳින්වේ. ඒ වගේම අදාළ තැනැත්තාට එය නවතා ගැනීමේ හැකියාවක්ද ඇත්තේ නැහැ. මෙය නව යොවුන් වියෙන් ආරම්භ වී ඉතා උග්‍ර ලෙසට ජීවිතයට බලපෑම් එල්ලකරවිය හැකියි. ඊට හේතුව නවයොවුන් වියේදී මොළයේ ව්‍යුහයේ ක්‍රියාකාරීත්වය වැඩිහිටියෙකුගේ මෙන් වර්ධනය වී නොමැති වීමයි.
නවයොවුන් වියේ මොළයේ ක්‍රියාකාරීත්වය : නවයොවුන් වියේ මොළයේ ක්‍රියාකාරීත්වය වැඩිහිටියෙකුගේ තරම් වර්ධනයක් ලබා නොමැත. ඒ නිසා මෙලෙස වර්ධනය වෙමින් පවතින මොළයකට අයහපත් උත්තේජන නිසා ස්නායු සම්බන්ධතා ඇති වූවොත් එය ස්ථාවර බවට පත් වේ. මෙම වයස්වල පසුවන දරුවන්ගේ මොළයේ උසස් හැකියාවන් තිඛෙන පූර්ව මස්තිෂ්කය වැඩී නොමැත. මේ නිසා තීරණවලට එළඹීමේදී හරි වැරදි කුමක්ද යන්න සිතනවාට වඩා තමාගේ අවශ්‍යතාව පිළිබඳව පමණක්ම සිතා බලයි.
වයසත් සමඟ මොළය පරිණත වීම : වයසත් සමඟ පරිණත වනවිට ඉගෙන ගන්නා දේ මෙන්ම එදිනෙදා ජීවිතයේදී අපි ලබන අත්දැකීම් පූර්ව මස්තිෂ්කය මඟින් හොඳ සහ නරක ලෙස තැම්පත් කර ගනියි. මෙහිදී පරිණත නොවූ මොළයක් මඟින් අවශ්‍යතා සඳහා ප්‍රමුඛත්වයක් ලබාදෙන අතර පරිණත වූ මොළයක් මඟින් හැඟීම් මෙන්ම ආවේගද පාලනයකට ලක් කරයි. ඒ වගේම පරිණත නොවූ මොළයට වඩා පරිණත මොළයක් මඟින් තීරණ ගැනීමේදී එහි වාසි අවාසි යහපත් අයහපත් ප්‍රතිඵල ආදී දේ පිළිබඳ දුර දිග බලා තීරණවලට එළඹේ. නමුත් නව යොවුන් වියේ මොළය නිසිලෙස වැඩී නොමැති නිසා සැමවිට තමාගේම අවශ්‍යතාවම ඉටු කර ගැනීමට පෙළඹේ. ඔවුන් තමාගේ අවශ්‍යතාව පිළිබඳ පමණක් සිතා එය කෙසේ හෝ ඉටු කර ගන්නා අතර එහි හොඳ නරක අවස්ථාව සුදුසු නැද්ද යන්න පිළිබඳ තැකීමක් නොකරයි. උදාහරණයක් ලෙස පුංචි දරුවෙක් පිළිබඳ සලකා බැලුවොත් ඔහු කුසගිනි නම් තමාගේ අවශ්‍යතාව කෙසේ හෝ ඉටුකර ගැනීමට අඬනවා මිසක් අනෙකුත් කරුණු කාරණා පිළිබඳ අවධානයක් යොමු නොකරයි. නමුත් වැඩිහිටියෙකුට ඒ අවශ්‍යතාව ඇති වූවොත් එම අවශ්‍යතාව ඉටුකර ගැනීමට වෙනත් විකල්ප ක්‍රමයක් හෝ විකල්ප අවස්ථාවන් සොයාගත හැකියි.
පරිණත නොවූ මොළයක ඇබ්බැහිවීම් ඇතිවීම භයානකයි : ප්‍රාථමික අවධියේ නිතර නිතර ඇබ්බැහි වීම් නිසා මොළයේ උත්තේජනයන් ඇති වේ. මේවා කාලයක් ගතවන විට මොළයේ තැන්පත් වේ. සත්‍ය ලෝකයේ වෙනත් විකල්ප අත්දැකීම් ලැබීම් මේ නිසා ඔවුන්ට අහිමි වී යයි. කෙසේ වෙතත් මේ තත්ත්වය ස්ථාපිත වී ඇබ්බැහි වීම් නිධන්ගත තත්ත්වයට පත් වේ. ඒ නිසා පරිණත හැසිරීම් රටාවකට පැමි”මට එවැනි අයට තරමක් අපහසු වේ. තවද මෙවැනි කුමන ආකාර ඇබ්බැහි වීමක් වුවද එය බලපෑම් ඇති කරන්නේ අදාළ පුද්ගලයාගේ මොළයටයි. අන්තර්ජාල හා දුරකථනය මෙම වැරදි ඇබ්බැහි වීම් සඳහා අද වනවිට තෝතැන්නක් බවට පත් වී අවසන්.
Cyber Sex Addiction : මේ යටතේ කතාබහට ලක්වන්නේ අන්තර්ජාලය හරහා ලිංගික උත්තේජන නිතර ලබා ගැනීමට උත්සාහ දරණ පුද්ගලයන් පිළිබඳවය. නමුත් ඔවුන් ලබන එම උත්තේජන සැබෑ ලෝකයේ නොමැති විකෘති අත්දැකීම් බව ඔවුන්ට අවබෝධයක් ඇත්තේ නැහැ. මේ නිසා පසුකාලීනව සැබෑ ලෝකයේ ආදර සම්බන්ධතාවක් හෝ ලිංගික සම්බන්ධතාවක් නිවැරදිව පවත්වා ගැනීමට ඔවුන් තුළ ඇති හැකියාව දුබල වී යයි. ඒ වගේම මෙම උත්තේජනය ස්වභාවිකව ලබන උත්තේජනයක් නොවන නිසා සාමාන්‍ය ජීවිතයේදී සාමාන්‍ය මෙවැනි හැසිරීමකින් ලබන උත්තේජන ද ඔවුන්ට නොලැබී යයි.
Cyber Relationship Addiction : මෙහිදී බහුල වශයෙන් කතාබහට ලක් වන්නේ Online Relationship නැත්නම් අන්තර්ජාලය හරහා ගොඩනැඟෙන සබඳතා වේ. ඔවුන් ජඩචබ කිරීම, ඊ මේල් ගණුදෙනු හරහා සම්බන්ධතා ගොඩනඟා ගන්නා අතර තමාට එය නැවැත්වීමට අවශ්‍ය නම් ක්ෂණික නැවැත්වීමේ හැකියාවන් ද පවතිනවා. නමුත් මින් ඇතිවන ගැටලුව වන්නේ සැබෑ ලෝකයේදී ඔවුන්ට පුද්ගල සම්බන්ධතා ගොඩනඟා ගැනීමට නොහැකි වීමයි. ඔවුන්ගේ මනෝ ලෝකයේ තමාට අවශ්‍ය ආකාරයට ගණුදෙනු ආරක්ෂාකාරිව හසුරුවා ගැනීමේ හැකියාවක් තිබුණ ද සැබෑ ලෝකයේ ඔවුන් අසාර්ථක නිසා එය පෞරුෂය වර්ධනයට දැඩි බලපෑමක් ඇති කරයි.
Net Compulsions : මින් අදහස් වන්නේ Online Game පිළිබඳවයි. එනම් අන්තර්ජාලය හරහා ක්‍රීඩා කිරීමයි. මෙයත් එක්තරා ආකාරයක ඇබ්බැහි වීමක්. මොවුන්ට ජය පරාජය දරා ගැනීමේ හැකියාවක් නොමැති වී යන අතර එය පෞරුෂය වර්ධනයට දැඩි බලපෑමක් ඇති කරවයි.
නුවන්ති කුලරත්න
උපුටා ගැනීම දිනමිණ
