රාහු කාලය ඇත්තක්ද? බොරුවක්ද?
රාහු කාලය තරම් මිනිසා සසල කරවන මොහොතක් තවත් නැති තරම්. එහෙත් එසේ වන්නේ මොන හේතුවක් උඩදැයි කියා නොම දනී. දන්නේ රාහු කාලය හොඳ නැති බවට පමණි. මොන දේකට සූදානම් වුවත් ප්‍රථමයෙන්ම බලන්නේ රාහු කාලය කීයටද කියාය. එයින් ගම්‍ය වන්නේ මිනිස් සන්තානය තුළ රාහු කාලය අරක්ගෙන ඇති බවයි. මෙහි කිසිදු විද්‍යාත්මක සත්‍යයක් දකින්නට නොමැත. මේ සම්බන්ධ කිසිම ජේ‍යාතිෂ පොතක හෝ ග්‍රන්ථයක පෙන්වා දී නැත. පරාශර ඍෂි මතයට අනුව දවසේ දිවා කාලය කොටස් 8කට බෙදා එය රවි, චන්ද්‍ර, කුජ, බුධ, ගුරු, ශුක්‍ර, ශනි යන ක්‍රමයට දිනාධිපතියන්ගෙන් ආරම්භ වී ගෙවී යන බවත් 8 වැනි කොටසට අධිපතියකු නොමැති බැවින් රාහු කාලයට වෙන් කළ බව කිව හැකියි. ශ්‍රී ලංකාවේ පමණක් නොව ඉන්දියාවේද මේ පිළිබඳව විවිධ මත පවතී.
සුප්‍රසිද්ධ ජේ‍යාතිෂවරයකු වන මහාචාර්ය බී. වී. රාමන්ගේ ග්‍රන්ථ 2ක පමණක් උදේ 9.00 සිට 10.30 දක්වා සෙනසුරා රාහු කාලය ඇති බව දක්වා ඇතත් අපේ රටේ පවත්නා මත අනුව එය රාත්‍රි කාලයටත් ඇති බව පිළිගනී. එහෙත් මහාචාර්ය රාමන්ගේ ග්‍රන්ථයන්හි දෙවරක් ඇති බව පිළිනොගනී. මෙවැනි එකිනෙකට පටහැනි මත පවතින නිසා කුමක් නිවැරැදි දැයි සිතා ගත නොහැකියි. රාහු කාලය පිළිබඳ ඍෂිවරයකු විසින් පළ කරන ලද මතයක් හෝ සඳහන් කරන ලද කිසිදු තැනක් හෝ අපට මෙතෙක් හමුවී නැත. කවුරුන් හෝ පළ කරන ලද මතයක් භාවිත කිරීම නිසාත් එය එලෙස පවත්වාගෙන යෑම නිසාත්, සිදු වූවක් විය හැකි බව විශ්වාස කළ හැකියි. ජේ‍යාතිෂයේදී බොහෝ විට අප වැදගත් කොට සලකන්නේ ඍෂි භාෂිතය අනුව ශාස්ත්‍රිය මතයක් දැරීම වුවද රාහු කාලයේදී එසේ නොසලකන්නේ ඇයිද? යන්න ප්‍රහේලිකාවකි. ජේ‍යාතිෂ පිළිබඳ ලියැවුණු හා පංචාංග ලිත්වල මෙකල සඳහන් වන රාහු කාලය පිළිබඳ කාල වේලාවන් මෙසේය.
• ඉරිදා 4.30 - 6.00 දක්වා සවස හා රාත්‍රියට
• සඳුදා 7.30 - 9.00 දක්වා උදේ හා රාත්‍රියට
• අඟහරුවාදා 3.00 - 4.30 දක්වා සවස සහ රාත්‍රියට
• බදාදා 12.00 - 1.30 දක්වා දවල්ට හා රාත්‍රියට
• බ්‍රහස්පතින්දා 1.30 - 3.00 දක්වා දවල්ට හා රාත්‍රියට
• සිකුරාදා 10.30 - 12.00 දක්වා දවල්ට හා රාත්‍රියට
• සෙනසුරාදා 9.00 - 10.30 දක්වා උදේ හා රාත්‍රියට
ආදී වශයෙන් මෙසේ සඳහන් වෙයි. නමුදු රාහු කාලය මිථ්‍යාවක් ලෙස බැහැර කළ හැකි ජේ‍යාතිෂයට අදාළ කරුණු කාරණා සොයා ගත හැකියි. එනම් ඉහත දක්වන කාල පරාසයන් තුළ සුබ පංචම කාල හෝරාවන් යෙදී ඇති බව සොයා ගත හැකියි. නමුත් රාහු කාලය තුළ කිසිදු සුබ කටයුත්තක් නොකළ යුතුයි. නොයෙදිය යුතුයි යන්න බැහැර කළ හැකි බව මෙයින් පෙන්වා දිය හැකියි. සාමාන්‍යයෙන් ජේ‍යාතිෂයේ සඳහන් පරිදි රවිගෙන් රවි පංචමය, රවිගෙන් සඳු පංචමය, සඳුගෙන් බුධ පංචමය, සඳුගෙන් ගුරු පංචමය, සඳුගෙන් සිකුරු පංචමය, කුජ ගෙන් බුධ පංචමය, කුජගෙන් සිකුරු පංචමය, බුධගෙන් බුධ පංචමය, බුධගෙන් ගුරු පංචමය, ගුරුගෙන් ගුරු පංචමය, ගුරුගෙන් සිකුරු පංචමය, ගුරුගෙන් රවි පංචමය, සිකුරු ගෙන් සිකුරු පංචමය, සිකුරුගෙන් සඳු පංචමය, ශනිගෙන් බුධ පංචමය, ආදී සුබ කටයුතු සඳහා යොදා ගන්නා සුබ පංචමයන් ඉහත සඳහන් රාහු කාලය තුළ දින හතේම සොයා ගත හැකියි. මෙහිදී රාහු කාලයට යටත් වන කාල වකවානුවලදී මෙකී සුබ පංචම කාල හෝරාවන් යොදා ඇත්තේ කුමන හේතුවක් මතදැයි ගැටලුවක් පැන නඟී. මේ අනුව රාහු කාලය මෑතකදී ඇතිවූ මතයක් පදනම් කරගෙන ඇති වූවක් බව සැලකිය හැකියි. මෑත කාලයේ අප රටේ බිහි වූ අග්‍රගණ්‍ය ජේ‍යාතිෂවේදියකු වූ දොන් පිලිප් ද සිල්වා අෑපා අප්පුහාමි මහතා විසින් සකස් කරන ලද 'මුහුර්ත චින්තාමනී' නමැති ග්‍රන්ථයේද රාහු කාලය කවර හෝ සුබ කාර්යයකට නොගත යුතු යැයි පවත්නා මත සනාථ නොකරයි. නැකැත් සෑදීමේ පිළිබදව ලියැවී ඇති පරිච්ඡේදයෙන් ඒ බැව් සනාථ වෙයි. යම් මුහුර්තයකට ගන්නා ලග්නයෙහිද, හතරේද, පහේද, නවයේද, ගුරු, සිකුරු පාප නොවී බුධ සඳු සිටියදී රික්තා දෝෂ භංග වෙයි. යම් කාලයක චන්ද්‍රයා යහපත් බලයෙන් යුක්තව සිටි කල්හි නපුරු මරයෝග, දින දග්ධයෝග භංග වන්නේය. සිද්ධි යෝගයෙන් විස යෝග දග්ධ විෂම යෝග, භූමි දෝෂ භංග වන්නේය. මෙසේ යමකු විසින් දශමහා දෝෂයන් කියා එය සුබ කර්මයෙහි නොයෙදිය යුත්තේය යැයි කියන පරිදි එම පණ්ඩිතයන් විසින් ඒ දෝෂ භංගවන ක්‍රම - ක්‍රමයකුත් කීවේද ඒ නිසා නැකැත් සාදවන්නන් විසින් යම් නැකැතක කියන ලද දෝෂයන් තිබුණේද ඒ දෝෂය භංග කිරීමට යමක් තිබේ නම් ඒ ලෙස කර නිසැකව ගත යුත්තේය.'
නැකැත්කරණයේදී පැමිණෙන රික්තා දෝෂ, මර යෝග, විස යෝග යනු රාහු කාලයටත් වඩා දෝෂ එන අවස්ථාවන්ය. එහෙත් එවැනි අවස්ථා පවා නි‍ෙදාස් කර මුහුර්ත සකස් කර ගන්නා ආකාරය පුරාණ ආචාර්යවරු දැක්වුවද අරුමය වන්නේ රාහු කාලය ඒ සියල්ලටම වඩා නපුරු අධම කාලයක් ලෙස සැලකීමයි. එබැවින් අද රාහු කාලය අවයෝග, මරයෝග ආදී වශයෙන් සලකමින් වැඩ කටයුතු පවා කිරීම යුගයේ අවශ්‍යතාවක් නොවේ. වේලාවක් ශුද්ධ කර ගැනීමට උගන්වා ඇති කිසිදු තැනක රාහු කාලය පිළිබඳ පැහැදිලි සඳහනක් කර නැත. ඕනෑම දිනයක යෙදෙන දෝෂ, දෝෂ භංග වන ක්‍රම අනුව නැකැත් ශුද්ධ කර ගැනීමට කරුණු දක්වා ඇතත් අද පවතින රාහු කාලය පිළිබඳ මතය නිසා අනවශ්‍ය ප්‍රශ්න මතු වී ඇත. මෙවැනි යුගයක රාහු කාලය පිළිබඳ අනවශ්‍ය මත දරමින් කාලය අත්හැරීම අනුවණකමක් ලෙස සැලකියි යුතුය. රාහු කාලය පිළිබඳ සිතා බැලීමේදී ලොව පුරා අහස් ගැබ සිසාරා ගමන් කරන ගුවන් යානා ඕනෑ තරම් පිටත්වීම් හා නැවැත ළඟාවීම් සතියේ සඳහන් කර ඇති රාහු කාලය තුළ ගමන් අරඹනවා මෙන්ම ළඟාවීමද සිදුවන්නේය. එහෙත් රාහු කාලය තුළ යාම් ඊම්වලින් අවැඩක් සිදුවූ බව වාර්තා වී නොමැත. රාහු කාලය කියා ගුවන් ගමන් වාර අවලංගු කොට ද නොමැත. රාහු කාලය පිළිබඳ මෙන්ම ජේ‍යාතිෂයේ සඳහන් නොවන තවත් නොයෙක් වැරැදි මත මෑතකදී ජේ‍යාතිෂ කටයුතුවලට ඇතුළු වී කරන දෑ සුළුපටු නොවෙයි. ඒවා සැබෑ ජේ‍යාතිෂය නොවන අතර ඍෂි භාෂිතයද නොවෙයි. මේ නිසා ජේ‍යාතිෂය ගරු කරනු ලබන පිරිස් අසීරුතාවට පත්වෙයි. එය ජේ‍යාතිෂය පිළිබඳ දැන උගත් උතුමන්ගේ විමසිල්ලට භාජනය විය යුතු අතර වැරැදි මත තුරන් කළ යුතු කාලය එළැඹ ඇති බව අපගේ විශ්වාසයයි. නැතහොත් වන්නේ මෙතරම් වටිනා ශාස්ත්‍රයක් කෙරෙහි මිනිසුන්ගේ ඇති ගරුත්වය පහව ගොස් මේ උතුම් ශාස්ත්‍රයට ඇති වටිනාකම නැති වී ගොස් මෙරටින් අතුරුදන් වී යෑමයි. එම නිසා සියලු ප්‍රවීණ, ආධුනික, මේ සියලු ජේ‍යාතිෂවේදීන් එකම අරමුණක් මත පෙළගැසී ජේ‍යාතිෂයේ පවත්නා දුර්මුඛ පහ කොට නැවැත මේ පොළෝතලයේ මේ උතුම් ශාස්ත්‍රය ස්ථාපිත කිරීමයි.
උපුටා ගැන්ම මව්බිම පුවත්පත
.jpg "ලෝක කාන්තා සමුළුව ඇමැතීමේ වරම් දිනාගත් ප්‍රථම බොලිවුඩ් නිළිය")